ހުޅުމާލޭގެ ރައްޔިތުން ތިބީ ކުނި ނެރެވޭނެ ގޮތެއް ނެތި ކޮޓަރިތަކުގައި ކުނި ޖަމާކޮށްގެން: ޝަމްހީދު

މިއަދު މި ގައުމު ގޮސްފައިވާ ހާލަތީ ދަށް ހާލަތެއް ކަމަށާއި ކުނި މެނޭޖު ކުރުމަށް ވެސް ސަރުކާރު ފެއިލްވެފައިވާއިރު ހުޅުމާލެ ރައްޔިތުން މިއަދު ތިބީ ކުނި ބޭރުކުރެވޭނެ އެއްވެސް ގޮތެއް ނެތި، ކޮޓަރިތަކުގައި ކުނި ޖަމާކޮށްގެން ކަމަށް ރައްޔިތުންގެ މަޖިލީހުގެ ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު ވިދާޅުވެއްޖެ އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ސަރުކާރުގެ ފަރާތުން، ވިލުފުށި ދާއިރާގެ މެންބަރު ހަސަން ވަހީދު ހުށަހަޅުއްވާފައިވާ ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނަށް އިސްލާހު ގެނައުމުގެ ބިލަށް ވަނީ ބަހުސް ކޮށްފަ އެވެ. އެ ބިލަށް ބަހުސް ކުރައްވަމުން ޝަމްހީދު ވިދާޅުވީ ޔުޓިލިޓީ ރެގިއުލޭޓަރީ ވަނީ ބޮޑުތަނުން ފެއިލްވެފައި ކަމަށެވެ. 

އެގޮތުން ސްޓެލްކޯ އަކީ މިއަދު ބޮޑު އަދަދުތަކުން ފައިދާ ނަގަމުންދާ ކުންފުންޏެއް ކަމަށާއި، ފާއިތުވި ދެ އަހަރު ރައްޔިތުން ކެނޑިނޭޅި ކުރަމުން ދިޔަ ޝަކުވާ އަކީ އެއްވެސް ހަމައެއް ނެތި ކަރަންޓް ބިލުތައް އިންތިހާ އަށް ބޮޑުވާތީ އެކަމުގެ ކަންބޮޑުވުން ފާޅުކޮށް ކުރަމުންދިޔަ ޝަކުވާ ކަމަށެވެ. 

ޝަމްހީދު ވަނީ ރައްޔިތުންނަށް އަސާސީ ޚިދުމަތެއް ދޭ ސްޓެލްކޯ އިން ރައްޔިތުންގެ އަތުން އިތުރަށް ފައިސާ ނަގައި، ސަރުކާރަށް އެންމެ ބޮޑު ފައިދާ ހޯދައިދޭ ކުންފުންޏަކަށް ވެފައިވާއިރު މިކަން މި ގޮތަށް ހިނގަނީ ކޮން ގައުމެއްގައި ތޯ ވިދާޅުވެ އެކަމާމެދު ސުވާލު އުފައްދަވާފަ އެވެ. އަދި އެތައް ފަހަރެއްގެ މަތިން ކަރަންޓު ބިލުތައް ސަބަބެއް ނޭނގި ބޮޑުވަމުންދާ މައްސަލައާއި މާލެ ފިޔަވައި އެހެން ސަރަހައްދުތަކުގައި ހަރަކާތްތެރިވާ ކުދި އަދި މެދު ފަންތީގެ ވިޔަފާރިތަކުން ބޭނުންކުރާ ކަރަންޓާއި ފެނުގެ ޚިދުމަތަށް ބޮޑު އަގެއް ހޭދަ ކުރަން ޖެހިފައިވާތީ އެކަމުގެ މައްސަލަ ހުށަހެޅުމުން ވެސް އެދެވޭ ހައްލެއް ލިބިފައިނުވާ ކަން މެންބަރު ފާހަގަ ކުރެއްވި އެވެ. 

