ލާމަރުކަޒީ ގާނޫނަށް ހުށަހެޅި އިސްލާހަކީ ބިން ފޭރޭ ބިލެއް، މި ބިލަށް ބަހުސްކުރަން ރަނގަޅުވާނީ އިސްރާއީލުގެ މަޖިލީހެއްގައި: މައުރޫފް
26 އޯގަސްޓު 2026 | ބުދަ 08:21ލާމަރުކަޒީ ގާނޫނަށް ހުށަހަޅާފައިވާ އިސްލާހުތައް މަޖިލީހުގެ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ބަހުސްކުރައްވަމުން، އެއީ ރައްޔިތުންގެ ބާރުތަކާއި ބިންތައް ފޭރޭ ބިލެއް ކަމަށް ބުނެ އިދިކޮޅު މެންބަރުން ވަނީ ވަރަށް ބޮޑަށް ފާޑުވިދާޅުވެފަ. މި ބިލާ ދެކޮޅަށް ހުށަހެޅި ޕެޓިޝަނަށް ރިއާޔަތްނުކޮށް ކޮމިޓީން ބިލު ފާސްކުރިއިރު، ސަރުކާރުން ނަގާ ބިންތަކުގައި ކޮށްފައިވާ އިންވެސްޓްމަންޓްތަކަށް ބަދަލުދޭންޖެހޭ ގޮތަށް މިހާރު ވަނީ އިސްލާހު ގެނެސްފަ.
ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު | ރައްޔިތުންގެ މަޖިލިސް
ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި، އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ ބިލަކީ ރައްޔިތުންގެ ބިން ފޭރޭ ބިލެއް ކަމަށާއި، މި ބިލަށް ބަހުސް ކުރަން އެންމެ ރަނގަޅުވާނީ އިސްރާއީލުގެ ރައްޔިތުންގެ މަޖިލީހުގެ ތަޅުމުގައި ކަމަށް، ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާފައި ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ ބިލު، ލާމަރުކަޒީ ކޮމިޓީ އިން ދިރާސާކޮށް ނިންމިގޮތުގެ ރިޕޯޓު ވަނީ ހުށަހަޅާފަ އެވެ. އެ ރިޕޯޓަށް ބަހުސް ކުރައްވަމުން މައުރޫފް ވިދާޅުވީ، މި ބިލަކީ ދިވެހީންގެ އަތުން ދިވެހީންގެ ބިންތައް ފޭރޭ ބިލެއް ކަމަށެވެ.
އެހެންކަމުން މިފަދަ ބިލަކަށް ބަހުސް ކުރަން ރަނގަޅުވާނީ ރާއްޖޭގެ ރައްޔިތުންގެ މަޖިލީހުގެ ތަޅުމެއްގައި ނޫން ކަމަށާއި އިސްރާއީލުގެ މަޖިލީހުގެ ތަޅުމުގައި މި ފަދަ ކަމަކަށް ބަހުސް ކުރަން ރަނގަޅު ވާނެ ކަމަށް މެންބަރު ވިދާޅުވި އެވެ.
ލާމަރުކަޒީ ގާނޫނަށް ހުށަހެޅިފައިވާ އިސްލާހު މިއީ ބިން ފޭރޭ އިސްލާހު. މިއީކީ ދިވެހިރާއްޖޭގެ ރައްޔިތުންގެ މަޖިލީހެއްގައި ބަހުސް ކުރަން ޖެހޭ ވައްތަރުގެ އިސްލާހެއް ނޫން. މިއީ އިސްރާއީލުގެ ރައްޔިތުންގެ މަޖިލީހުގައި ބަހުސްކުރަންޖެހޭ ވައްތަރުގެ ބިލެއް. ބިން ފޭރޭ ބިލު މިއީ ރައްޔިތުންގެ ކައުންސިލްތަކުން، ރައްޔިތުންގެ ބާރުތައް ފޭރޭ ބިލެއް. އެހެންވީމާ މިއީ ދިވެހިރާއްޖެ ފަދަ ގައުމެއްގެ ރައްޔިތުންގެ މަޖިލީހުގައި ބަހުސްކުރާ ވައްތަރުގެ ބިލެއް ނޫން. މި ރަނގަޅުވާނީ އަޅުގަނޑު ކުރިން ވެސް ދެންނެވިހެން އިސްރާއީލުގެ މަޖިލީހުގެ ތަޅުމުގައި ވާހަކަދައްކަންމައުރޫފް ޒާކިރު
ލާމަރުކަޒީ ކޮމިޓީ އިން މި ބިލު ދިރާސާ ކުރީ ލާމަރުކަޒީ ގާނޫނަށް ހުށަހެޅި އިސްލާހުގެ ބިލު ބޭރުކޮށްލުމަށް ގޮވާލައި، ހުށަހަޅާފައިވާ ޕެޓިޝަނަށް ވެސް އަދި ރައްޔިތުންގެ ކަންބޮޑުވުންތަކަށް ވެސް ބެލުމެއް ނެތި އެވެ. ހޯމަ ދުވަހުގެރޭ ބޭއްވި އެ ކޮމިޓީ ބައްދަލުވުމުގައި ތުޅާދޫ ދާއިރާގެ މެންބަރު އަބްދުލް ހަންނާން އަބޫބަކުރު ހުށަހަޅުއްވާފައިވާ ބިލު ބައެއް އިސްލާހުތަކާއެކު ވަނީ ފާސްކޮށްފަ އެވެ.
