ދުނިޔޭގެ ފުޓްބޯޅަ މުބާރާތުގެ ފައިނަލް މެޗުގެ ހާފް-ޓައިމްގައި، މެޑޯނާ، ބީޓީއެސް، ޝަކީރާ އަދި ޖަސްޓިން ބީބަރ ފަދަ މަޝްހޫރު ތަރިންގެ ވިދުވަރުން ދިއްލާލައިފި

ދުނިޔޭގެ ފުޓްބޯޅަ މުބާރާތުގެ ފައިނަލް މެޗުގެ ހާފް-ޓައިމްގައި، މަޝްހޫރު ލަވަކިޔުންތެރިން ކަމަށްވާ މެޑޯނާ، ބީޓީއެސް، ޝަކީރާ އަދި ޖަސްޓިން ބީބަރ ފޯރިގަދަ ހުށަހެޅުންތަކެއް ދައްކާލައިފި އެވެ. އެމެރިކާގެ ސުޕަރބޯލްގެ ހުށަހެޅުންތަކާ ވާދަކުރާ ފެންވަރަށް ތައްޔާރުކޮށްފައިވާ މި ޝޯ ބަލާލުމަށް އެތައް ހާސް ބަޔަކު ދަނޑަށް ޖަމާވި އެވެ.

މި ޝޯގައި މެޑޯނާ އޭނާގެ މަޝްހޫރު ލަވަ "މިއުޒިކް" ހުށަހަޅައިދީފައިވަނީ ދަނޑުގެ އަޑީގައިވާ ޓަނަލްތަކުން އަރައިގެން އަންނަ ފަދަ ގޮތަކަށެވެ. އޭނާއާއެކު ބްރެޒިލްގެ ފުޓްބޯޅަ ލެޖެންޑުން ކަމަށްވާ ރޮނާލްޑޯ އަދި ރޮނާލްޑީނިއޯ ވެސް ވަނީ ބައިވެރިވެފަ އެވެ.

މަޑޯނާގެ ދެފަރާތުގައި ބްރެޒިލްގެ މަޝްހޫރު ފުޓްބޯޅަ ލެޖެންޑުން ކަމަށްވާ ރޮނާލްޑީނިއޯ އާއި ރޮނާލްޑޯ ފެނިގެން ދިޔަ | ގެޓީ އިމޭޖަސް

މި ފަހަރުގެ ހާފް-ޓައިމް ޝޯ ކުރިއަށްދިޔައީ 27 މިނެޓާއި 22 ސިކުންތަށެވެ. މިއީ ދުނިޔޭގެ ފުޓްބޯޅަ މުބާރާތުގެ ތާރީޚުގައި ވެސް އެންމެ ދިގު ހާފް-ޓައިމް މެދުކެނޑުމެވެ.

ޖަސްޓިން ބީބަރގެ ހުށަހެޅުމުގައި އޭނާ ވަނީ ގިޓާ ގެ ޕާފޯމަންސެއް ހަދާފައި | ގެޓީ އިމޭޖަސް

ހާފް-ޓައިމް މިހާ ބޮޑަށް ދިގުލައިގެން ދިއުމާ ގުޅިގެން ބައެއް ފާޑުކިޔުންތައް ވަނީ އަމާޒުވެފަ އެވެ. ސަބަބަކީ އިންޓަނޭޝަނަލް ފުޓްބޯލް އެސޯސިއޭޝަން ބޯޑު (އައިފެބް) ގެ ގަވާއިދު ބުނާގޮތުން، ކުޅުންތެރިންނަށް މެދުކެނޑުމުގެ ގޮތުގައި ލިބިދެވޭނީ އެންމެ ގިނަވެގެން 15 މިނެޓެވެ.

ކޮލަމްބިއާގެ މަޝްހޫރު ލަވަކިޔުންތެރިޔާ ޝަކީރާ އާއި ނައިޖީރިއާގެ މިއުޒީޝަން ބާނާ ބޯއި ވަނީ އަލުން އެކުގައި ސްޓޭޖުން ފެނިގެން ގޮސްފަ އެވެ. މި ދެ ފަންނާނުން ވަނީ މިދިޔަ މަހު މެކްސިކޯ ސިޓީގައި ބޭއްވި މި މުބާރާތް ހުޅުވުމުގެ ރަސްމިއްޔާތުގައި ވެސް އެކުގައި ހުށަހެޅުންތަކެއް ދައްކާލާފަ އެވެ.

ކޮލަމްބިއާގެ މަޝްހޫރު ލަވަކިޔުންތެރިޔާ ޝަކީރާ އާއި ނައިޖީރިއާގެ މިއުޒިކީ ފަންނާނު ބާނާ ބޯއީ، އެކުގައި ހުށަހަޅައިދިން ޕާފޯމަންސްގެ މަންޒަރެއް | ގެޓީ އިމޭޖަސް

ކޭ-ޕޮޕްގެ މަޝްހޫރު ބޭންޑް ބީޓީއެސް މި ޝޯގައި ބައިވެރިވެފައިވަނީ، ދެކުނު ކޮރެއާގެ ގާނޫނު ބުނާގޮތުން އަދާކުރަންޖެހޭ އަސްކަރީ ޚިދުމަތް ފުރިހަމަކުރުމަށްޓަކައި މިއުޒިކާ ތިން އަހަރު ދުވަހު ދުރުގައި ތިބުމަށްފަހު، އަލުން އެނބުރި އައިސް ހުށަހެޅި ފުރަތަމަ ހުށަހެޅުމުގެ ގޮތުގަ އެވެ.

