އަސާސީ ޚިދުމަތްތައް ފޯރުކޮށްދިނުމާއި ކަރަންޓު ކެނޑުމުގެ މައްސަލަތަކައް ހައްލު ލިބޭނީ އެކަމާ ގުޅޭ ގާނޫނުތައް އުފައްދައިގެން: މެންބަރު ޝާޑު
29 ޖުލައި 2026 | ބުދަ 13:09ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނަށް ގެންނަ އިސްލާހުތަކާއެކު އަސާސީ ޚިދުމަތްތަކުގެ ފެންވަރު ބެލޭނެ ނިޒާމެއް ގާއިމުވެ، ކަރަންޓު ކެނޑުމުގެ މައްސަލައަށް ދާއިމީ ހައްލެއް ލިބޭނެ ކަމަށް މެންބަރު މުހައްމަދު ޝާހިދު ވިދާޅުވި. މީގެ އިތުރުން، ކުރީ ސަރުކާރުން މަޝްރޫއުތައް ހަވާލުކުރުމުގައި ހުރި އިހުމާލުތަކުގެ ސަބަބުން ޚިދުމަތްތަކަށް ބުރޫއަރާފައިވާތީ، ގާނޫނީ އޮނިގަނޑު އިސްލާހުކޮށްގެން ރައްޔިތުންނަށް ފުރިހަމަ ޚިދުމަތް ދިނުމަށް ސަރުކާރުން މަސައްކަތް ކުރަމުންދާކަމަށް އޭނާ ވިދާޅުވި
ހުޅުދޫ ދާއިރާގެ މެންބަރު މުހައްމަދު ޝާހިދު މަޖިލީހުގެ ތަޅުމުގައި ވާހަކަދައްކަވަނީ | ރައްޔިތުންގެ މަޖިލިސް
ރައްޔިތުން ބޭނުންވާ އަސާސީ ޚިދުމަތްތައް ފޯރުކޮށްދިނުމާއި، ކަރަންޓު ކެނޑުމުގެ މައްސަލަތަކައް ހައްލު ލިބޭނީ އެކަމާ ގުޅޭ ގާނޫނުތައް އުފައްދައި ނުވަތަ އުފައްދާފައިވާ ގާނޫނުތަކަށް އިސްލާހު ގެނެސްގެން ކަމަށް ރައްޔިތުން މަޖިލީހުގެ ހުޅުދޫ ދާއިރާގެ މެންބަރު، މުހައްމަދު ޝާހިދު (ޝާޑު) ވިދާޅުވެއްޖެ އެވެ.
ބުދަ ދުވަހުގެ މަޖިލީހުގެ ޖަލްސާގައި ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނަށް އިސްލާހު ގެނައުމަށް ބިލަށް ބަހުސް ކުރައްވަމުން މެންބަރު ޝާހިދު ވަނީ ރާއްޖޭގެ އަސާސީ ޚިދުމަތްތަކުގެ ފެންވަރު ރަނގަޅުކުރުމަށް ގާނޫނީ އޮނިގަނޑަށް ގެންނަންޖެހޭ ބަދަލުތަކުގެ މުހިންމުކަމުގެ މައްޗަށް އަލިއަޅުއްވާލައްވާފަ އެވެ.
މެންބަރު ވިދާޅުވީ ޔޫޓިލިޓީ ރެގިއުލޭޓްރީ އޮތޯރިޓީގެ ޒިންމާއަކީ ހަމައެކަނި އަގުތަކަށް ބަދަލުކުރުން ނޫން ކަމަށާއި، ޚިދުމަތް ދިނުމަށް ބޭނުންކުރާ ވަސީލަތްތަކުގެ ފެންވަރު ބެލުން ވެސް އެއީ އެ އޮތޯރިޓީގެ މަސްއޫލިއްޔަތެއް ކަމަށެވެ.
މި ބަހުސްގައި އޭނާ ވަނީ އައްޑޫ ސިޓީގެ ހުޅުދޫ އަދި މީދޫއަށް ދިމާވެފައިވާ ކަރަންޓުގެ މައްސަލައަށް އިޝާރާތް ކުރައްވާފަ އެވެ.
