ވޯލްޑް ކަޕް ގައި ކުޅުނު ދެކުނު އެފްރިކާގެ ގައުމީ ޓީމުގެ ހުނަރުވެރި މިޑްފީލްޑަރު އުމުރުން 25 އަހަރުގެ ޖޭޑަން އެޑަމްސް މަރުވެފައި އޮއްވާ ފެނިއްޖެ

މި އަހަރުގެ ވޯލްޑް ކަޕް ގައި ބައިވެރިވި ދެކުނު އެފްރިކާގެ ގައުމީ ފުޓްބޯޅަ ޓީމުގެ މިޑްފީލްޑަރު ޖޭޑަން އެޑަމްސް އުމުރުން 25 އަހަރުގައި މަރުވެއްޖެ އެވެ.

މި ފަހަރުގެ ވޯލްޑް ކަޕްގެ ގްރޫޕް ސްޓޭޖުގައި ދެކުނު އެފްރިކާ ކުޅުނު ތިން މެޗުގައިވެސް އެޑަމްސް ވަނީ ކުޅެފަ އެވެ. މުބާރާތުގެ ގަދަ 32 ގެ ބުރުގައި މުބާރާތް ބާއްވާ އެއް ގައުމު ކަމަށްވާ ކެނެޑާ އަތުން ބަލިވުމުގެ ކުރިން، ދެކުނު އެފްރިކާ ވަނީ މުބާރާތުގެ ނޮކްއައުޓް ބުރަށް ދަތުރުކޮށްފަ އެވެ.

ދެކުނު އެފްރިކާގެ މިނިސްޓަރ އޮފް ސްޕޯޓްސް، އާޓްސް އެންޑް ކަލްޗަރ ގޭޓަން މެކެންޒީ ނެރުއްވި ބަޔާނެއްގައި ވިދާޅުވީ، ޖޭޑަން އެޑަމްސް ވަކިވެދިޔަ ޚަބަރު އެއްސެވީ ނުހަނު ފުން ހިތާމައާއި ކުއްލި ސިހުމަކާއެކު ކަމަށެވެ.

މެކެންޒީ އިތުރަށް ވިދާޅުވީ، ދެކުނު އެފްރިކާގެ ފުޓްބޯޅައަށް ލިބުނު އެންމެ އުންމީދީ ޒުވާން ހުނަރުވެރިންގެ ތެރެއިން އެކަކު ގެއްލިފައިވާ ކަމަށާއި، އެކަޑަމީގެ އުންމީދީ ކުޅުންތެރިއަކުން ފެށިގެން ގައުމީ ޓީމުގެ މުހިންމު ކުޅުންތެރިއަކަށް އޭނާ ވެގެންދިޔަ މަންޒަރު ބަލަން ތިބި އެތައް މިލިއަން ސަޕޯޓަރުންނާއި، އޭނާގެ އާއިލާއާއި ޓީމުގެ ކުޅުންތެރިންނާއެކު މުޅި ގައުމު މިއަދު ހިތާމަކުރާ ކަމަށެވެ.

2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް އޭގައި، ޖޫން މަހުގެ 18 ވީ ބުރާސްފަތި ދުވަހު އެޓްލާންޓާ ސްޓޭޑިއަމްގައި ޗެކިއާ އާއި ދެކުނު އެފްރިކާ ބައްދަލުކުރި މެޗުގެ ތެރެއިން، ދެކުނު އެފްރިކާގެ ޖޭޑަން އެޑަމްސް (ޖާޒީ ނަންބަރު 23) ބޯޅަ ފާސްކުރަން މަސައްކަތް ކުރަނީ. | ގެޓީ އިމޭޖަސް

ދެކުނު އެފްރިކާގެ ފުލުހުން ބުނި ގޮތުގައި، ހޮނިހިރު ދުވަހުގެ ހެނދުނުގެ ވަގުތެއްގައި ކޭޕް ޓައުންގެ މެދުތެރޭ ސަރަހައްދެއް ކަމަށްވާ ޝޮޓްޝެކްލޫފްގެ ގެއެއްގެ ތެރެއިން 25 އަހަރުގެ ފިރިހެނެއްގެ ހަށިގަނޑު ފެނުމާ ގުޅިގެން، އެ މައްސަލަ މިހާރު ދަނީ ތަހުގީގު ކުރަމުންނެވެ.

މިނިސްޓަރު މެކެންޒީ އިތުރަށް ވިދާޅުވީ، ޖޭޑަން މަރުވި ސަބަބު އަދި ކަށަވަރުވެފައި ނުވާތީ، އޭނާގެ އާއިލާއަށާއި މަމެލޯޑީ ސަންޑައުންސް ކްލަބަށް މި ދަތި ވަގުތުގައި އިހުތިރާމް ކުރުމަށާއި، އެކި ކަހަލަ ތޯތޯ ވާހަކަތައް ނުފެތުރުމަށް މީޑިއާތަކާއި އާންމު ރައްޔިތުންގެ ކިބައިން އެދިވަޑައިގަންނަވާ ކަމަށެވެ.

