ޕީއެންސީގެ މަޖިލިސް މެންބަރުންގެ ބަސްމަގާއި އަމަލުތައް، ޖޯކަރެއްގެ ބަސްމަގާއި އަމަލުތަކާ އެއްވެސް ތަފާތެއް ނެތް!

ޝައްކެއް ވެސް ނެތް ގޮތުގައި ރައްޔިތުންގެ މަޖިލީހަކީ ދައުލަތުގެ އެންމެ މުހިންމު އެއް ބާރެވެ. ގާނޫނު ހެދުމުގެ ބާރުން ފެށިގެން ސަރުކާރު ޖަވާބުދާރީ ކުރުވުމާއި، ރައްޔިތުންގެ ހައްގުތައް ހިމާޔަތްކުރުމަކީ މަޖިލީހުގެ މެންބަރުންގެ ކިބައިން ރައްޔިތުން އުންމީދުކުރާ އެންމެ އިސް ޒިންމާތަކެވެ.

ނަމަވެސް، ވެރިކަންކުރާ ޕާޓީ ޕީއެންސީގެ މެޖޯރިޓީ އޮތް 20 ވަނަ ރައްޔިތުންގެ މަޖިލީހުގެ މެންބަރުންގެ ފަރާތުން ފެންނަމުންދަނީ މުޅިން ތަފާތު މަންޒަރެކެވެ. މަޖިލީހުން ފެންނަމުންދާ މަންޒަރުތަކާއި އިވެމުންދާ އަޑުތަކަށް ބަލާއިރު، މަޖިލިސް މެންބަރުންގެ ބަސްމަގާއި އަމަލުތައް ޖޯކަރެއްގެ ބަސްމަގާއި އަމަލުތައް ހުންނަ ގޮތާ އެއްވެސް ތަފާތެއް ނެތޭ ބުނުމަކުން ދޮގަކަށް ނުވާނެ އެވެ. ކުރިމައްޗަށް ފެންނަން ހުންނަ ކަންކަމުގައި ވެސް ރައްޔިތުންނަށް ދޮގު ހެދުމާއި އޮޅުވާލުމެވެ. މިފަދަ ކަންކަމުގެ ސަބަބުން އެ މެންބަރުންނަށާއި އެ މެންބަރުން ނިސްބަތްވާ ޕާޓީގެ އިތުރުން ރައީސް ޑރ. މުހައްމަދު މުއިއްޒަށް އޮންނަ ތާއީދު ވެސް ދަނީ ދުވަހެއް ދުވަހަށް ދަށްވަމުންނެވެ.

އެކަމުގެ އެންމެ ސާފު އެއް ހެތްކަކީ މިދިޔަ އޭޕްރީލް މަހު ބޭއްވި ލޯކަލް ކައުންސިލްތަކުގެ އިންތިހާބާއި، ރެފެރަންޑަމް އިންތިހާބުގައި ސަރުކާރަށް ބޮޑުތަނުން ލިބުނު ނާކާމިޔާބީ އެވެ. މުޅި ރާއްޖޭގެ މެޖޯރިޓީ އެމްޑީޕީން ކާމިޔާބުކޮށްފައިވާއިރު، ރާއްޖޭގެ ހުރިހާ ސިޓީތަކެއްގެ ގޮނޑިތައް ވެސް ކާމިޔާބުކޮށްފައިވަނީ އެމްޑީޕީއަށް ނިސްބަތްވާ ކެންޑިޑޭޓުންނެވެ. ރެފެރަންޑަމް އިންތިހާބުގައި 70 އިންސައްތަ ރައްޔިތުން ސަރުކާރަށް ބޮޑުތަނުން ނޫނެކޭ ބުނެފައިވާއިރު 2028 ވަނަ އަހަރުގެ ރިޔާސީ އިންތިހާބުގައި ކަންކަން ވާނެ ގޮތް ދެން ހިތަށް ގެންނާށެވެ.

މި ހިސާބުން ރައްޔިތުންގެ މަޖިލީހުގެ މެންބަރުންގެ ވާހަކައާއި ހަމައަށް ދަމާ ހިނގާށެވެ. އަންގާރަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން، ވެރިކަންކުރާ ޕާޓީގެ ޕާލިމަންޓްރީ ގްރޫޕުގެ ލީޑަރު އަދި އިނގުރައިދޫ ދާއިރާގެ މެންބަރު، އިބްރާހީމް ފަލާހު ވިދާޅުވީ މި ސަރުކާރުން ނުހައްގުން އެއްވެސް މުވައްޒަފަކު ވަޒީފާއިން ވަކިނުކުރާނެ ކަމަށެވެ. ނަމަވެސް، ހަގީގަތް އޮތީ މުޅިން ތަފާތުކޮށެވެ. ހަރަދު ކުޑަކުރުމުގެ ނަމުގައި ސަރުކާރުގެ ކުންފުނިތަކުގައި މަސައްކަތް ކުރާ އާދައިގެ އެތައް މުވައްޒަފުންނެއް ވަޒީފާއިން ވަކިކުރަމުންދާއިރު، ސިޔާސީ މަގާމުތަކަށް އައްޔަންކުރާ މުވައްޒަފުންގެ އަދަދު ދަނީ ދުވަހެއް ދުވަހަކަށް އިތުރުވަމުންނެވެ. އެހެންކަމުން، ފަލާހު މި ދައްކަވާ ވާހަކައަކީ ރައްޔިތުންގެ ލޮލުގައި އަނދުން އެޅުވުމަށް ދައްކާ، އެއްވެސް އޮއްޓަރެއް ނެތް ޖޯކު ވާހަކައަކަށް ނޫނީ ނުވާ ކަަމަށެވެ.

