ވަޒީރުން ޖަވާބު ނުދެއްވުމުން އެކަމާއި އުފާފާޅުކޮށް މެންބަރުން އަތް ޖައްސަވާ، މިއީ މަޖިލީހެއްގެ ހަޔާތުގައި ލަދުގަންނަން ޖެހޭ ކަންކަން: މެންބަރު ޒިޔާދު

ރައްޔިތުންނާ ގުޅުންހުރި މުހިންމު ކަންކަމުގައި ވަޒީރުން ޖަވާބު ނުދެއްވުމުން އެކަމާއި އުފާފާޅުކޮށް ޕީއެންސީގެ ރައްޔިތުން މަޖިލިސް މެންބަރުން އަތް ޖައްސަވާ ކަމަށާއި، މިއީ މަޖިލީހެއްގެ ހަޔާތުގައި ލަދުގަންނަން ޖެހޭ ކަންކަން ކަމަށް ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެ އެވެ.

ބުދަ ދުވަހު އެމްޑީޕީގެ ޕާލިމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މެންބަރު ޒިޔާދު ވިދާޅުވީ، ހެލްތު މިނިސްޓަރު ގީލާ އަލީ ރައްޔިތުންނާ ގުޅުންހުރި މުހިންމު ސުވާލުތަކަށް ޖަވާބު ނުދެއްވާ ކަމަށާއި، ނަމަވެސް 2018 އިން 2023 ށް ހިނގާފައިވާ ކަންކަމާ ގުޅޭގޮތުން ވަރަށް ފަރިތަކޮށް ޖަވާބު ދެއްވި ކަމަށެވެ.

މިއީ ރޭވިގެން ކުރާ ކަމެއްކަން ފާހަގަކުރައްވައި މެންބަރު ޒިޔާދު ވިދާޅުވީ ސުވާލު ކުރުމަށް ލިބެނީ 30 މިނެޓު ކަމަށާއި، މިއީ ވަގުތު ނަގާލުމަށް ކުރާ ކަމެއް ކަމަށެވެ. މެންބަރު ޒިޔާދު ވިދާޅުވީ ރައްޔިތުންނާ ގުޅުންހުރި މުހިންމު ސުވާލުތަކަށް ޖަވާބު ނުދެއްވާ މައްސަލަ ބޮޑުވި ނަމަވެސް އެކަމާ އުފާފާޅުކޮށް ޕީއެންސީގެ މަޖިލިސް މެންބަރު އަތް ޖައްސަވާ ކަމަށާއި، މިއީ ހިތާމަ ހުރި ކަމެއް ކަމަށެވެ. އަދި މިއީ މަޖިލީހެއްގެ ހަޔާތުގައި ލަދު ގަންނަން ޖެހޭ ކަންކަން ކަމަށް އޭނާ ވިދާޅުވި އެވެ.

މީގެ އިތުރުން މެންބަރު ޒިޔާދު ވަނީ މީގެ ދެ އަހަރު ކުރިން ޑިފެންސް މިނިސްޓަރާ ކުރި ސުވާލަށް ވެސް ޖަވާބު ލިބިފައިވާނުވާތީ އެކަމުގެ ކަންބޮޑުވުން ފާޅު ކުރައްވާފަ އެވެ. 