އަދި މިކަމާ ގުޅޭ ރަސްމީ އެއްވެސް މައުލޫމާތެއް އޮތް ނަމަ، ކަމާބެހޭ ފަރާތްތަކުން އެ މައުލޫމާތު ހާމަކުރަމުންދާނެ ކަމަށްވެސް އޭނާ ވިދާޅުވި އެވެ.

ވޯލްޑް ކަޕްގެ ގްރޫޕް އޭގައި ޗެކް ރިޕަބްލިކާ ދެކޮޅަށް ކުޅެ 1-1 އިން އެއްވަރުވި މެޗު ފެށުމުގެ ދެތިން ގަޑިއިރެއް ކުރިން އޭނާގެ މާމަ މަރުވި ޚަބަރު ލިބުނު ނަމަވެސް، އެޑަމްސް ވަނީ އެ މެޗުގެ ފުރަތަމަ އެގާރައިގައި ހިމެނިގެން ކުޅެފަ އެވެ.

ދެކުނު އެފްރިކާގެ ފުޓްބޯޅަ ކުޅުންތެރިންގެ ޔޫނިއަނުން ބުނީ، 2022 ވަނަ އަހަރު ގައުމީ ޓީމަށް ފުރަތަމަ މެޗު ކުޅެދިން އެޑަމްސް ކުއްލި ގޮތަކަށް ވަކިވެދިއުމަކީ ލިބުނު ވަރަށް ބޮޑު ހިތާމައެއް ކަމަށެވެ.

އެ ޔޫނިއަނުން ފާހަގަކުރި ގޮތުގައި، ޖޭޑަން އެޑަމްސް ވަނީ ދާދި ފަހުން ބޭއްވި 2026 ވަނަ އަހަރުގެ ވޯލްޑް ކަޕްގައި ދެކުނު އެފްރިކާ ތަމްސީލުކޮށް، މުޅި ގައުމުގެ އުންމީދުތައް ފަޚުރުވެރިކަމާއި ހިތްވަރާއެކު އުފުލާފަ އެވެ.

އޭނާގެ ވަކިވުމަކީ އޭނާގެ އާއިލާއަށާއި، ޓީމުގެ ކުޅުންތެރިންނަށާއި، ކްލަބްތަކުގެ އިތުރުން މުޅި ފުޓްބޯޅަ އާއިލާއަށާއި ގައުމަށްވެސް ލިބުނު އިއާދަނުކުރެވޭނެ ބޮޑު ގެއްލުމެކެވެ.

ދެކުނު އެފްރިކާގެ ފުޓްބޯޅައަށް މިއަދު ގެއްލިގެން އެދިޔައީ ހުނަރުވެރި ކުޅުންތެރިއެއްގެ އިތުރުން، ކުޅިވަރަށް އިޚުލާސްތެރި ޚިދުމަތްތަކެއް ކޮށްދެމުންދިޔަ، އަދި ކުރިމަގުގައި ގައުމަށް ގިނަ ކަންތައްތަކެއް ކޮށްދެވެން އޮތް ޒުވާން ފުރާނައެއް ކަމަށް ރިޕޯޓުތަކުގައިވެ އެވެ.

އެޑަމްސް އޭނާގެ ފުޓްބޯޅަ ކެރިއަރު ފެށީ ސްޓެލެންބޮޝް އެފްސީންނެވެ. އޭގެ ފަހުން 2025 ވަނަ އަހަރުގެ ޖެނުއަރީ މަހު މަމެލޯޑީ ސަންޑައުންސްއަށް ބަދަލުވެ، އޭނާ ވަނީ އެ ޓީމާއެކު ލީގު ތައްޓާއި އެފްރިކަން ޗެމްޕިއަންސް ލީގު ކާމިޔާބުކޮށްފަ އެވެ.

އޭނާ ވަނީ 2023 ވަނަ އަހަރުގެ އެފްރިކާ ކަޕް އޮފް ނޭޝަންސްގެ ސެމީ ފައިނަލަށް ދަތުރުކުރި ދެކުނު އެފްރިކާގެ ސްކޮޑުގައިވެސް ހިމެނިފަ އެވެ. އޭގެ ފަހުން ހޫގޯ ބްރޫސްގެ އިރުޝާދުގެ ދަށުން ވޯލްޑް ކަޕަށް ދިޔަ ޓީމުގައި ހިމެނި، އެ ގައުމުގެ ތާރީޚުގައި ފުރަތަމަ ފަހަރަށް ވޯލްޑް ކަޕްގެ ނޮކްއައުޓް ބުރަށް ދަތުރުކުރުމުގައި އޭނާ މުހިންމު ދައުރެއް އަދާކުރި އެވެ.

ފީފާގެ ރައީސް ޖިއާނީ އިންފަންޓީނޯ ވިދާޅުވީ، ދެކުނު އެފްރިކާގެ ތާރީޚީ ވޯލްޑް ކަޕް ކެމްޕޭނުގައި ބައިވެރިވިތާ މަދު ހަފުތާތަކެއްގެ ތެރޭގައި، އެ ގައުމުގެ މިޑްފީލްޑަރު ޖޭޑަން އެޑަމްސް މަރުވި ޚަބަރު އެއްސެވީ ނުހަނު ހިތާމައާއެކު ކަމަށެވެ.