ޒެމްބިއާގެ ކުރީގެ ރައީސް ލުންގޫ އަވަހާރަވިތާ އަހަރަކަށްވުރެ ގިނަ ދުވަސް ވެފައިވަނިކޮށް އޭނާގެ ހަށިކޮޅު ވަޅުލާނެ ތަނަކާ މެދު އުފެދިފައިވާ ގާނޫނީ ހަނގުރާމައިގައި އާއިލާއަށް ކާމިޔާބުވެއްޖެ

ޒެމްބިއާގެ ކުރީގެ ރައީސް އެޑްގަރ ލުންގޫ އަވަހާރަވިތާ އަހަރަކަށްވުރެ ގިނަ ދުވަސް ވެފައިވަނިކޮށް އެމަނިކުފާނުގެ ހަށިކޮޅު ވަޅުލާނެ ތަނަކާ މެދު އުފެދިފައިވާ ގާނޫނީ ހަނގުރާމައިގައި އެމަނިކުފާނުގެ އާއިލާއަށް ބޮޑު ކާމިޔާބީއެއް ލިބިއްޖެއެވެ. އެގޮތުން، އެމަނިކުފާނު އަވަހާރަވި ގައުމު ކަމަށްވާ ދެކުނު އެފްރިކާގައި ހަށިކޮޅު ވަޅުލުމަށް އާއިލާއިން ކުރި އިސްތިއުނާފު ކާމިޔާބުވެފައިވާއިރު، މީގެ ކުރިން ހައިކޯޓުން ވަނީ އެމަނިކުފާނުގެ ހަށިކޮޅު ޒެމްބިއާއަށް ގެންދިއުމަށް އެ ގައުމުގެ ސަރުކާރަށް ހުއްދަ ދީފައެވެ.

ބްލޫމްފޮންޓެއިންގެ ސުޕްރީމް ކޯޓް އޮފް އެޕީލްއިން އަންގާރަ ދުވަހު ކުރި މި ހުކުމާއެކު، ކުރީގެ ރައީސް ލުންގޫ އާއި އެމަނިކުފާނުގެ ފަހުން ވެރިކަމަށް ވަޑައިގެންނެވި ރައީސް ހަކައިންޑޭ ހިޗިލެމާއާ ދެމެދު އޮތް ޒަމާންވީ ދެބަސްވުންތަކާ ގުޅިގެން އުފެދުނު ގާނޫނީ މައްސަލައަށް ނިމުމެއް އަންނާނެ ކަމެއް އަދި ސާފެއް ނުވެއެވެ.

ޒެމްބިއާ ސަރުކާރުގެ ވަކީލުން މިހާރު ތިބީ ދެން އަމަލުކުރާނެ ގޮތެއްގެ އިރުޝާދަކަށް މަޑުކޮށްގެން ކަމަށްވާއިރު، އެ ގައުމުގެ ސަރުކާރުން ދެން އަޅާނެ ފިޔަވަޅަކަށް ގިނަ ބަޔަކު މިހާރު އަންނަނީ އިންތިޒާރު ކުރަމުންނެވެ.

ޒެމްބިއާ ސަރުކާރުން މީގެ ކުރިންވެސް ބުނަމުން އައީ، ލުންގޫއަކީ އެ ގައުމުގެ ކުރީގެ ދައުލަތުގެ ވެރިޔަކަށް ވުމުން، އެމަނިކުފާނަށް ދޭންޖެހޭ އިއްޒަތާއި ގަދަރު އަމިއްލަ ގައުމުގައި ދޭންޖެހޭނެ ކަމަށެވެ.

އެގޮތުން ޒެމްބިއާ ސަރުކާރުން ބޭނުންވީ، ވެރިރަށް ލުސާކާގައި ރައީސުން ވަޅުލުމަށް ޚާއްސަކޮށްފައިވާ ސަރަހައްދުގައި، ކުރީގެ އެހެން ރައީސުންނާ އެކު ލުންގޫގެ ހަށިކޮޅުވެސް ވަޅުލުމަށެވެ.

ނަމަވެސް، ޖަނާޒާގެ ކަންކަމާ ގުޅޭގޮތުން ސަރުކާރާއެކު ކުރެވުނު މަޝްވަރާތައް ނާކާމިޔާބުވުމާ ގުޅިގެން، ލުންގޫގެ އާއިލާއިން ބޭނުންވީ އަމިއްލަ ގޮތުން ޖަނާޒާގެ ކަންކަން ކުރިއަށް ގެންދިއުމަށެވެ.

މިދިޔަ އަހަރުގެ އޮގަސްޓް މަހު ދެކުނު އެފްރިކާގެ ޕްރިޓޯރިއާގެ ހައިކޯޓުން ނިންމީ، ޒެމްބިއާ ސަރުކާރަށް ލުންގޫގެ ހަށިކޮޅު ގެންދިއުމުގެ ހުއްދަ ދިނުމަށާއި ދައުލަތުގެ ފެންވަރުގައި ޖަނާޒާ ބޭއްވުމަށެވެ. މި ނިންމުމާ ގުޅިގެން ކޯޓު ރޫމުގައި ތިބި ލުންގޫގެ އާއިލާގެ މެންބަރުން ތިބީ ވަރަށް ބޮޑަށް މާޔޫސްވެފައެވެ.

