19 ވަނަ މަޖިލީހުން ގެނައި ލާމަރުކަޒީ ގާނޫނުގެ ރޫހު 20 ވަނަ މަޖިލީހުން ދަނީ ފުނޑާލަމުން: މެންބަރު ސަމީރު

19 ވަނަ ރައްޔިތުންގެ މަޖިލީހުން ގެނައި ލާމަރުކަޒީ ގާނޫނުގެ ރޫހު 20 ވަނަ ރައްޔިތުންގެ މަޖިލީހުން ފުނޑާލަމުންދާ ކަމަށް ރައްޔިތުންގެ މަޖިލީހުގެ ތޮއްޑޫ ދާއިރާގެ މެންބަރު ހުސެއިން ސަމީރު ވިދާޅުވެއްޖެ އެވެ.

ބުރާސްފަތި ދުވަހު އެމްޑީޕީގެ ލާމަރުކަޒީ ކޮމިޓީގެ މެންބަރުން ވަނީ އެލްޖީއޭގެ މެންބަރުންނާ ބައްދަލުކުރައްވާ ލާމަރުކަޒީ ނިޒާމަށް ގެނެސްފައިވާ ބަދަލުތަކާއި އަދި މިހާރު ކައުންސިލްތަކާމެދު އަމަލު ކުރަމުންދާ ގޮތާ ގުޅޭގޮތުން ކަންބޮޑުވުން ފާޅު ކުރައްވައި މަޝްވަރާކުރައްވާފަ އެވެ.

މި ބައްދަލުވުމާ ގުޅޭގޮތުން މީޑިއާތަކަށް މެންބަރު ސަމީރު ވިދާޅުވީ 19 ވަނަ މަޖިލީހުން ގެނައި ލާމަރުކަޒީ ގާނޫނުގެ ރޫހު 20 ވަނަ މަޖިލީހުން ފުނޑާލަމުންދާ ކަމަށެވެ.

ސަރުކާރުން ވަކި މަގްސަދުތަކެއް ހާސިލުކުރުމަށް ގާނޫނުތަކަށް ބަދަލު ގެންނަމުންދާކަން ފާހަގަކުރައްވައި މެންބަރު ސަމީރު ވިދާޅުވީ، އައްޑޫ ސިޓީން ވެސް އެފަދަ ބަދަލުތަކެއް ފެންނަމުންދާ ކަމަށެވެ. އަދި ކައުންސިލްތަކުގެ މެޖޯރިޓީ އެމްޑީޕީއަށް ލިބިފައި އޮތުމުން، ސަރުކާރުން މަސައްކަތް ކުރަނީ ބާރުތައް މަރުކަޒު ކުރުމަށް ކަމަށް އޭނާ ސިފަކުރެއްވި އެވެ.

އަޅުގަނޑު އެ ސުވާލު ކުރިން އެލްޖީއޭއަށް. އަދި އަޅުގަނޑު މި މަޖިލީހުގައި އެ ކޮމިޓީގައި ހިއްސާވާ މެންބަރެއްގެ ހައިސިއްޔަތުން އަޅުގަނޑަށް ވަރަށް ބޮޑަށް ފެނިގެންދިޔަ ހަގީގަތުގައި އެލްޖީއޭއާ ވެސް އަދި ކައުންސިލުތަކާ ވެސް ގާތްގަނޑަކަށް ހާހަގަކަށްވުރެ ގިނަ ޕޭޖުގެ އިސްލާހުތައް ވަނީ ހުށަހެޅިފައި. އެހެންނަމަވެސް، ސަރުކާރުން ވަކި މަގުސަދެއް، ވަކި ބޭނުންމެއް، ވަކި ކަންކަމެއް ހާސިލުކުރުމަށް ޓަކައި މި ގާނޫނުތަކަށް ބަދަލުގެނެސްފައި

ހުސެއިން ސަމީރު 

މީގެ އިތުރުން ސަމީރު ވިދާޅުވީ އެމްޑީޕީން އަބަދުވެސް މަސައްކަތް ކުރާނީ ރައްޔިތުން ބޭނުންވާ ގޮތަށް ބާރުތައް ލާމަރުކަޒުކޮށް، ރަށްރަށުގެ ރައްޔިތުންނަށް އެންމެ އެދެވޭ ގޮތެއްގައި ޚިދުމަތް ދިނުމަށް ކަމަށެވެ. 

އެގޮތުން އަތޮޅު ކައުންސިލްތައް އުވާލި ނަމަވެސް އަތޮޅު ކައުންސިލްތަކުގެ މިލްކިއްޔާތުގައި ހުރި މުދާ ބޭނުންކުރުމުގައި ހަރުދަނާ އުސޫލެއް ގާއިމުކުރުމަށް ކުރުމަށް ބާރުއަޅައި، އެކަންކަމަށް ފާރަވެރިވާނެ ކަމަށް މެންބަރު ސަމީރު ވިދާޅުވި އެވެ.