މެންބަރު ޖަނާބު ހުންނެވީ ބޭގަރާރުވެފައި!
29 ޖުލައި 2026 | ބުދަ 14:01އިންތިޚާބުތަކުން ލިބުނު ނާކާމިޔާބީއާއި ސަރުކާރު ހިންގާ ކޯލިޝަނުގެ އެތެރޭގައި އުފެދިފައިވާ ބާރުގެ ކޯޅުންތަކުގެ ސަބަބުން، ސަރުކާރުގެ އިސް ބޭފުޅުންގެ މެދުގައި ބޮޑު ނުތަނަވަސްކަމެއް ވަނީ އުފެދިފައި. ވަޒީފާތަކުން މީހުން ވަކިކުރުމާއި ރައްޔިތުންގެ ފާޑުކިޔުންތައް އިތުރުވުމާ ގުޅިގެން ސަރުކާރަށް އޮތް އިތުބާރު ކުޑަވެ، ބާރުތައް ގެއްލިދާނެކަމުގެ ބިރުވެރިކަން މިހާރު ވަނީ އިންތިހާއަށް އިތުރުވެފައި
ރައްޔިތުންގެ މަޖިލީހުގެ ޖަލްސާގައި، މައްޗަންގޮޅި އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު) ވާހަކަ ދައްކަވަނީ | ރައްޔިތުންގެ މަޖިލިސް
ރާއްޖޭގެ ސިޔާސީ މަސްރަހަށް ބަލާއިރު، އަންގާރަ ދުވަހުގެ ރައްޔިތުންގެ މަޖިލީހުގައި ހުށަހެޅުނު ގަރާރަކާ ގުޅިގެން އުފެދުނު ބަހުސްތަކުން ފެނިގެންދަނީ ސަރުކާރާއި ސަރުކާރު ހިންގާ ކޯލިޝަންގެ އިސް ބޭފުޅުންގެ މެދުގައި އޮތް ބޮޑު ނުތަނަވަސްކަމެވެ. ޚާއްސަކޮށް، މަޖިލީހުގެ ތަޅުމުގައި ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ ޕީއެންސީ މެންބަރު އިބްރާހީމް މުޙައްމަދު (ޖަނާބު)ގެ ހިތްޕުޅުގައި އޮތް ބޭގަރާރުކަމަކީ މިއަދު ފޮރުވޭނެ ހަގީގަތެއް ނޫނެވެ. މި ބޭގަރާރުކަމަކީ ހަމައެކަނި ޒާތީ ކަމެއް ނޫން ކަމަށާއި، މިއީ މުޅި ސަރުކާރުގެ ހާލަތު ރަމްޒުކޮށްދޭ ކަމެއް ކަމުގައި ގިނަ ބަޔަކު ގަބޫލުކުރެ އެވެ.
ބޭގަރާރުވުމަކީ ހިތް ނުތަނަވަސްވުމާއި، ހާސްވުމާއި، އަދި ކަންބޮޑުވުން އިންތިހާއަށް ދިއުން ކަމަށްވާއިރު، ސަރުކާރު ބޭގަރާރުވާން ޖެހުނު އެންމެ ބޮޑު އެއް ސަބަބަކީ އެންމެ ފަހުން ބޭއްވުނު ލޯކަލް ކައުންސިލް އިންތިޚާބުގެ ނަތީޖާ އިންނެވެ. މާލެއާއި ރާއްޖޭގެ ބޮޑެތި ސިޓީތަކުގެ ފުލް މެޖޯރިޓީ އިދިކޮޅު ފަރާތްތަކުން ނެގުމަކީ ސަރުކާރުގެ ސިޔާސަތުތަކަށް ރައްޔިތުން ދިން ވަރުގަދަ ޖަވާބެއްކަން ކަށަވަރެވެ. ސަރުކާރުގެ ހުށަހެޅުމާ ދެކޮޅަށް ގާތްގަނޑަކަށް 70 އިންސައްތަ ރައްޔިތުން 'ނޫނެކޭ' ބުނުމުން، ސަރުކާރުގެ އިސް ފަރާތްތަކުގެ ހިތްނުތަނަވަސްކަން އިންތިހާއަށް ވަނީ އިތުރުވެފައިވެފަ އެވެ.