ޔުޓިލިޓީ ރެގިއުލޭޓަރީ އޮތޯރިޓީ ފެއިލްވެފައިވާއިރު، މުޅި ދައުލަތް ވެސް ފެއިލް ވެފައިވާ ކަމަށާއި އެކަމުގެ އެންމެ ބޮޑު އެއް ހެތްކަކީ ކުނި ގޮނޑެއްގައި އަލިފާންގަނޑެއް ރޯވުމުން ކުނި މެނޭޖު ކުރެވޭނެ ގޮތެއް ނޭންގޭ ހާލަތަށް ގައުމުގެ ކަންކަން ދިއުން ކަމަށް ވެސް ޝަމްހީދު ވިދާޅުވި އެވެ. 

މިއަދު އަޅުގަނޑުމެންނަށް ފެނިގެން މި ދަނީ ހުޅުމާލޭގައި އެތިބީ ގޭއްގޭގެ ކޮޓަރިތަކުގައި ކުނި ޖަމާކޮށްގެން. ކުނި ބޭރުކުރެވޭނެ އެއްވެސް ގޮތެއް ނެތް. މިއެއް ނޫންތޯ ނިޒާމެއް ފެއިލް ވުމަކީ. ކޮޓަރީގެ ހުރި ކުނިތައް ނެރޭނެ އެއްވެސް ގޮތެއް ނެތް. މިއީ ގައުމުގެ ހާލަތު. ދިވެހިރާއްޖޭގެ ވެރިކަމެއްގެ ތެރޭގައި ދުނިޔޭގެ އެންމެ ބޮޑު އާލަމީ އެއް ވަބާ، ކޮވިޑް ވެސް އައިސްފި. މެނޭޖް ކުރި. މިއުޅެނީ ކުނި ގޮނޑެއްގަ ރޯވީމާ، މިކަން މެނޭޖު ނުކުރެވިގެން. 

އަހްމަދު ޝަމްހީދު

ޖުލައި މަހުގެ 19 ވަނަ ދުވަހުގެ އިރާކޮޅު ތިލަފުށީ ކުނި މެނޭޖުކުރާ ސައިޓުގައި ހިނގި އަލިފާނުގެ ހާދިސާއާ ގުޅިގެން މާލޭގެ މަގުތަކާއި މައިޒާންތަކުގައި ކުނި ގިނަވަމުންދާ މައްސަލަ ވަނީ ބޮޑުވެފަ އެވެ. 

މިކަމާ ގުޅިގެން މާލޭ ސިޓީ ކައުންސިލްގެ 11 ކައުންސިލަރަކު ވަނީ ވެމްކޯ އާ ވެސް ބައްދަލުކޮށްފަ އެވެ. މި ބައްދަލުވުމުގައި ކައުންސިލަރުން ވަނީ މާލޭގެ މަގުތަކުން ނަގާ ކުނިތަކާއި، ޕާކުތަކާއި މައިޒާންތަކުގައި އުފެދޭ ކުނި އުކާލެވޭނެ ދާއިމީ ނިޒާމެއް މި ވަގުތު ނެތުމުން ހުރި ގޮންޖެހުންތައް ހިއްސާކުރައްވާފަ އެވެ. މިހާރު ކުނި އަޅަން ބޭނުންކުރާ ސަރަހައްދު ފުރިފައިވާ ކަމަށާއި، ތިލަފުއްޓަށް ކުނި ނުގެންދެވޭތާ މިހާރު 10 ވަރަކަށް ދުވަސް ވެފައިވާ ކަމަށް ކައުންސިލުން ފާހަގަކޮށްފައިވެ އެވެ. 

ވެމްކޯ އިން ބުނެފައި ވަނީ ތިލަފުށީ ސައިޓުގައި ހިނގި އަލިފާނުގެ ހާދިސާގެ ސަބަބުން އެ ސައިޓުގެ ބައެއް ސަރަހައްދުތައް ބަންދުކުރަން ޖެހުމުން، މާލެ، ވިލިމާލެ އަދި ހުޅުމާލޭގެ ޓްރާންސްފަރ ފެސިލިޓީތަކުގެ އޮޕަރޭޝަންތަކަށް ބުރޫއަރައިފައިވާ ކަމަށެވެ. މީގެ ސަބަބުން ދުވަހުން ދުވަހަށް ދެމުން އަންނަ ކުނިއުކުމުގެ ޚަދުމަތްތަކަށް ހުރަސްތަކެއް ކުރިމަތިވެފައިވާ ކަމަށް ވެސް ވެމްކޯ އިން ބުނެ އެވެ.