ދުނިޔޭގެ ސިޔާސީ މަސްރަހް ނުތަނަވަސްވެފައި ވަނިކޮށް ޗައިނާ، ރަޝިޔާ އަދި އީރާނުގެ މަނަވަރުތައް ދެކުނު އެފްރިކާ އަށް ޖަމާވެއްޖެ
ކޭޕް ޓައުންގެ ދެކުނުން، އިންޑިއާ ކަނޑާއި އެޓްލާންޓިކް ކަނޑު ބައްދަލުވާ ހިސާބުގައި އޮންނަ ސައުތު އެފްރިކާގެ ކަނޑުގެ އަސްކަރީ މައި މަރުކަޒު، ސައިމަންސް ޓައުންގެ ބަނދަރަށް ޗައިނާ، ރަޝިޔާ އަދި އީރާނުގެ މަނަވަރުތައް ވަދެ ނިކުމެ އުޅޭ މަންޒަރު ވަނީ ބައިނަލްއަގުވާމީ މީޑިއާ އަށް ފެނިފައި.
ދެކުނު އެފްރިކާގެ ސައިމަންސް ޓައުން ނޭވަލް ބޭސް އަށް ރަޝިޔާގެ އުޅަނދެއް ވަންނަނީ - ޖެނުއަރީ 9، 2025. | ރޮއިޓަސް
ވެނެޒުއޭލާ އަށް އެމެރިކާ އިން އަސްކަރީގޮތުން ނުފޫޒު ފޯރުވުމާއި، ތެޔޮ އުފުލާ ބައެއް އުޅަނދުތައް އެމެރިކާގެ ބާރުގެ ދަށަށް ގެންދިއުމާ ގުޅިގެން ދުނިޔޭގެ ސިޔާސީ މަސްރަހު ނުތަނަވަސްވެފައިވާ ދަނޑިވަޅެއްގައި، ޗައިނާ، ރަޝިޔާ އަދި އީރާނުގެ މަނަވަރުތައް ސައުތު އެފްރިކާގެ ކަނޑުގެ ސަރަހައްދަށް ޖަމާވެއްޖެ އެވެ.
މި މަނަވަރުތައް އެ ސަރަހައްދަށް ގޮސްފައިވަނީ އެއް ހަފުތާގެ މުއްދަތަށް ކުރިއަށްގެންދާ ކަނޑުގެ އަސްކަރީ ތަމްރީނުތަކެއްގައި ބައިވެރިވުމަށް ކަމަށް ރިޕޯޓުތައް ބުނެ އެވެ.
ޗައިނާގެ ޑިފެންސް މިނިސްޓްރީން ހުކުރު ދުވަހު ނެރުނު ބަޔާނެއްގައި ބުނެފައިވަނީ، ހޮނިހިރު ދުވަހު ފެށުމަށް ހަމަޖެހިފައިވާ މި ތަމްރީނުތަކަކީ "މުހިންމު ކަނޑުގެ މަގުތަކާއި އިގްތިސާދީ ހަރަކާތްތައް ރައްކާތެރިކުރުމަށް" ހިންގޭ ގުޅިފައިވާ އޮޕަރޭޝަންތަކެއް ކަމަށެވެ.
މި ތަމްރީނުތަކުގެ ތެރޭގައި ކަނޑުމަތީގެ އަމާޒުތަކަށް ހަމަލާދިނުމާއި، "ޓެރަރިޒަމާ ދެކޮޅަށް" ހިންގާ ސަލާމަތީ އޮޕަރޭޝަންތައް ފަރިތަކުރުން ހިމެނޭނެ ކަމަށް އެ މިނިސްޓްރީން ބުނެފައިވެ އެވެ.
ކޭޕް ޓައުންގެ ދެކުނުން، އިންޑިއާ ކަނޑާއި އެޓްލާންޓިކް ކަނޑު ބައްދަލުވާ ހިސާބުގައި އޮންނަ ސައުތު އެފްރިކާގެ ކަނޑުގެ އަސްކަރީ މައި މަރުކަޒު، ސައިމަންސް ޓައުންގެ ބަނދަރަށް ޗައިނާ، ރަޝިޔާ އަދި އީރާނުގެ މަނަވަރުތައް ވަދެ ނިކުމެ އުޅޭ މަންޒަރު ވަނީ ބައިނަލްއަގުވާމީ މީޑިއާ އަށް ފެނިފަ އެވެ.
ބްރިކްސް އިއްތިހާދުގައި ހިމެނޭ ބްރެޒިލް، އިންޑިއާ އަދި ޔުނައިޓެޑް އެރަބް އެމިރޭޓްސް ފަދަ އެހެން ގައުމުތަކުން މި ތަމްރީނުތަކުގައި ބައިވެރިވާނެކަން އަދި ސާފެއް ނުވެ އެވެ. ސައުތު އެފްރިކާގެ އަސްކަރިއްޔާގެ ތަރުޖަމާނަކު ވިދާޅުވީ، އަންނަ ހުކުރު ދުވަހުގެ ނިޔަލަށް ކުރިއަށްދާ މި ތަމްރީނުތަކުގައި ބައިވެރިވާ ހުރިހާ ގައުމުތަކެއް އަދި ކަށަވަރުކޮށްދެވެން ނެތް ކަމަށެވެ.