އެ ބައްދަލުވުމުގައި ހެންވޭރު އުތުރު ދާއިރާގެ ޕީއެންސީގެ މެންބަރު އަހުމަދު އައިފާން ވަނީ، ކައުންސިލުތަކުގެ އިހުތިސާސުން ވަކިކުރެވޭ ބިންބިމުގައި ނުވަތަ ތަންތަނުގައި ގާނޫނު ހުއްދަކުރާ ގޮތުގެ މަތިން ކައުންސިލުން ނުވަތަ ތިންވަނަ ފަރާތަކުން އިންވެސްޓްމަންޓެއް ކޮށްފައިވާ ނަމަ، އެފަދަ އިންވެސްޓްމަންޓްތަކަށް ފިނޭންސް މިނިސްޓްރީން ކައުންސިލުތަކަށް ނުވަތަ ތިންވަނަ ފަރާތްތަކަށް އެކަށީގެންވާ ބަދަލެއް ދޭން ޖެހޭ ގޮތަށް އިސްލާހެއް ހުށަހަޅުއްވާފަ އެވެ.
މެންބަރުގެ އެ ހުށަހެޅުއްވުން ކޮމިޓީގެ އަޣުލަބިއްޔަތުން ފާސްކޮށްފައިވާއިރު، އެ ހުށަހެޅުމާ ދެކޮޅަށް ވޯޓު ދެއްވީ އިދިކޮޅު އެމްޑީޕީ އަށް ނިސްބަތްވެވަޑައިގަންނަވާ ކެންދޫ ދާއިރާގެ މެންބަރު މައުރޫފް ޒާކިރް އާއި ކެޔޮދޫ ދާއިރާގެ މެންބަރު މުހައްމަދު ނިއުޝާދުގެ އިތުރުން އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން އެވެ.
އޭގެ އިތުރުން އެ ގާނޫނުގެ 2-56 ގެ (ލ) ގެ ފަހަތަށް އަކުރެއް ވަނީ އިތުރުކޮށްފަ އެވެ.
މި އިސްލާހުތައް ކޮމިޓީ އިން ފާސްކޮށް، ބިލު މަޖިލީހުގެ ތަޅުމަށް ފޮނުވިއިރު މީގެ ކުރިން ބޭއްވި އެ ކޮމިޓީގެ ބައްދަލުވުމުގައި އެ ބިލާ ގުޅޭގޮތުން މަޖިލީހަށް ޕެޓިޝަނެއް ހުށަހަޅައި އެ ޕެޓިޝަނާ ގުޅޭގޮތުން ލާމަރުކަޒީ ކޮމިޓީގެ ޚިޔާލެއް ވެސް ހޯދަން ޕެޓިޝަން ކޮމިޓީން އެދިފައިވާކަން ފާހަގަ ކުރައްވާ ކެންދޫ ދާއިރާގެ އެމްޑީޕީ މެންބަރު ވަނީ އެފަދަ ޕެޓިޝަނެއް މަޖިލީހަށް ހުށަހެޅިފައި ވަނިކޮށް، އެއަށް ބެލުމެއްނެތި ބިލުގެ މަސައްކަތް ނިންމައިފި ނަމަ، ޕެޓިޝަންތައް މަޖިލީހަށް ހުށަހެޅުމުގެ ފުރުސަތު ދިނުމުގެ އެއްވެސް ބޭނުމެއް ނެތް ކަަމަށް ވިދާޅުވެފަ އެވެ.
އެއީ ހަމަޖެހޭކަމެއް ނޫން ކަމަށާއި އެކަން އެގޮތަށް ނުކުރެވޭނެ ކަމަށް ވެސް މެންބަރު ވިދާޅުވި އެވެ. އެއާއެކު މެންބަރު ވަނީ ޕެޓިޝަނަށް ރިއާޔަތް ކުރުމަށްފަހު ބިލުގެ މަސައްކަތް ކުރިއަށް ގެންދިއުމަށް ހުށަހަޅުއްވާފަ އެވެ. އެހެން ނަމަވެސް ޕީއެންސީގެ މެޖޯރިޓީ އޮތް އެ ކޮމިޓީ އިން އެ ހުށަހެޅުން ވަނީ ބޭރުކޮށްލާފަ އެވެ.
ތުޅާދޫ ދާއިރާ މެންބަރު އަބްދުލް ހައްނާން އަބޫބަކުރު ސްޕޮންސަރ ކުރައްވާ ހުށަަހަޅުއްވާފައިވާ މި ބިލުގެ މަސައްކަތް ކޮމިޓީ އިން ކުރަމުން ދާއިރު އެ ބިލަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) އިސްލާހުތަކެއް ވެސް ހުށަހެޅުއްވި އެވެ.