ސިޔާސީ މުވައްޒަފުންގެ ވާހަކަދައްކާއިރު ފާހަގަކޮށްލަންޖެހޭ ކަމަކީ އޭގެން ކޮންމެ މީހެއްގެ މުސާރައަށް މަހެއްގެ މައްޗަށް 25،000 އާއި 50،000 ރުފިޔާއާއި ދެމެދުގެ މުސާރައެއް ލިބޭ ކަމެވެ. އެހެންކަމުން ހަރަދު ކުޑަކުރުމުގެ ނަމުގައި ކުންފުނިތަކުގައި މަސައްކަތްކުރާ އާދައިގެ މުވައްޒަފުން ވަކިކުރުމަށް ފަހު ސިޔާސީ މަގާމުތަކަށް އައްޔަންކުރާ މީހުންގެ އަދަދު އިތުރުވުމަކީ ސަރުކާރުން ހަރަދު ކުޑަކުރުމުގެ ނިޔަތުގައި ކުރަމުން އަންނަ ކަމެއް ނޫންކަން ސާފުކޮށް ޔަގީންވެ އެވެ.

ދެން އޮތީ އިގްތިސާދީ ވާހަކައެވެ. ފަލާހު ވިދާޅުވީ ޕެންޝަން ފަންޑުން ނުވަތަ ބޭންކްތަކުގައި ސޭވްކޮށްފައި ހުންނަ ފައިސާ ނެގުމަކީ ފައިސާ ޗާޕުކުރުން ކަމަށް ގަބޫލުނުކުރައްވާ ކަމަށެވެ. ނަމަވެސް، މި ދާއިރާގެ އިލްމު ލިބިފައި ތިބި ތަޖުރިބާކާރުން ބުނަމުންދަނީ އެކަމުގެ ސަބަބުން ގައުމުގެ އިގްތިސާދަށް ނޭދެވޭ އަސަރުތަކެއް ކުރާނެ ކަމަށެވެ. އެގޮތުން ތަކެތީގެ އަގު އުފުލި، އާދައިގެ ރައްޔިތުންނަށް ބޮޑެތި ގެއްލުންތަކަކާ ކުރިމަތިލާންޖެހޭނެ ކަމަށެވެ. ނަމަވެސް މަހެއްގެ މައްޗަށް 80،000 އަށްވުރެ ބޮޑު މުސާރައެއް ލިބޭ މަޖިލިސް މެންބަރަކު އެއްވެސް އިލްމެއް އަދި ތަޖުރިބާއެއް ނެތި މިފަދަ ވާހަކައެއް ދެއްކެވުމަކީ ހިނި އަންނަ ފަދަ ޖޯކު ކަމެކެވެ.

20 ވަނަ ރައްޔިތުންގެ މަޖިލީހުގެ މެންބަރުން މިއަދު ފާހަގަކުރެވިގެން ގޮސްފައިވަނީ ސަރުކާރު ޖަވާބުދާރީކުރުވުމުގެ ބަދަލުގައި، ރައީސް މުއިއްޒުގެ ބަސްފުޅުތަކަށް "އާދެ" "ލައްބަ" ކިޔައިގެން ތިބޭ ގޮނޑި ކޮއްކޮތަކެއްގެ ގޮތުގަ އެވެ. ރައީސް މުއިއްޒު ކިތަންމެ ދޯހަޅިކޮށް ކަންތައް ކުރެއްވި ނަމަވެސް، އެމަނިކުފާނަށް ސަނާ ކިޔުމާއި، ސަރުކާރުގެ ކޮންމެ ނިންމުމެއް ދިފާއުކުރުމަކީ މިއަދު އެ މެންބަރުންގެ މައިގަނޑު މަސައްކަތުގެ ގޮތުގައި ކުރަންޖެހިފައިވާ މަސައްކަތެވެ.

ރައްޔިތުން މަޖިލީހަށް މެންބަރުން އިންތިހާބުކުރަނީ ރައްޔިތުންގެ އަޑު އުފުލައި، ސަރުކާރުގެ ދޯހަޅި ސިޔާސަތުތައް އިސްލާހުކުރުމަށް ނަމަވެސް، މިއަދުގެ މަޖިލީހުން ފެނިގެންދަނީ ހަގީގަތާ ހިލާފު ވާހަކަތައް ދައްކައި، ރައްޔިތުންގެ ހިތްތަކުގައި ސަރުކާރާ މެދު އޮތް ކަންބޮޑުވުންތަކަށް މަލާމާތްކުރާ މަންޒަރެވެ. މަޖިލިސް މެންބަރުން ދައްކަވާ ވާހަކަތަކަކީ ހަމައެކަނި މުނިފޫހިފިލުވުމަށް ދައްކާ ޖޯކުތަކަކަށްވުމަކީ ކަންކަން އިސްލާހުކުރުމަށް ފަހަތަށް އެޅިގެންދާ ފިޔަވަޅެއްގެ ގޮތުގައި ނޫނީ ނުވާނެ އެވެ.