ޕީއެންސީ މަޖިލިސް މެންބަރުން ތިއްބެވީ ''އެސްކޭޕް ރޫޓެއް'' އިންތިޒާރުގައި: މެންބަރު އަހުމަދު ދީދީ
10 ޖުލައި 2026 | ހުކުރު 08:29ސަރުކާރުން ވީ އުންމީދުތަކުގައި ކުލަ ނުޖެހުމުގެ ސަބަބުން ޕީއެންސީގެ މަޖިލިސް މެންބަރުން ތިއްބެވީ ވަރަށް ބޮޑު މާޔޫސްކަމެއްގެ ތެރޭގައި ކަމަށް މަރަދޫ ދާއިރާގެ މެންބަރު އަހުމަދު ދީދީ ވިދާޅުވި. އޭނާ ވިދާޅުވީ ތަރައްގީގެ މަޝްރޫއުތައް ހުއްޓިފައިވާތީ ދާއިރާތަކުގެ ރައްޔިތުންގެ ޝަކުވާތަކަށް ދޭނެ ޖަވާބެއް މެންބަރުންގެ އަތުގައި ނެތް ކަމަށާއި، ފުރުސަތެއް ލިބޭއިރަށް ސަރުކާރު މެންބަރުން ވަކިވާން ތައްޔާރަށް ތިބި ކަމަށް. އަދި ވިދާޅުވީ ޕީއެންސީގެ 75 މެންބަރުން މަޖިލީހުގައި ތިއްބަވާއިރު، މަޖިލިސް ޖަލްސާގައި ވާހަކަ ދައްކަވާނީ އަބަދުވެސް 6 ވަރަކަށް މެންބަރުން ކަމަށާއި، މިކަމުން އެކަނި ވެސް މެންބަރުން މިއަދު ތިއްބެވި ހާލަތު ރައްޔިތުންނަށް ވަޒަން ކުރެވޭނެ ކަމަށް.
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވާހަކަ ދައްކަވަނީ. | ރާއްޖެ އެމްވީ
ޕީއެންސީއަށް ނިސްބަތްވާ ރައްޔިތުންގެ މަޖިލީހުގެ މެންބަރުން މިހާރު ތިއްބެވީ އެސްކޭޕް ރޫޓެއްގެ އިންތިޒާރުގައި ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެންބަރު އަހުމަދު ދީދީ ވިދާޅުވީ ސަރުކާރުގެ ޕާޓީ، ޕީއެންސީގެ ރައްޔިތުން މަޖިލީހުގެ ބައެއް މެންބަރުންނަކީ އަމިއްލަ ގޮތުން އިންތިޚާބުވުމަށްފަހު ޕީއެންސީއާ ގުޅުނު މެންބަރުން ކަމަށާއި، އެ މެންބަރުން ސަރުކާރާއެކު މަސައްކަތް ފެށީ ވަރަށް އުންމީދާއެކު ކަމަށެވެ.
ނަމަވެސް ސަރުކާރަށް ދެ އަހަރާއި ބައި ވެގެންދިޔައިރު ޕީއެންސީގެ މަޖިލިސް މެންބަރުންނަށް ދިން އެއްވެސް އުންމީދެއްގައި ކުލައެއް ނުޖެހުމުން މިހާރު އެ ހުރިހާ މެންބަރުން ވެސް ތިއްބެވީ ވަރަށް ބޮޑު މާޔޫސް ކަމެއްގައި ކަމަށް މެންބަރު އަހުމަދު ދީދީ ވިދާޅުވި އެވެ. އަދި ވިދާޅުވީ ދާއިރާތަކުގެ ރައްޔިތުން ކުރަމުންދާ ޝަކުވާއަށް ދޭނެ ޖަވާބެއް ވެސް ނެތް ކަމަށެވެ.
އެންމެފަހުން ބޭއްވި ލޯކަލް ކައުންސިލް އިންތިޚާބުގެ ކެންޕޭން ދުވަސްވަރަށް އިޝާރާތް ކުރައްވައި މެންބަރު އަހުމަދު ދީދީ ވިދާޅުވީ އެދުވަސްވަރު ރަށްރަށަށް ކުރި ދަތުރުތަކުގައި ޕީއެންސީގެ މެންބަރުން ތަމްސީލު ކުރާ ދާއިރާތަކުގެ ރައްޔިތުން ތިބި ގޮތް ވަރަށް ރަނގަޅަށް ހާމަވެފައިވާ ކަމަށެވެ.