މީގެ އިތުރުން ވެރިކަން ކުރަމުންދާ އާއިލާގެ ތެރޭގައި އޮތް ބާރުގެ ކޯޅުމަކީ ވެސް މި ބޭގަރާރުކަމުގެ ބޮޑު ބައެކެވެ. މަޖިލީހުގައި ހުންނެވި މެންބަރު ޖަނާބު އަކީ މިސަރުކާރާ އާއިލީ ގޮތުންނާއި ސިޔާސީ ގޮތުން އެންމެ ބާރުގަދަ އެއް ބޭފުޅާ ކަމަށްވާއިރު، ވެރިކަމުގެ ބާރުތައް ގެއްލިދާނެ ކަމުގެ ބިރު ހީވުމަކީ އިންސާނީ ތަބީޢަތުގައިވެސް ބޭގަރާރު ވެދާނެ ކަމެކެވެ.
ވަޒީފާއިން ވަކިކުރުމާއި އިންސާފުގެ ބަހުސް ގަދަވެފައިވާ މިދަނޑިވަަޅުގައި، ސިޔާސީ ބަދަލުތަކާ ގުޅިގެން އާންމު ރައްޔިތުން ވަޒީފާއިން ވަކިކުރަމުންދާ ދިއުމާ ގުޅިގެން ރައްޔިތުންގެ އަޑު ވަނީ ގަދަވެފަ އެވެ. އަދި ސޯޝަލް މީޑިއާއާއި ރައްޔިތުންގެ ފާޑުކިޔުން އިންތިހާއަށް ދަނީ އިތުރުވަމުންނެވެ. އަދި ސޯޝަލް މީޑިއާގައި ކުރެވޭ ކޮމެންޓަކުން ނުވަތަ މަގުމަތީގައި ފާޅުކުރާ ޚިޔާލަކުންވެސް ސަރުކާރުގެ އިސް ބޭފުޅުން ބޭގަރާރުވާ މަންޒަރު ދަނީ ފެންނަމުންނެވެ. އަދި ކޮންމެ ކުއްލި މައްސަލައަކީ ނުވަތަ ކޮންމެ ގަރާރަކީ ބޭގަރާރުކަމުގެ ތެރެއިން އުފަންވާ އެއްޗެއް ކަމަށް ސިފަކުރެވެނީ، ސަރުކާރަށް ރައްޔިތުންގެ އިތުބާރު ގެއްލިފައިވާ މިންވަރު ބޮޑުކަމުންނެވެ. އަތުގައި އޮތް ބާރު ގެއްލެން އުޅޭކަމުގެ އިހުސާސްވުމަކީ ކޮންމެ ވެރިއަކު ވެސް ނުތަނަވަސްކުރުވާނެ ކަމެއްނުންތޯ އެވެ.
ޖުމްލަ ގޮތެއްގައި ބަލާއިރު، މެންބަރު ޖަނާބުގެ ބޭގަރާރުކަމަކީ ރާއްޖޭގެ ސިޔާސީ މަސްރަހުގައި ހުރި ނުތަނަވަސްކަމުގެ ރަމްޒެކެވެ. މި ބޭގަރާރުކަމުން އަރައިގަނެވޭނީ ރައްޔިތުންގެ އިތުބާރު ހޯދައި، ހާމަކަން ބޮޑު ގޮތެއްގައި ކަންކަން ކުރިއަށް ގެންގޮސްގެންނެވެ. އެހެން ނޫންނަމަ، މި ބޭގަރާރުކަން ދާނީ ދުވަހެއް ދުވަހަކަށް އިތުރުވަމުންނެވެ.
