ހޮނިހިރު ދުވަހު ނަތަންޔާހޫ އެމެރިކާ އަށް ވަޑައިގަންނަވަނީ

އިސްރާއީލްގެ ބޮޑު ވަޒީރު ބެންޖާމިން ނަތަންޔާހޫ ހޮނިހިރު ދުވަހު އެމެރިކާ އަށް ވަޑައިގަންނަވާނެ ކަމަށް، އެ ޤައުމުގެ ސަރުކާރުގެ އިސް އޮފިޝަލަކު ވިދާޅުވެއްޖެ އެވެ. 

ރޮއިޓާސް އަށް މައުލޫމާތު ދެއްވަމުން އިސްރާއީލް ސަރުކާރުގެ އިސް އޮފިޝަލަކު ވިދާޅުވީ، އެމެރިކާ އަށް ކުރައްވާ ދަތުރުފުޅުގައި އެ ޤައުމުގެ ރައީސް ޑޮނަލްޑް ޓްރަމްޕްއާ ބައްދަލު ކުރައްވަން ނަތަންޔާހޫ ބޭނުންފުޅުވި ނަމަވެސް، އެފަދަ ބައްދަލުވުމެއް ބޭއްވޭނެކަން ނުވަތަ ނޫންކަން މިހާތަނަށް ކަށަވަރުވެފައި ނުވާ ކަމަށެވެ. 

ނަތަންޔާހޫ އެމެރިކާ އަށް ކުރައްވާ މި ދަތުރުފުޅުގެ ޚަބަރު ފެންމަތިވެފައި މިވަނީ، އީރާން އިން އިސްރާއީލަށް އައު ހަމަލާއެއް ދީފި ނަމަ ވަރުގަދަ ރައްދު ހަމަލާއެއް ދޭނެ ކަމުގެ އިންޒާރު އޭނާ ދެއްވާފައިވާ ދަނޑިވަޅެއްގައި އެވެ. ޑިމޯނާގައި ބޭއްވި ކޮންފަރެންސެއްގައި ވާހަކަ ދައްކަވަމުން ނަތަންޔާހޫ ވިދާޅުވީ، އިސްރާއީލަށް ހަމަލާ ދީފައި، މަޑުން ތިބެވޭނެ ކަމަށް އީރާންގެ ވެރިން ހީކޮށްގެން ނުވާނެ ކަމަށެވެ.

އިސްރާއީލަށް ހަމަލާއެއް ދިނުމުން އެއަށް ރައްދު ނުދީ ތިބި ދުވަސްތައް މިހާރު މާޒީ ވެފައިވާ ކަމަށާއި، ދެން ދޭ ހަމަލާތައް ވާނީ ވަރަށް ވަރުގަދަ އަދި ނިންމުން ތަކެއް ނިންމާނެ ފަދަ ހަމަލާ ތަކަކަށް ކަމަށް ނަތަންޔާހޫ ވިދާޅުވި އެވެ. އޭނާ އިތުރަށް ވިދާޅުވީ، މިއަހަރުގެ ކުރީ ކޮޅު އެމެރިކާއާ ގުޅިގެން އީރާން އަށް ދިން ހަމަލާތަކަށް ވުރެ، ކުރިއަށް އޮތް ތަނުގައި ދޭނެ ހަމަލާތައް މާ ވަރުގަދަ ވާނެ ކަމަށެވެ.

އީރާން އަށް ކުރިން ދިން ހަމަލާތަކަށް އިޝާރާތް ކުރައްވައި ނަތަންޔާހޫގެ އޮފީހުން އާންމުކުރި ވީޑިއޯއެއްގައި އޭނާ ވިދާޅުވީ، ކުރިން ދިން ހަމަލާތައް ތަކުރާރު ވާނެ ކަމަށް އުންމީދު ނުކުރާ ކަމަށެވެ. އަދި ކުރިން ދިން ހަމަލާ ތަކަކީ ވެސް ވަރުގަދަ ހަމަލާ ތަކެއް ކަމަށާއި، ދެން ދޭ ހަމަލާ ވާނީ މުޅިން ތަފާތު އަދި އެއަށް ވުރެ މާ ނުރައްކާތެރި ހަމަލާ އަކަށް ކަމަށް އޭނާ ވިދާޅުވި އެވެ.

ނަތަންޔާހޫ އީރާން އަށް މިފަދަ ވަރުގަދަ އިންޒާރު ތަކެއް ދެއްވާފައި މި ވަނީ، އެމެރިކާާ އިން އީރާންގެ ބައެއް އަމާޒު ތަކަށް އައު ހަމަލާ ތަކެއް ދެމުން އަންނަ ވަގުތެއްގައި އެވެ. ޓްރަމްޕްގެ ރިޔާސީ ދެ ވަނަ ދައުރުގައި އެންމެ ގިނައިން އެމެރިކާާ އަށް ވަޑައިގެންނެވި ލީޑަރަކީ ނަތަންޔާހޫ އެވެ.