ސޯފާ އަކާ ގުޅޭ މައްސަލަ އެއްގައި ދެކުނު އެފްރިކާގެ ރައީސް މަގާމުން ދުރުކުރުމަށް ޕާލަމަންޓުން ކުރިއަށްގެންދާ އިތުބާރު ނެތްކަމުގެ މައްސަލަ ވަގުތީގޮތުން ހުއްޓާލުމަށް އެ ގައުމުގެ ކޯޓަކުން އަމުރުކޮށްފި

ދެކުނު އެފްރިކާގެ ރައީސް ސިރިލް ރާމަފޯސާ މަގާމުން ދުރުކުރުމަށް ޕާލަމަންޓުން ކުރިއަށްގެންދާ އިމްޕީޗްމަންޓް މަރުހަލާ ވަގުތީގޮތުން ހުއްޓާލުމަށް އެ ގައުމުގެ ކޯޓަކުން އަމުރުކޮށްފި އެވެ.

މިއީ ރާމަފޯސާގެ އަމިއްލަ ފާމެއްގައި ހުރި ސޯފާ އަކުން ގިނަ އަދަދެއްގެ ފައިސާ ފެނުނު "ފާމްގޭޓް" ގެ ނަމުން މަޝްހޫރުވެފައިވާ ކޮރަޕްޝަންގެ ހާދިސާއާ ގުޅިގެން ފެންމަތިވެފައިވާ މައްސަލައެކެވެ.

ވެސްޓަން ކޭޕް ހައިކޯޓުން ރާމަފޯސާއަށް ދިން މި "ވަގުތީ އަމުރު" ގެ ދަށުން، އިމްޕީޗްމަންޓް ކޮމިޓީން ބާއްވަން އުޅުނު އާންމު އަޑުއެހުންތައް ކުރިއަށް ގެންދިއުން ވަނީ މަނާކޮށްފަ އެވެ. މި އަމުރު ނެރުނީ، ރާމަފޯސާ އިސްވެ ހުންނަވައި ބޮޑެތި ގާނޫނީ އުސޫލުތަކާ ޚިލާފުވެވަޑައިގެންފައިވާ ކަމަށް 2022 ވަނަ އަހަރުގެ ރިޕޯޓެއްގައި ބުނެފައިވާ ބުނުމުގެ ސައްހަކަމާ މެދު އޭނާ ކޯޓުގައި ސުވާލު އުފައްދާފައިވާ ދަނޑިވަޅެއްގަ އެވެ. ހުކުރު ދުވަހު ފަނޑިޔާރު އެންޑްރޭ ލެ ގްރޭންޖް އިއުލާނުކުރެއްވި ގޮތުގައި، ރައީސް ހުށަހަޅުއްވާފައިވާ މައްސަލައަށް ކޯޓުން ވަކި ގޮތެއް ނިންމަންދެން، އާންމުކޮށް ހުޅުވާލައިގެން ބާއްވާ އިމްޕީޗްމަންޓް އަޑުއެހުންތައް ކުރިއަށް ގެންދިއުން ވަނީ މަނާކޮށްފަ އެވެ.

"ފާމްގޭޓް" ގެ ނަމުން މަޝްހޫރުވެފައިވާ މި މައްސަލައަކީ ރާމަފޯސާގެ ފާމެއްގައި ހުރި ސޯފާއެއްގެ ތެރޭގައި ފޮރުވާފައި ހުރި ބައި މިލިއަން ޑޮލަރާ ގުޅޭ މައްސަލައެކެވެ. މި ހާދިސާގެ ސަބަބުން 2022 ވަނަ އަހަރުގެ ފަހުކޮޅު، އޭނާ ނިސްބަތްވާ އެފްރިކަން ނޭޝަނަލް ކޮންގްރެސް (އޭއެންސީ) ގެ ލީޑަރުކަން ގެއްލުމާ ގާތަށް ދިޔައެވެ. މީގެ އިތުރުން، އެ ޕާޓީގެ ތެރޭގައި ކޮރަޕްޝަން އޮތް ކަމަށް ކުރެވޭ ތުހުމަތުތަކާ ގުޅިގެން، 2024 ވަނަ އަހަރުގެ މޭ މަހު ބޭއްވި އިންތިޚާބުގައި އޭއެންސީއަށް ވަނީ ޕާލަމަންޓުގެ އަޣުލަބިއްޔަތު ގެއްލިފަ އެވެ. މިއީ ދެކުނު އެފްރިކާ އަށް ޑިމޮކްރަސީ ގެނައި ޕާޓީގެ ގޮތުގައި ބެލޭ ޕާޓީ އަށް މިހާތަނަށް ކުރިމަތިވި އެންމެ ވާދަވެރި އިންތިޚާބެވެ.