މެންބަރުން ތިބީ ވަރަށް މާޔޫސްކަމެއްގެ ތެރޭގައި. އެ ބޭފުޅުންވެސް އެ ތިބެނީ އެކުގައި އެސްކޭޕް ރޫޓެއް ނުފެނިގެން ހަމަ ފެންނަ އިރަށް އަޅުގަނޑަށް ފެންނަނީ ހަމަ ދާނެހެން. ހަގީގަތަކީ އެ ބޭފުޅުންވެސް ވަރަށް އުއްމީދުގައި އައީ. އައިސްގެން ރައީސުލްޖުމްހޫރިއްޔާ ވިދާޅުވި ގޮތަކަށް، ކޮންމެ ގޮތަކަށް ކަންތައް ކުރަމުންގެންދިޔައީ. އެ ދެމުންގެންދިޔަ އުއްމީދަކީ މި އަހަރު ނޫން އަނެއް އަހަރު. 2024 ގައި ދިން އުންމީދަކީ 2023 ގައި އެމްޑީޕީގެ ބަޖެޓެކޭ އެހެންވީމާ އެކަން ނުވިއޭ. އެ ތިމަންނަމެން އައިސް އެ ރާއްޖޭން ބޭރުން ފައިސާ ވެސް ގެންނާނަމޭ. ގްރީން ސިގްނަލްތައް އެބަ ހުއްޓޭ. އެހެންވީމާ، މެންބަރުން ހާސް ނުވާށޭ. މެންބަރުންގެ ދާއިރާތަކަށް ހުރިހާ ކަމެއް ވާނެ.ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަހުމަދު ދީދީ
މެންބަރު އަހުމަދު ދީދީ ވިދާޅުވީ ވަރަށް އުންމީދުގައި ރައީސް ޑރ.މުހައްމަދު މުއިއްޒު އާއި ޕީއެންސީ މެންބަރުން މަޖިލީހަށް އިންތިޚާބު ކުރި ނަމަވެސް މިއަދު އެ ރައްޔިތުން ތިބީ މަޝްރޫއުތައް ކުރިއަށް ނުގެންދާތީ އާއި ކުރީ ސަރުކާރުގައި ފަށާފައިވާ މަޝްރޫއުތައް ހުއްޓި، ހަލާކުވަމުންދާތީ އެކަމުގެ ކަންބޮޑުވުމުގައި ކަމަށެވެ. އަދި މި ސަރުކާރަކީ ރައްޔިތުންގެ ފައިސާ ވަރަށް ބޮޑަށް އިސްރާފު ކުރަމުންދާ ސަރުކާރެއް ކަމަށް ރައްޔިތުން މިއަދު ގަބޫލުކުރާ ކަމަށް މެންބަރު އަހުމަދު ދީދީ ވިދާޅުވި އެވެ.
މީގެ އިތުރުން މެންބަރު އަހުމަދު ދީދީ ވިދާޅުވީ ޕީއެންސީގެ 75 މެންބަރުން މަޖިލީހުގައި ތިއްބަވާއިރު، މަޖިލިސް ޖަލްސާގައި ވާހަކަ ދައްކަވާނީ އަބަދުވެސް 6 ވަރަކަށް މެންބަރުން ކަމަށާއި، އެހެން މެންބަރުން ގެ ބަހެއް އަޑު ނީވޭނެ ކަމަށެވެ. އެބޭފުޅުންނަށް 3 ގަޑިއިރު ނުވަތަ 1 ގަޑިއިރު ލިބުނު ނަމަވެސް އެ މެންބަރުންގެ ބައިވެރިވުމެއް ނެތް ކަމަށް މެންބަރު އަހުމަދު ދީދީ ވިދާޅުވި އެވެ. އަދި މިކަމުން އެކަނި ވެސް މެންބަރުން މިއަދު ތިއްބެވި ހާލަތު ރައްޔިތުންނަށް ވަޒަން ކުރެވޭނެ ކަމަށް އޭނާ ވިދާޅުވި އެވެ.
