ކުޅިވަރުގެ ދާއިރާއިން ގުޅުން ބަދަހިކުރުމަށް އިންޑިއާ އާއި ރާއްޖޭގެ ކުޅިވަރާ ބެހޭ ވަޒީރުން މަޝްވަރާކުރައްވައިފި

ގްލާސްގޯގައި ކުރިއަށްދާ ކޮމަންވެލްތު ކުޅިވަރާ ބެހޭ ވަޒީރުންގެ ބައްދަލުވުމުގެ ހަވާސާގައި، އިންޑިއާގެ ކުޅިވަރާ ބެހޭ ވަޒީރު މަންސޫކް މަންޑަވިޔާ، ދިވެހިރާއްޖޭގެ ކުޅިވަރާ ބެހޭ ވަޒީރު އަބްދުﷲ ރާފިއު އާ ބައްދަލުކުރައްވައި ދެ ފަރާތުގެ ދެމެދުގައި ރަސްމީ މަޝްވަރާތައް ބާއްވަވައިފި އެވެ.

މި ބައްދަލުވުމުގައި މައިގަނޑު ގޮތެއްގައި މަޝްވަރާކުރައްވާފައިވަނީ ކުޅިވަރުގެ ދާއިރާއިން "ސައުތު-ސައުތު ކޯޕަރޭޝަން" ނުވަތަ ތަރައްގީވަމުން އަންނަ ގައުމުތަކުގެ މެދުގައި އޮންނަ ގުޅުން އިތުރަށް ބަދަހިކުރުމާ ގުޅޭގޮތުންނެވެ.

އިންޑިއާގެ ކުޅިވަރާ ބެހޭ ވަޒީރު ވިދާޅުވި ގޮތުގައި، އެ ގައުމުގައި ހުރި ދުނިޔޭގެ ފެންވަރުގެ ކުޅިވަރު ވަސީލަތްތަކާއި، "ސްޕޯޓްސް ސައިންސް" ނުވަތަ ކުޅިވަރުގެ އިލްމީ ދާއިރާއިން ހޯދާފައިވާ ކުރިއެރުންތަކުގެ މައުލޫމާތު މި ބައްދަލުވުންތަކުގައި ވަނީ ހިއްސާކުރައްވާފަ އެވެ. މީގެ އިތުރުން އެތުލީޓުން ތަމްރީނުކުރުމާއި، މަތީ ފަންތީގެ ކުޅިވަރު ކުޅުންތެރިން ބިނާކުރުމަށް އިންޑިއާގައި ގާއިމުކޮށްފައިވާ ނިޒާމުތަކާ ގުޅޭގޮތުން ވެސް ވަޒީރު ވާހަކަފުޅު ދެއްކެވި އެވެ.

މި ބައްދަލުވުންތަކުގައި ދެގައުމުގެ މެދުގައި ހުރި ފުރުސަތުތަކުގެ ބޭނުން ހިފައި، ކުޅިވަރުގެ އިލްމީ ދާއިރާއާއި، ކޯޗުންނާއި އެތުލީޓުން ތަމްރީނުކުރުމާއި، ޖިސްމާނީ ތައުލީމު ނުވަތަ ފިޒިކަލް އެޑިއުކޭޝަންގެ އިތުރުން ޒުވާނުންގެ މެދުގައި ބަދަލުކުރެވޭ އެކި ޕްރޮގްރާމްތައް މެދުވެރިކޮށް ގުޅުން ބަދަހިކުރެވިދާނެ ދާއިރާތަކާ ގުޅޭގޮތުން ފުޅާ ދާއިރާއެއްގައި ވަނީ މަޝްވަރާކުރައްވާފަ އެވެ.