މިނިސްޓަރު އިސްތިއުފާ ދެއްވީމާ މި ވަގުތު ހުރީ އެހެން މިނިސްޓަރެކޭ. އަލުން ބޭނުންފުޅު ނަމަ ތިސުވާލު ކުރާށޭ. އަޅުގަނޑު ސުވާލު ވަރަށް ސާފު. ވަރަށް ކުރު. އިންޑީއާއެކު ހެދިފައި ހުރި އެގްރިމެންޓުތަކުގައި ދިވެހިރާއްޖޭގެ ސިޔާދަތާއި ނުރައްކާވާ ކަހަލަ މާއްދާއެއް އެބައޮތްތޯ. އެސް އޯ ނޯ ސުވާލެއް މިއީ. ދެ އަހަރު ފަހުން އެ ވިދާޅުވި ވަޒީރު ބަދަލު ވެއްޖޭ. އަނެއްކާ ސުވާލު ކުރާށޭ. ދެން ފިނޭންސް މިނިސްޓްރީއަށް އަޅުގަނޑުމެން މި ސުވާލުކުރަނީ 115 ވަނަ މާއްދާއިން ރައީސުލްޖުމްހޫރިއްޔާ އައްޔަންކޮށްފައި ތިބި މީހުންނަށް މުސާރައޭ ކިހާވަރެއް އަހަރަކު ހޭދަވޭހޭ. 115 ވަނަ މާއްދާއިން. މިއީ ވަރަށް ސާފު. 115 ވަނަ މާއްދާއަކަށް ނުނެގޭނެ ފެނެކައަކަށް މީހުންނެއް. އެޗްޑީސީއަކަށް މީހުން ނުނަގާނެ. 115 ވަނަ މާއްދާއިން މީހުން އައްޔަން ކުރާނީ ރައީސުލްޖުމްހޫރިއްޔާގެ އޮފީހުން. ރައީސުލްޖުމްހޫރިއްޔާ އޮފީހަށް ހަމަ އެހުރިހާ މައުލޫމާތެއް ރަނގަޅަށް އިނގޭނެ. ފިނޭންސް މިނިސްޓަރަށް އަޅުގަނޑުމެންގެ ސުވާލުކޮށްފިން. ވަޒީރަކަށް އެ ޖަވާބެއް ނުދިން.

ރައްޔިތުންގެ މަޖިލީހުގެ ވައިކަރަދޫ ދާއިރާގެ މެންބަރު ހުސައިން ޒިޔާދު 

މި ނޫސްވެރިންގެ ބައްދަލުވުމުގައި ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ވެސް ވަނީ މަޖިލިސް ކުރިއަށްދާ ގޮތާ ގުޅިގެން ކަންބޮޑުވުން ފާޅު ކުރައްވާފަ އެވެ. 

މެންބަރު ޝަމްހީދު ވިދާޅުވީ އެންމެ ބޮޑު ކަންބޮޑުވުމަކީ މިހާރު މަޖިލިސް ކުރިއަށް ދާގޮތް ކަމަށާއި ކުރާނެ މަސައްކަތެއް ނެތުމުން އެންމެ އިސްލާހެއް ހަފްތާއެއް ވަންދެން ދިގު ދަންމަން ޖެހޭ ކަމަށެވެ. އަދި ކޮމިޓީތަކުގައި މިހާރު މަހަކު އާންމުކޮށް ހޭދަ ކުރަނީ 15 މިނެޓް ކަމަށް ވެސް މެންބަރު ޝަމްހީދު ވިދާޅުވި އެވެ. 

މިހާރު މަޖިލީހުގައި ހަމައެކަނި އޮތީ އެމަންޑްމެންޓެއް ކުންޔާއި ބެހޭ ގޮތުން އައިސަ އިން، އެ އިސްލާހަށް މިއަދު އެންމެ ބޭފުޅަކަށް ފުރުސަތު ލިބުނީ ބަހުސް ކޮށްލަން، އެއީ ކުރާނެ އިތުކަމެއް ނެތީމަ ހަމަ މިޖެހެނީ ހަމަ އެންމެ އެމަންޑްމެންޓެއް އަޅުގަނޑުމެން މި ހަފްތާގައި ތަޅުވަން

ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު

މިއަދު ވެސް މާލިއްޔަތު ކޮމިޓީ ޖަލްސާއެއް އެޖެންޑާކުރި ކަމަށާއި އެޖެންޑާ ގަޑި ޖެހުނުއިރު ޖަލްސާ ކެންސަލް ކޮށްފައިވާ ކަމަށް މެންބަރު ޝަމްހީދު ވިދާޅުވި އެވެ. އަދި ވަޒީރުން މަޖިލީހަށް އައިސްފައި އަމަލުކުރާގޮތާއި މެދު ކަންބޮޑުވާ ކަމަށާއި ސަރުކާރުން ޖަވާބުދާރީ ކުރަން ކުރަންޖެހޭ އެއްވެސް މަސައްކަތެއް ނުކުރާކަމަށް މެންބަރު ޝަމްހީދު ވިދާޅުވި އެވެ.