މި މައްސަލައިގައި އެއްވެސް ގޯސް ކަމެއް ކުރައްވާފައި ނުވާނެ ކަމަށް ރާމަފޯސާ އަބަދުވެސް ވިދާޅުވަމުން، މަގާމުން އިސްތިއުފާ ދެއްވުމަށްވެސް އޭނާ ވަނީ ދެކޮޅު ހައްދަވާފަ އެވެ. ހާމަ ނުކޮށް ގެންގުޅުނު ބޭރު ފައިސާތަކެއްގެ މައްސަލަ ފެންމަތިވީ، 2020 ވަނަ އަހަރު އެ ފައިސާތައް ވަގަށް ނަގާފައިވާ ކަމަށް ރިޕޯޓު ކުރުމާ ގުޅިގެންނެވެ.

ރައީސް ރާމަފޯސާ ވިދާޅުވާ ގޮތުގައި، އުތުރުގެ ލިމްޕޯޕޯ ޕްރޮވިންސްގައި ހުންނަ އޭނާގެ ބޮޑު ފާމްހައުސްގައި ފޮރުވާފައި ހުރި 580،000 ޑޮލަރަކީ ބަފަލޯ ވިއްކައިގެން ލިބުނު ފައިސާ އެވެ. ނަމަވެސް، ސޯފާ އެއްގެ ތެރެއަށް އެހާ ގިނަ އަދަދެއްގެ ފައިސާ ޖަހާފައި ހުރި ސަބަބާ މެދު ސުވާލު އުފެދި، މި ހާދިސާގެ ސަބަބުން އޭނާއަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. ހުކުރު ދުވަހުގެ މި ނިންމުމަކީ ރާމަފޯސާއަށް ލިބުނު ބޮޑު ކުރިއެރުމެކެވެ. މީގެ އިތުރުން، މި މައްސަލައިގައި އޭނާ ޖަވާބުދާރީވާން ޖެހޭނެ ކަމަށް މިނިވަން ޕެނަލަކުން ނިންމި ނިންމުމާ ދެކޮޅަށް އޭނާ ހުށަހަޅާފައިވާ އެހެން މައްސަލައެއްގެ ހުކުމަށް ވެސް އޭނާ މިހާރު އަންނަނީ އިންތިޒާރު ކުރަމުންނެވެ.

ރައީސް ރާމަފޯސާގެ ތަރުޖަމާނު ވިންސެންޓް މަގްވެންޔާ ވިދާޅުވި ގޮތުގައި، ރައީސް ކޯޓުގެ ނިންމުމަށް އިހުތިރާމް ކުރައްވައެވެ.

މަގްވެންޔާ ނެރުއްވި ބަޔާނެއްގައި ވިދާޅުވީ، ގާނޫނުއަސާސީގައި ބަޔާންކޮށްފައިވާ ގޮތުގެ މަތިން އަދުލު އިންސާފުގެ މިނިވަންކަމާއި ބާރުތައް ވަކިވެފައި އޮތުމަށް ރައީސް އިހުތިރާމް ކުރައްވާ ކަމަށެވެ. އަދި ޖަވާބުދާރީވުމުގެ މަރުހަލާތަކަށް ރައީސް އެއްބާރުލުން ދެއްވައި، އެކަންކަމަށް ތަބާވެވަޑައިގަންނަވާނެ ކަމަށްވެސް އޭނާ ވިދާޅުވި އެވެ.

ސިޔާސީ ދިރާސާވެރިން ލަފާކުރާ ގޮތުގައި، އިމްޕީޗްމަންޓް މަރުހަލާ ރަސްމީކޮށް ފެށި، އޭނާ މަގާމުން ދުރުކުރުމާ މެދު ވޯޓަކަށް ދިޔަ ނަމަވެސް، ރާމަފޯސާ ވެރިކަމުގައި ދެމިހުންނަވާނެ އެވެ.

ސަބަބަކީ، ކޯލިޝަން ސަރުކާރެއްގެ ލީޑަރުކަން ކުރާ އަދި ގައުމުގެ އެންމެ ބޮޑު ޕާޓީ ކަމަށްވާ އޭއެންސީގެ ތާއީދު އަދިވެސް ރާމަފޯސާއަށް އޮތުމެވެ. ގާނޫނު ހަދާ މަޖިލީހުގެ ގޮނޑިތަކުގެ ގާތްގަނޑަކަށް 40 އިންސައްތަ ހިއްސާކުރަނީ އޭއެންސީންނެވެ. ނަމަވެސް، އިމްޕީޗްމަންޓް ވޯޓެއްގައި އޭއެންސީގެ ކޯލިޝަން ބައިވެރިން އަމަލުކުރާނެ ގޮތެއް އަދި ސާފެއް ނުވެ އެވެ.