ސައުދީން ޔަމަނަށް ހަމަލާދީފި، ހޫޘީން ބުނަނީ ބޮޑު އަގަކުން އަގުދައްކަން ޖެހޭނެ ކަމަށް

އެމެރިކާއާއި އީރާނާ ދެމެދު ސަރަހައްދީ ހަނގުރާމައެއް ހިނގަމުންދާ ދަނޑިވަޅެއްގައި، ޔަމަނުގެ ހޫޘީންގެ ކޮންޓްރޯލް އޮންނަ ހުދައިދާ ސިޓީއަށް ސައުދީ އަރަބިއްޔާއިން ހަމަލާތަކެއް ދީފި ކަމަށް އެ ޖަމާއަތުގެ ފޮރިން މިނިސްޓްރީން ބުނެފި އެވެ. މިއީ މި ސަރަހައްދުގައި އުފެދިފައިވާ ހަމަނުޖެހުންތައް އިތުރަށް ގޯސްވެގެން ދިޔަ ކަމެކެވެ.

ހުކުރު ދުވަހުގެ ރޭ ދަންވަރު ދިން މި ހަމަލާގެ ސަބަބުން ސައުދީއަށް ބޮޑު އަގަކުން ބަދަލުދޭން ޖެހޭނެ ކަމަށް ބުނެ، ހޫޘީންގެ ފޮރިން މިނިސްޓްރީން ވަނީ އިންޒާރު ދީފަ އެވެ. އަދި މި ހަމަލާއަށް އެ ޖަމާއަތުން ރައްދު ދޭނެ ކަމަށް ވެސް އެ މިނިސްޓްރީން ވަނީ އިޝާރާތް ކޮށްފަ އެވެ. "ހުދައިދާއަށް އަމާޒުކޮށް ހަމަލާ ދިނުމުން، ކުރިއަށް އޮތް މަރުހަލާގައި ސައުދީ ސަރުކާރުން މިވަނީ 'ހަމަލާއަކަށް ހަމަލާއެއް' ދިނުމުގެ ސިޔާސަތު ކަނޑައަޅާފައި،" ފޮރިން މިނިސްޓްރީން ނެރުނު ބަޔާނުގައި ބުނެފައިވެއެވެ.

ހޫޘީންނާ ގުޅުން އޮންނަ އަލް މަސީރާ ޓީވީން ރިޕޯޓްކޮށްފައިވާ ގޮތުގައި، މި ހަމަލާތައް އަމާޒުކޮށްފައިވަނީ އެ ގައުމުގެ ޓެލެކޮމިއުނިކޭޝަން އޮތޯރިޓީގެ އިމާރާތްތަކަށެވެ. މީގެ އިތުރުން ކަމަރާން އައިލެންޑަށް ވެސް ހަމަލާތަކެއް ދީފައިވާ ކަމަށް އެ މީޑިއާއިން ރިޕޯޓްކޮށްފައިވެ އެވެ.

އަލް މަސީރާ ޓީވީން ބުނި ގޮތުގައި، ކަމަރާން އައިލެންޑަށް ދިން ހަމަލާގައި މިހާތަނަށް އެނގިފައިވާ ގޮތުގައި އެކަކަށް ވަނީ އަނިޔާވެފަ އެވެ.

ހުދައިދާގެ ބަނދަރު ސަރަހައްދުން ގޮވުންތަކެއްގެ އަޑު އިވިފައިވާ ކަމަށް މަންޒަރު ދުށް މީހުންނާ ހަވާލާދީ ރޮއިޓާސް ނިއުސް އެޖެންސީން ރިޕޯޓްކޮށްފައިވީ ނަމަވެސް، ޔަމަނުގައި ހަރަކާތްތެރިވާ ސައުދީ އިސްވެ އޮންނަ ކޯލިޝަނުން ވަނީ އެ ބަނދަރަށް ހަމަލާދިން ކަމަށް އިންކާރުކޮށްފަ އެވެ.

ބަނދަރު ސިޓީއެއް ކަމަށްވާ ހުދައިދާއަކީ ހޫޘީންގެ ކޮންޓްރޯލްގެ ދަށުގައި އޮންނަ ޔަމަނުގެ ސަރަހައްދުތަކަށް ބޭނުންވާ މުދާ ފޯރުކޮށްދޭ މައިގަނޑު މަގެވެ. ހޫޘީންގެ ކޮންޓްރޯލް އޮންނަ ޔަމަނުގެ އުތުރުގެ ސަރަހައްދުތަކަށް އެތެރެކުރާ ވިޔަފާރި މުދަލާއި އިންސާނީ އެހީގެ ބޮޑު ބައެއް އެތެރެކުރަނީ މި ބަނދަރު މެދުވެރިކޮށެވެ.

ޔަމަނުގައި ހަރަކާތްތެރިވާ ސައުދީ އިސްވެ އޮންނަ ކޯލިޝަނުގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ވަނީ، މަސްރަހު ގޯސްވުމުގެ ޒިންމާ ހޫޘީން އުފުލަންޖެހޭނެ ކަމަށް ވިދާޅުވެފަ އެވެ. އަދި ރަތް ކަނޑުން ދަތުރުކުރާ އުޅަނދުފަހަރަށް ހޫޘީން ދެމުންދާ ހަމަލާތަކަކީ "ބިރުދެއްކުމުގެ އަދި ޒިންމާދާރުކަންކުޑަ" އަމަލުތަކެއްގެ ގޮތުގައި އޭނާ ސިފަކުރެއްވި އެވެ.

ސައުދީ އިސްވެ އޮންނަ ކޯލިޝަނުން "އަޅަންޖެހޭ ހުރިހާ އޮޕަރޭޝަނަލް ފިޔަވަޅުތަކެއް" އަޅަމުންދާނެ ކަމަށް އަލް މާލިކީ ނެރުއްވި ބަޔާނެއްގައި ވިދާޅުވި އެވެ. އަދި ހޫޘީން އެމީހުންގެ "ދުޝްމަނުކަމުގެ އަމަލުތައް" ކުރިއަށް ގެންދާނަމަ، އެއްވެސް ޖެހިލުމެއް ނެތި ރައްދު ހަމަލާ ދޭނެ ކަމަށް ވެސް އޭނާ އިތުރަށް ވިދާޅުވި އެވެ.

މިދިޔަ ބުދަ ދުވަހު، އަންސާރުﷲ ގެ ނަމުން ވެސް މަޝްހޫރުވެފައިވާ ހޫޘީން ވަނީ ރަތް ކަނޑުގައި ދަތުރުކުރަމުންދިޔަ ސައުދީގެ ތެޔޮ އުފުލާ ބައެއް ބޯޓުތަކަށް ޑްރޯން އަދި މިސައިލް ހަމަލާތަކެއް ދީފައިވާ ކަމަށް އިއުލާންކޮށްފަ އެވެ. މި ހަމަލާތަކުގައި މަދުވެގެން އެއް ބޯޓަށް ގެއްލުން ލިބިފައިވާއިރު، ހޫޘީން ބުނެފައިވަނީ އެ ބޯޓުތަކުން ހަމަލާދިނީ އޭގެ ދެދުވަސް ކުރިން އެ ޖަމާއަތުން އިއުލާންކުރި ބްލޮކޭޑާ ނުވަތަ ދަތުރުފަތުރު ހުއްޓުވުމުގެ އަމުރާ ޚިލާފުވުމުން ކަމަށެވެ.