ސައުތު އެފްރިކާގެ ޑިފެންސް ފޯސްއިން ބުނި ގޮތުގައި، މި ހަރަކާތުގެ ސަބަބުން އެކި ގައުމުތަކުގެ ކަނޑުގެ ސިފައިންގެ މެދުގައި ތަޖުރިބާ ހިއްސާކުރުމަށާއި، ގުޅިގެން މަސައްކަތް ކުރުމުގެ ގާބިލުކަން އިތުރުކުރުމަށް ފުރުސަތު ލިބޭނެ އެވެ. މިއީ ކަނޑުގެ މަގުތަކުގެ ސަލާމަތާއި ސަރަހައްދީ ހަމަޖެހުމަށް މަގުފަހިވާނެ ކަމެއް ކަމަށްވެސް އެ ފަރާތުން ފާހަގަކުރި އެވެ.
މި ތަމްރީނުތައް ބާއްވަނީ، އެމެރިކާގެ އަސްކަރިއްޔާ އިން ވެނެޒުއޭލާގެ ވެރިރަށް ކަރަކާސްއަށް ހަމަލާދީ، އެ ގައުމުގެ ރައީސް ނިކޮލަސް މަދޫރޯ ހައްޔަރުކުރުމާ ގުޅިގެން މަސްރަހު ވަރަށް ބޮޑަށް ގޯސްވެފައިވާ ދަނޑިވަޅެއްގަ އެވެ. މީގެ އިތުރުން، ޓްރަމްޕްގެ ސަރުކާރުން ވަނީ ބައިނަލްއަގުވާމީ ކަނޑުގެ ސަރަހައްދުތަކުން ވެނެޒުއޭލާއާ ގުޅުންހުރި ތެޔޮ މަނަވަރުތައް ހިފަހައްޓާފަ އެވެ. އޭގެ ތެރޭގައި އެމެރިކާގެ ދަތިކުރުމުގެ ފިޔަވަޅުތަކާ ހިލާފުވެފައިވާ ކަމަށް ބުނެ، އުތުރު އެޓްލާންޓިކުން ހިފެހެއްޓި ރަޝިޔާގެ ދިދަ ޖަހާފައިވާ އުޅަނދެއްވެސް ހިމެނެ އެވެ.
މި އަމަލަށް މޮސްކޯ އިން ވަނީ ވަރަށް ބޮޑަށް ފާޑުކިޔާފަ އެވެ. ރަޝިޔާގެ ކަމާބެހޭ ފަރާތްތަކުން ބުނި ގޮތުގައި މިއީ ބައިނަލްއަގުވާމީ ކަނޑުގެ ގާނޫނުތަކާ ކަނޑައެޅިގެން ހިލާފު ކަމެކެވެ. ނަމަވެސް، ބުރާސްފަތި ދުވަހު ނިއުޔޯކް ޓައިމްސް އަށް ދެއްވި އިންޓަވިއުއެއްގައި ރައީސް ޓްރަމްޕް ވަނީ ބައިނަލްއަގުވާމީ ގާނޫނުތަކަށް އިހުތިރާމް ކުރުމުގެ ބަދަލުގައި، އެމަނިކުފާނުގެ ސަރުކާރުގެ ހަރުކަށި ސިޔާސަތުތައް ހިފެހެއްޓޭނީ ހަމައެކަނި އެމަނިކުފާނުގެ "އަމިއްލަ އަޚުލާގީ މިންގަނޑުތަކުން" ކަމަށް ވިދާޅުވެފަ އެވެ.
އޭގެ އިތުރުން އީރާނުގައި ކުރިއަށްދާ ބޮޑެތި މުޒާހަރާތައް ހުއްޓުވުމަށް އެ ގައުމުގެ ސަރުކާރުން ބާރުގެ ބޭނުންކުރުމާ ގުޅިގެން، ވޮޝިންޓަނުން ވަނީ ތެހެރާނާ ދެކޮޅަށް ފިޔަވަޅު އަޅާނެ ކަމުގެ އިންޒާރުވެސް ދީފައެވެ.
މި އަސްކަރީ ތަމްރީނުތަކުގެ ސަބަބުން އެމެރިކާ އާއި ސައުތު އެފްރިކާއާ ދެމެދު އޮތް ގުޅުން އިތުރަށް ގޯސްވާނެ ކަމަށް ބެލެވެ އެވެ. ޚާއްޞަކޮށް ޓްރަމްޕްގެ ސަރުކާރުން ދަނީ ސައުތު އެފްރިކާ އަށް ވަރަށް ބޮޑަށް ފާޑުކިޔަމުންނެވެ. އަސްލު މި ތަމްރީނުތައް ބޭއްވުމަށް ހަމަޖެހިފައި އޮތީ މިދިޔަ އަހަރުގެ ނޮވެމްބަރު މަހުގައެވެ. ނަމަވެސް ޖޯހަނަސްބާގްގައި އޮތް ޖީ20 ސަމިޓާ ދިމާވާތީ ފަސްކުރެވުނީ އެވެ.
މި ތަމްރީނުތައް ބާއްވާ ވަގުތާ ބެހޭގޮތުން ސައުތު އެފްރިކާގެ ޑެޕިއުޓީ ޑިފެންސް މިނިސްޓަރު ބަންޓޫ ހޮލޮމީސާ ވިދާޅުވީ، މިއީ މިހާރު ފެންނަމުންދާ ނުތަނަވަސްކަމުގެ މާ ކުރިން ރޭވިފައިވާ ކަމެއް ކަމަށެވެ. އަދި އެމެރިކާ އިން ބައެއް ގައުމުތަކާ މައްސަލަ ޖެހިގެން އުޅޭތީ، އެއީ ސައުތު އެފްރިކާ އިން ބިރުގަންނަންޖެހޭ ސަބަބެއް ނޫން ކަމަށާއި، އެ ގައުމުތަކަކީ ސައުތު އެފްރިކާގެ ދުޝްމަނުން ނޫން ކަމަށްވެސް އޭނާ ވިދާޅުވި އެވެ.