އާއިލާއިން އެ ނިންމުން އިސްތިއުނާފު ކުރި ނަމަވެސް، މިދިޔަ އޭޕްރިލް މަހު ޒެމްބިއާ ސަރުކާރުން ކުއްލި ގޮތަކަށް އިއުލާން ކުރީ، ދެކުނު އެފްރިކާގެ ކޯޓުން ލުންގޫގެ ހަށިކޮޅު ރަސްމީކޮށް ދައުލަތާ ހަވާލުކޮށްފައިވާ ކަމަށެވެ.

އެހެންނަމަވެސް، އޭގެ މަދު ގަޑިއިރުތަކެއް ފަހުން، ހަމަ އެ ކޯޓުން ވަނީ މި މައްސަލަ އަލުން ކޯޓަށް ހުށަހެޅެންދެން ހަށިކޮޅު އަނބުރާ ހަވާލުކުރުމަށް ޒެމްބިއާ ސަރުކާރަށް އަމުރުކޮށްފައެވެ.

އުމުރުފުޅުން 68 އަހަރުގައި ކުރީގެ ރައީސް ލުންގޫ އަވަހާރަވީ ޕްރިޓޯރިއާގެ ކްލިނިކެއްގައި ފަރުވާ ހޯއްދަވަމުން ގެންދަވަނިކޮށް، ހާމަނުކުރާ ބައްޔެއްގައެވެ. އެމަނިކުފާނު އަވަހާރަވުމާ ގުޅިގެން ސަރުކާރާއި ލުންގޫގެ ސިޔާސީ ޕާޓީ ކަމަށްވާ ޕެޓްރިއޮޓިކް ފްރަންޓް (ޕީއެފް) އިން ތަފާތު މައުލޫމާތުތައް ހިއްސާކުރުމުގެ ސަބަބުން ބޮޑު އޮޅުންބޮޅުންގަނޑެއް އުފެދުނެވެ.

އެގޮތުން، ހިތާމަ ފާޅުކުރުމުގެ ދެ މުއްދަތެއް ވަކިވަކިން އިއުލާން ކުރިއިރު، ތައުޒިޔާގެ ދަފްތަރުވެސް ދެ ތަނެއްގައި ވަނީ ބަހައްޓާފައެވެ.

2015 އިން 2021 އަށް ޒެމްބިއާގެ ވެރިކަން ކުރެއްވި ލުންގޫއާ، މިހާރުގެ ރައީސް ހިޗިލެމާއާ ދެމެދު ގިނަ ދުވަސްތަކެއް ވަންދެން ބޮޑެތި ޚިޔާލުތަފާތުވުންތަކެއް އޮތެވެ. ހިޗިލެމާއަކީ ވެރިކަމަށް ވަޑައިގަތުމުގެ ކުރިން ގިނަ އަހަރުތަކެއް ވަންދެން އިދިކޮޅު ލީޑަރުގެ ގޮތުގައި ހުންނަވައި، ލުންގޫއާ ވާދަކުރެއްވި ބޭފުޅެކެވެ.

ލުންގޫ އަވަހާރަވުމަށްފަހު އެމަނިކުފާނުގެ އާއިލާއިން ބުނެފައިވަނީ، އެމަނިކުފާނުގެ ޖަނާޒާގައި ރައީސް ހިޗިލެމާ ބައިވެރިވުމަށް ނުވަތަ ހަށިކޮޅާ ކައިރިވުމަށްވެސް ލުންގޫ ބޭނުންފުޅު ނުވާ ކަމަށެވެ.

ސުޕްރީމް ކޯޓް އޮފް އެޕީލްގެ އެންމެ ފަހުގެ ހުކުމުގައި ފަނޑިޔާރުން ވިދާޅުވީ، ކުރީގެ ރައީސް ލުންގޫއަކީ އަމިއްލަ ގައުމުގައި ބަލައިނުގަންނަ މީހެއްގެ ގޮތުގައި އެމަނިކުފާނު އަމިއްލަފުޅަށް ދެކެވަޑައިގެންނެވި ކަމަށާއި، އެމަނިކުފާނުގެ ފަހުން ވެރިކަމަށް ވަޑައިގެންނެވި ބޭފުޅާ ޖަނާޒާގައި ހުންނަވައިފިނަމަ، އެކަށީގެންވާ އިއްޒަތުގައި ފަސްދާނުނުލެވޭނެ ކަމަށް އެމަނިކުފާނަށް ގަބޫލުކުރެއްވުނުކަން ވަރަށް ސާފުކޮށް އެނގެން އޮތް ކަމަށެވެ.