އަދަން ކަނޑުން ދަތުރުކުރަމުން ދިޔަ ޓޭންކަރަކަށް ކަނޑުފޭރޭ ބަޔަކު އަރައިފި

ޔަމަނުގެ ދެކުނު އައްސޭރިފަށުން އަދަން ކަނޑުއޮޅިން ދަތުރުކުރަމުންދިޔަ "އަސާނާ" ނަމަކަށް ކިޔާ ކެމިކަލް ޓޭންކަރަކަށް، ހަތިޔާރު އެޅި ބަޔަކު ހުކުރު ދުވަހު އަރައި އެ އުޅަނދު އެމީހުންގެ ބާރުގެ ދަށަށް ގެންގޮސްފައިވާ ކަމަށް ކަނޑުގެ ސަލާމަތީ ކަންކަމާ ބެހޭ މަސްދަރުތަކުން ބުނެފި އެވެ.

ކަނޑުގެ ސަލާމަތީ ކަންކަމާ ބެހޭ މަސްދަރަކުން މައުލޫމާތު ދިން ގޮތުގައި، މިހާތަނަށް ބެލި ބެލުމުން މި ހާދިސާއަކީ ޔަމަނުގެ ހޫޘީ ހަނގުރާމަވެރިންނާ ގުޅުންހުރި ކަމެއް ނޫން ކަމަށާއި، މިއީ ސޯމާލިއާގެ ކަނޑުފޭރޭ ގްރޫޕަކުން ހިންގާފައިވާ އަމަލެއް ކަމަށް ބެލެވޭ ކަމަށެވެ.

އުޅަނދުތައް ޓްރެކްކުރާ ޑޭޓާތަކުން ދައްކާ ގޮތުގައި، ވަކި ގައުމެއްގެ ދިދައެއް ނަގާފައިވާކަން ކަށަވަރުނުވާ މި ކުޑަ ޓޭންކަރު ދަތުރުކުރަމުންދިޔައީ ސޯމާލިއާގެ ބޮސާސޯ ބަނދަރަށެވެ.

ރަތް ކަނޑާއި އަދަން ކަނޑުއޮޅީގައި ހަރަކާތްތެރިވާ ޔޫރަޕިއަން ޔޫނިއަންގެ "އެސްޕައިޑްސް" ނޭވަލް މިޝަންގެ އޮފިޝަލަކު ވިދާޅުވީ، "އަސާނާ" ޓޭންކަރަށް އެހީތެރިކަން ފޯރުކޮށްދިނުމަށާއި ހާދިސާ ހިނގައިދިޔަ ގޮތް ދެނެގަތުމުގެ މަސައްކަތް މިހާރު ކުރަމުންދާ ކަމަށެވެ.

މީގެ އިތުރުން، އެ ސަރަހައްދުގައި ދެކުނު ކޮރެއާގެ މަނަވަރެއް ވެސް ހަރަކާތްތެރިވަމުންދާ ކަމަށް އެ އޮފިޝަލް ރޮއިޓާސް ނިއުސް އެޖެންސީއަށް މައުލޫމާތު ދެއްވި އެވެ.

ބްރިޓިޝް މެރިޓައިމް ރިސްކް މެނޭޖްމަންޓް ގްރޫޕް "ވެންގާޑް" އިން ބުނި ގޮތުގައި، އުޅަނދަށް އެރި މީހުންގެ އަދަދާއި، އެމީހުން އުޅަނދަށް އެރި ގޮތުގެ ތަފްސީލުގެ އިތުރުން، އުޅަނދާއި އޭގެ ފަޅުވެރިންގެ މިހާރުގެ ހާލަތެއް އަދި ސާފެއް ނުވެ އެވެ.

ބްރިޓިޝް މެރިޓައިމް ސެކިއުރިޓީ ގްރޫޕް "އެމްބްރޭ" އިން ބުނީ، ހުކުރު ދުވަހުގެ ގްރީނިޗް މީޑިއަން ޓައިމްއިން 06:20 ހާއިރު އެ އުޅަނދުން އެހީއަށް އެދި ސިގްނަލް ފޮނުވާފައިވާ ކަމަށެވެ. އަދި ހާދިސާ ހިނގިއިރު އުޅަނދުގައި ހަތިޔާރު އެޅި ސަލާމަތީ ޓީމެއް ނެތް ކަމަށާއި، މި ހަމަލާ ދިނީ ކަނޑުފޭރޭ ގްރޫޕަކުން ކަމަށް ޝައްކުކުރެވޭ ކަމަށް ވެސް އެ ގްރޫޕުން ބުނެފައިވެ އެވެ.

ޝިޕިންގް ޑޭޓާބޭސްތަކުން ދައްކާ ގޮތުގައި މި އުޅަނދު އޮޕަރޭޓް ކުރަނީ މާޝަލް އައިލެންޑްސްގައި ރަޖިސްޓްރީކޮށްފައިވާ "އެކްސަން އެނާޖީ" އިންނެވެ. ނަމަވެސް މިކަމާ ގުޅޭގޮތުން އެ ކުންފުނީގެ ބަހެއް ވަނީ ލިބޭގޮތް ނުވެފަ އެވެ.

އެމެރިކާއިން އީރާނުގެ ހަކަތަ އުފައްދާ މަރުކަޒުތަކަށް ހަމަލާދީފި ނަމަ، ރަތް ކަނޑުގެ ތެޔޮ އުފުލާ މަގުތައް ބަންދުކުރުމަށް ތައްޔާރަށް ތިބުމަށް އީރާނުން ހޫތީންނަށް އަންގާފައިވާ ކަމަށް ބުރާސްފަތި ދުވަހު ރޮއިޓާސްއަށް މައުލޫމާތު ލިބިފައިވެ އެވެ. މިއީ ދުނިޔޭގެ ހަކަތަ ފޯރުކޮށްދޭ ނިޒާމަށް ކުރިމަތިވެފައިވާ އާ ނުރައްކަލެކެވެ.

ބްރިޓިޝް ނޭވީ އެޖެންސީ "ޔޫކޭއެމްޓީއޯ" އިން ހުކުރު ދުވަހުގެ ކުރީކޮޅު ބުނެފައިވަނީ، ޔަމަނުގެ މުކައްލާ ބަނދަރުގެ ދެކުނުން 65 ނޯޓިކަލް މޭލު ބޭރުން، އަދަން ކަނޑުއޮޅިން އިރުމައްޗަށް ދަތުރުކުރަމުންދިޔަ އުޅަނދަކަށް ހުއްދަނެތް ބަޔަކު އަރާފައިވާ ކަމަށެވެ.