ދެކުނު ކޮރެއާގެ މަޝްހޫރު ކޭ-ޕޮޕް ބޭންޑް، ބީޓީއެސް | ގެޓީ އިމޭޖަސް

މި މެޗު ބަލާލުމަށް ގިނަ އަދަދެއްގެ މަޝްހޫރު ފަރާތްތަކެއް ދަނޑަށް ހާޒިރުވި އެވެ. އޭގެ ތެރޭގައި ކައިލީ ޖެނާ އާއި އޭނާގެ ލޯބިވެރިޔާ ޓިމޮތީ ޝަލަމޭގެ އިތުރުން، ބިޔޯންސޭ އާއި ޖޭ-ޒީ ހިމެނެ އެވެ.

ޓިމޮތީ ޝަލަމޭ އަދި ކައިލީ ޖެނާ | ގެޓީ އިމޭޖަސް

ޖޭ-ޒީ އަދި ބިޔޯންސޭ | ގެޓީ އިމޭޖަސް

މެޗު ފެށުމުގެ ކުރިން ބޭއްވި މުބާރާތް ނިންމުމުގެ ރަސްމިއްޔާތުގައި ޖެނިފާ ހަޑްސަން ގައުމީ ސަލާމް ކިޔައިދީފައިވާއިރު، މަޝްހޫރު އެކްޓަރު ޓޮމް ކްރޫޒް ވަނީ ޚާއްސަ ވާހަކަކޮޅެއް ދައްކާފަ އެވެ.

ދުނިޔޭގެ މަޝްހޫރު ފިލްމީ ތަރި ޓޮމް ކްރޫޒް ވަނީ، ފުޓްބޯޅައަކީ މީހުން އެއްބައިވަންތަކުރުވުމުގެ ބާރު ލިބިގެންވާ ކުޅިވަރެއްގެ ގޮތުގައި ސިފަކޮށް އެކަމާ ގުޅޭގޮތުން ވާހަކަދައްކާފައި | ގެޓީ އިމޭޖަސް

ނިއު ޔޯކް ނިއު ޖާޒީ ސްޓޭޑިއަމްގައި ބޭއްވި މި ހަރަކާތްތައް ފެށުމުގެ ގޮތުން، މަޝްހޫރު ސްޓްރީމަރު އައިޝޯސްޕީޑް ވަނީ ނެށުންތެރިންނާއެކު ދަނޑުމަތިން ފެނިގެން ގޮސްފަ އެވެ.

މީގެ އިތުރުން ނިކޯލް ޝާޒިންގާ، ރޮބީ ވިލިއަމްސް އަދި އިޓަލީގެ ލަވަކިޔުންތެރިޔާ ލޯރާ ޕައުސީނީ އެކުގައި ހުށަހެޅުންތަކެއް ދެއްކިއިރު، ރެޕަރ އަދި ލަވަކިޔުންތެރިޔާ ޕޯސްޓް މެލޯން ވަނީ އޭނާގެ މަޝްހޫރު ލަވަ "ވާއު" ހުށަހަޅައިދީފަ އެވެ.

މެޗުގެ ކުޅުން ފެށުމުގެ ކުރިން، ގިނަ އެވޯޑްތަކެއް ހާސިލްކޮށްފައިވާ ލަވަކިޔުންތެރިޔާ އަދި އެކްޓަރު ޖެނިފާ ހަޑްސަން ވަނީ ލައިވް ބޭންޑަކާއެކު އެމެރިކާގެ ގައުމީ ސަލާމް ހުށަހަޅައިދީފަ އެވެ.

މި ހުށަހެޅުންތަކަށްފަހު، ޓޮމް ކްރޫޒް ސްޓޭޖަށް އަރައި މެޗު ތައާރަފްކޮށްދިނެވެ.

"ދުނިޔޭގެ ކޮންމެ ކަނަކުން ވެސް އަހަރެމެންނަށް ފެނިގެން މިދަނީ މޮޅު ހުނަރުވެރިކަން، އަދި އަހަރެމެން މިދަނީ އުފާވެރި ވަގުތުތަކެއް ހިއްސާކުރަމުން،" އޭނާ އެއްވެފައިވާ މީހުންނާ މުޚާތަބުކޮށް ބުންޏެވެ. "ފުޓްބޯޅައަކީ ބަހަކާ ނުލައި ވާހަކަދައްކާ ބަހެއް، އެއީ މީހުން އެއްބައިކުރުވާ ބާރެއް."

ނަމަވެސް، ހާފް-ޓައިމްގައި ދެއްކި މި ހުށަހެޅުންތަކާ މެދު ހުރިހާ އެންމެން ހިތްހަމައެއް ނުޖެހެ އެވެ. ބައެއް ފަރާތްތަކުން ވަނީ ފުޓްބޯޅަ އާއި މިފަދަ ޝޯވ އަކާ ގުޅުމެއް ނެތް ކަމަށް ބުނެފަ އެވެ.