ކަރްނާޓަކާއިން ރާއްޖެއަށް ފުރަތަމަ ފަހަރަށް އަނބު އެކްސްޕޯޓްކޮށްފި

އިންޑިއާގެ ކަރްނާޓަކާ ސްޓޭޓުން ރާއްޖެއަށް ފުރަތަމަ ފަހަރަށް ވައިގެ މަގުން "ނީލަމް" އަދި "ތޯތާޕޫރީ" އަނބު ފޮނުވުމާއެކު، އެ ސްޓޭޓްގެ އަނބު އުފައްދާ ދަނޑުވެރިންނަށް އާ ފުރުސަތުތަކެއް ހުޅުވިގެން ގޮސްފައިވާ ކަމަށް އިންޑިއާގެ ޔޫނިއަން ކޮމާސް އެންޑް އިންޑަސްޓްރީ މިނިސްޓަރު ޕިޔޫޝް ގޯޔަލް ވިދާޅުވެއްޖެ އެވެ. މިނިސްޓަރު މިކަން ފާހަގަކުރެއްވީ ބައިނަލްއަގުވާމީ ބާޒާރުގައި އިންޑިއާގެ ދަނޑުވެރިކަމުގެ އުފެއްދުންތައް އިތުރަށް ފުޅާކުރުމަށް އެޅުނު މުހިންމު ފިޔަވަޅެއްގެ ގޮތުގަ އެވެ.

އެކްސްގައި ކުރެއްވި ޕޯސްޓެއްގައި ގޯޔަލް ވަނީ، މި ޝިޕްމަންޓް ފޮނުވުމުގައި އެހީތެރިކަން ފޯރުކޮށްދިން އެގްރިކަލްޗަރަލް އެންޑް ޕްރޮސެސްޑް ފުޑް ޕްރޮޑަކްޓްސް އެކްސްޕޯޓް ޑިވެލޮޕްމަންޓް އޮތޯރިޓީ (އަޕީޑާ) އަށް މަރުހަބާ ވިދާޅުވެފަ އެވެ.

"މި ކާމިޔާބީއާއެކު ކަރްނާޓަކާގެ އަނބު ދަނޑުވެރިންނަށް އާ ފުރުސަތުތަކެއް ހުޅުވި، ފާމަރ ޕްރޮޑިއުސަރ އޯގަނައިޒޭޝަންތަކާއި (އެފް.ޕީ.އޯ)، އެކްސްޕޯޓަރުން އަދި ދަނޑުވެރިކަމުގެ ވިޔަފާރިވެރިން ބައިނަލްއަގުވާމީ ބާޒާރުގައި ހަރަކާތްތެރިވުމަށް އިތުރު ހިތްވަރެއް ލިބިގެންދާނެ،" ގޯޔަލް ވިދާޅުވި އެވެ.

އިންޑިއާގެ ކޮމާސް މިނިސްޓްރީން ނެރުނު ބަޔާނެއްގައި ބުނެފައިވަނީ، އަޕީޑާގެ އެހީތެރިކަމާއެކު ރާއްޖެއަށް ފޮނުވި އެއް މެޓްރިކް ޓަނުގެ ނީލަމް އަދި ތޯތާޕޫރީ އަނބުގެ ޝިޕްމަންޓް ފޮނުވާފައިވަނީ މިދިޔަ ބުރާސްފަތި ދުވަހު ކަމަށެވެ. މި އެކްސްޕޯޓުގެ މަގްސަދަކީ ކަރްނާޓަކާގައި މޫސުން ނިމޭކޮޅު ލިބޭ އަނބުގެ ބާވަތްތައް ބޭރުގެ ބާޒާރުތަކުގައި އިޝްތިހާރުކުރުމާއި، އިންޑިއާއިން ބޭރަށް ފޮނުވާ އަނބުގެ ބާވަތްތައް އިތުރުކުރުމެވެ.