ހަމައެކަނި ރެގިއުލޭޓްރީ ބޯޑުގެ ނުވަތަ އޮތޯރިޓީގެ ޒިންމާއަކީ ހަމައެކަނި އެތާ ކަރަންޓު ކުޑަކުރުމާއި ބޮޑުކުރުމެއް ނޫން. އެ ބޭފުޅުން އެ ކަރަންޓު ފޯރުކޮށްދެނީ. އޭގެ އެންމެ ރަނގަޅު ގޮތުގައިތޯ؟ ޓްރާންސްފޯމަރާއި ކޭބަލްތަކާއި ޖެނެރޭޓަރު ހުރީ އެންމެ ރަނގަޅަށްތޯ؟ މި ފެންވަރަށް ބެލެންވާނޭމުހައްމަދު ޝާހިދު (ޝާޑު)
ނިމިދިޔަ ސަރުކާރަށް ފާޑުވިދާޅުވަމުން މެންބަރު ޝާހިދު ވިދާޅުވީ، ހުޅުދޫ މީދޫގައި އިންޖީނުގެ އެޅުމަށް 185 މިލިއަން ރުފިޔާގެ މަޝްރޫއެއް ހަވާލުކުރި ނަމަވެސް، އެ މަސައްކަތް ނިމިފައި ނުވާ ކަމަށެވެ. ފާއިތުވި ސަރުކާރުން މަޝްރޫއުތައް ހަވާލުކޮށްފައިވަނީ ކަމަށް ގާބިލު ނޫން ފަރާތްތަކާ ސިޔާސީ މަންފާއަށްޓަކައި ކަމަށާއި، އޭގެ ނަތީޖާއެއްގެ ގޮތުން ރައްޔިތުންނަށް ލިބެންޖެހޭ އަސާސީ ޚިދުމަތްތައް މެދުކެނޑެމުންދާ ކަމަށް އޭނާ ތުހުމަތު ކުރެއްވި އެވެ.
މީގެ އިތުރުން، މެންބަރު ފާހަގަކުރެއްވި ގޮތުގައި ކުރިން އޮތޯރިޓީތަކާއި ބޯޑުތައް އުފައްދާފައިވަނީ ހަމައެކަނި މުސާރަ ލިބޭ މަގާމުތަކެއްގެ ގޮތުގަ އެވެ. ނަމަވެސް މިހާރުގެ ސަރުކާރުން މަސައްކަތް ކުރަމުންދަނީ ހަގީގީ މާނައިގައި އިސްލާހުތަކެއް ގެނެސް، ފެނާއި، ނަރުދަމާ އަދި ކަރަންޓުގެ ޚިދުމަތް ދާއިމީ ގޮތެއްގައި ރައްޔިތުންނަށް ފޯރުކޮށްދިނުމަށް ކަމަށް އޭނާ ވިދާޅުވި އެވެ.
ކަރަންޓު ވެސް އަންނާނެ. ފެން ވެސް އަންނާނެ. ކުނި ވެސް ނެގޭނެ. ކުނި މެނޭޖު ކުރުމާއި ކަރަންޓު ދިނުމާއި ފެނުގެ ޚިދުމަތް ދިނުމާއި މިފަދަ އަސާސީ ހުރިހާ ޚިދުމަތް ދީ ނިންމުމަށްޓަކައި އަޅުގަނޑުމެންގެ ސަރުކާރުން މި ދަނީ ރެޔާއި ދުވާލު މަސައްކަތްކުރަމުން. ކަމާ ގުޅުންހުރި ވުޒާރާތަކާއި ކުންފުނިތަކާއި ސަރުކާރާ އެއްކޮށް މި ދަނީ މަސައްކަތްކުރަމުން. މި ކަންކަމަށް ވަގުތުކޮޅެއް ނަގާނެ. މިއީ މި ދަތިވެގެން އުޅޭ ކަމަކީ. އެހެންވީމާ، މިފަދަ ކަންކަމަށް ރައްޔިތުން ކެތްތެރިވެލައްވާ. މިފަދަ ކަންކަން ކުރެވޭނީ ހަގީގީ މާނައިގައި އަޅުގަނޑުމެންގެ މި މަޖިލީހުން ސަރުކާރަށް، މި ސަރުކާރުން ބޭނުންވާ އިސްލާހުތައް ނޫނީ ގާނޫނުތައް އުފައްދައިގެން، އުފަންކުރުވައިގެން އެހެރީ ގާނޫނުތަކުގައި ހުރި މިފަދަ މައްސަލަތައް ހައްލުކޮށްގެން ނޫނީ މިފަދަ ކަންކަމަށް ދާއިމީ ހައްލެއް ނާންނާނެމުހައްމަދު ޝާހިދު (ޝާޑު)
ޝާހިދު އިތުރަށް ވިދާޅުވީ، މިފަދަ ބޮޑެތި މައްސަލަތައް ހައްލުކުރުމަށް ވަގުތު ބޭނުންވާނެ ކަމަށާއި ރައްޔިތުން ކެތްތެރިވުމަށް އެދިވަޑައިގަންނަވާ ކަމަށެވެ. އަދި މަޖިލީހުން ސަރުކާރަށް ބޭނުންވާ ގާނޫނީ އިސްލާހުތައް ފާސްކޮށްދިނުމުން، ރައީސް ކުރައްވަމުންދާ މަސައްކަތްޕުޅުގެ ދަށުން ރައްޔިތުންނަށް ފެންނަ ތަރައްގީއާއި ދާއިމީ ހައްލު ލިބިގެންދާނެ ކަމުގެ ޔަގީންކަން ދެއްވާ ކަމަށް ވެސް ޝާހިދު ވިދާޅުވި އެވެ.
