ދެކުނު އެފްރިކާ ގައި ބަޑިޖަހާ 9 މީހުން މަރުވެ، 10 މީހުން ޒަޚަމް ވެއްޖެ، ބަޑިޖެހި މީހުން ފުލުހުން ހޯދަނީ
ޖޮހާނސްބާގްގެ ބެކާސްޑަލް ޓައުންގައި ހުންނަ ލައިސަންސް ލިބިފައިވާ ޕަބެއްގައި ރޭގަނޑު 1 ޖަހާ ކަންހާއިރު ދެ އުޅަނދެއްގައި އައި 12 މީހުން ބަޑިން ހަމަލާދީ އެތައް ބަޔަކު މަރާލުމަށް ފަހު ފިލައިގެން ގޮސްފައިވެއެވެ. ބެކާސްޑަލް އަކީ ކުރިން ރަން ނެގުމުގެ މަސައްކަތް ކުރާ މީހުން އުޅޭ ސަރަހައްދެއް ކަމަށްވިޔަސް މިހާރު އެ މަސައްކަތް ދަށަށް ގޮސް ވަޒީފާ ނެތުމާއި ފަގީރުކަން މަތީ ދަރަޖައިގައި އޮތް ހިސާބެކެވެ. ދެކުނު އެފްރިކާ އަކީ މީހުން މެރުމުގެ ރެކޯޑް އެންމެ މަތީ ގައުމުތަކުގެ ތެރޭގައި ހިމެނޭ ގައުމެއް ކަމަށްވޭ.
ދެކުނު އެފްރިކާގެ ޕްރިޓޯރިއާގެ އެޓެރިޖްވިލް ގައި ހުންނަ ހޮސްޓެލްގައި ހިނގި ބަޑިޖެހުމުގެ ހާދިސާ އެއްގައި އެތައް ބަޔަކު މަރުވުމާ ގުޅިގެން އެ ސަރަހައްދުގައި ފުލުހުން އާންމުންނާ ސުވާލު ކުރަނީ - ޑިސެމްބަރު 6. 2025.
ދެކުނު އެފްރިކާ ގެ ޖޮހާނސްބާގްގެ ހުޅަނގު ދެކުނު ގައި އޮންނަ ޓައުންޝިޕެއްގައި ދިން ބަޑީގެ ހަމަލާއެއްގައި ނުވަ މީހުން މަރުވެ 10 މީހުން ޒަހަމްވެފައިވާ ކަމަށާއި، ހަމަލާ ދިން މީހުން ހޯދުމަށް މަސައްކަތް ފަށާފައިވާ ކަމަށް ދެކުނު އެފްރިކާގެ ފުލުހުން އާދީއްތަ ދުވަހު ބުނެފިއެވެ.
މި ހާދިސާ ހިނގާފައިވަނީ ޖޮހަނަސްބާގްގެ ބެކާސްޑަލް ޓައުނުގައި ހުންނަ ލައިސަންސް ލިބިފައިވާ ޕަބެއް ގައި އެތަނުގެ ގަޑިން އާދިއްތަ ވިލޭރޭ ދަންވަރު 1 ޖަހާ ކަންހާއިރު ކަމަށް ފުލުހުން ބަޔާނެއްގައި ބުނެފައިވެ އެވެ.
ދެ އުޅަނދެއް ގައި އައި ގޮތް ނޭނގޭ 12 މީހުން ޕަބް ގައި ތިބި މީހުންނަށް ބަޑިން ހަމަލާދީ، އެތަނުން ފިލައިގެން ގޮސްފައިވާ ކަމަށާއި ހަމަލާ ދިން ސަބަބު ތަހުގީގުން ދެނެގަންނާނެ ކަމަށް ފުލުހުން ބުނެފައިވެއެވެ.
ޒަހަމްވި މީހުން ފަރުވާއަށް ޓަކައި ޞިއްޙީ މަރުކަޒުތަކަށް ގެންގޮސްފައިވާ ކަމަށް ފުލުހުން އިތުރަށް ބުނެފައިވެ އެވެ.
ބެކާސްޑަލް އަކީ ކުރިން ރަން ނެގުމުގެ މަސައްކަތް ކުރާ މީހުން އުޅޭ ހިސާބެއް ކަމަށް ވިޔަސް މިހާރު އެ މަސައްކަތް ދަށަށް ގޮސްފައި ވުމާއެކު ވަޒީފާ ނެތުމާއި ފަގީރުކަން މަތީ ދަރަޖައިގައި އޮތް ސަރަހައްދެކެވެ.
އެފްރިކާގެ އެންމެ ބޮޑު އިގްތިސާދު އޮންނަ ދެކުނު އެފްރިކާ އަކީ މީހުން މެރުމުގެ ރެކޯޑް އެންމެ މަތީ އެއް ގައުމުގެ ގޮތުގައި ފާހަގަ ކުރެވޭ ތަނެކެވެ. އެ ގައުމު ގައި ދުވާލަކު ގާތްގަނޑަކަށް 60 މީހުން މަރާލަ އެވެ.
މަސްދަރު: ރޮއިޓާސް