މި ޝިޕްމަންޓަކީ ކަރްނާޓަކާގެ ކޯލާރު ޑިސްޓްރިކްޓްގެ "ޕްރަކްރޫތިމަޔާ ފާމާސް ޕްރޮޑިއުސަރ ކޮމްޕެނީ ލިމިޓެޑް" އާ ގުޅިފައިވާ ދަނޑުވެރިންގެ އަތުން ސީދާ ހޯދާފައިވާ ތަކެއްޗެވެ. އަދި މި ތަކެތި އެކްސްޕޯޓްކޮށްފައިވަނީ އަލަށް ރަޖިސްޓްރީކުރި އަންހެން ވިޔަފާރިވެރިއެއް ކަމަށްވާ "އަހަލްޔާ ދޭވީ ވެންޗާސް" އިންނެވެ. މިނިސްޓްރީން ބުނި ގޮތުގައި މިއީ އިންޑިއާގެ ދަނޑުވެރިކަމުގެ އުފެއްދުންތައް ބޭރަށް ފޮނުވުމުގެ ނިޒާމުގައި އަންހެން ވިޔަފާރިވެރިންގެ ބައިވެރިވުން އިތުރުވަމުންދާކަމުގެ ހެއްކެކެވެ.

ނީލަމް އަދި ތޯތާޕޫރީ އަކީ ޖޫން މަހުގެ ފަހުކޮޅުން ފެށިގެން ޖުލައި މަހުގެ ނިޔަލަށް މޫސުން ނިމޭކޮޅު ލިބޭ ބާވަތްތަކެއް ކަމަށް މިނިސްޓްރީގެ ބަޔާނުގައިވެ އެވެ. މީގެ ސަބަބުން އިންޑިއާގެ އަނބު އެކްސްޕޯޓްކުރާ މުއްދަތު އިތުރުކޮށް، އާންމުކޮށް އަނބު ލިބޭ މޫސުން ނިމުމަށްފަހުވެސް ބައިނަލްއަގުވާމީ ބާޒާރުގެ ޑިމާންޑަށް ތަކެތި ފޯރުކޮށްދިނުމުގެ ފުރުސަތު ލިބިގެންދާނެކަމަށް ބުނެފައިވެ އެވެ.

މީގެ އިތުރުން، މި ޝިޕްމަންޓުން ދޭހަވަނީ ދަނޑުވެރިންގެ އުފެއްދުންތައް އެއްކޮށް، ބައިނަލްއަގުވާމީ ބާޒާރުތަކާ ގުޅުވައިދިނުމުގައި "ފާމަރ ޕްރޮޑިއުސަރ ކޮމްޕެނީ" ތަކުން އަދާކުރާ ދައުރު ބޮޑުވަމުންދާ ކަމެވެ.

މިނިސްޓްރީން ހާމަކުރި ގޮތުގައި، މި އެކްސްޕޯޓްގެ ސަބަބުން ދަނޑުވެރިންނަށް އާންމު ބާޒާރުން ލިބޭ އާމްދަނީއަށްވުރެ 50 އިންސައްތަ އިތުރު އާމްދަނީއެއް ވަނީ ލިބިފަ އެވެ.

އިންޑިއާ ސަރުކާރުން ބުނި ގޮތުގައި މި އެކްސްޕޯޓާއެކު ފާމަރ ޕްރޮޑިއުސަރ އޯގަނައިޒޭޝަންތަކާއި، އެކްސްޕޯޓަރުން އަދި ދަނޑުވެރިކަމުގެ ވިޔަފާރިވެރިން ބައިނަލްއަގުވާމީ ބާޒާރުގައި ބައިވެރިވުން އިތުރުވާނެ ކަމަށް ބެލެވެ އެވެ. އަދި އިންޑިއާގެ ދަނޑުވެރިކަމުގެ އުފެއްދުންތަކަށް ބައިނަލްއަގުވާމީ ބާޒާރުތައް ހޯދައިދިނުމަށާއި އެކްސްޕޯޓް އިންފްރާސްޓްރަކްޗަރ ވަރުގަދަކުރުމަށް އަޕީޑާއިން ސްޓޭޓް ސަރުކާރުތަކާ ގުޅިގެން މަސައްކަތް ކުރަމުންދާނެ ކަމަށްވެސް ސަރުކާރުން ބުނެފައިވެ އެވެ.