އެލްޖީއޭއިން ނިންމާ ބޮޑެތި ނިންމުންތަކަކީ ހާމަކަން ބޮޑު ގޮތެއްގައި ފެންނަންޖެހޭ ކަންކަން ކަމަށްވާތީ، ބައްދަލުވުންތައް ލައިވް ކުރުމަށް އެދިއްޖެ

ލޯކަލް ގަވަރމަންޓް އޮތޯރިޓީ (އެލްޖީއޭ) އިން ނިންމާ ބޮޑެތި ނިންމުންތަކަކީ ރައްޔިތުންނަށް ހާމަކަން ބޮޑު ގޮތެއްގައި ފެންނަންޖެހޭ ކަންކަން ކަމަށްވާތީ، އެލްޖީއޭގެ ބައްދަލުވުންތައް ލައިވް ކުރުމަށް އެމްޑީޕީން އެދިއްޖެ އެވެ. 

ބުރާސްފަތި ދުވަހު އެމްޑީޕީގެ ލާމަރުކަޒީ ކޮމިޓީގެ މެންބަރުން ވަނީ އެލްޖީއޭގެ މެންބަރުންނާ ބައްދަލުކުރައްވާ ލާމަރުކަޒީ ނިޒާމަށް ގެނެސްފައިވާ ބަދަލުތަކާއި އަދި މިހާރު ކައުންސިލްތަކާމެދު އަމަލު ކުރަމުންދާ ގޮތާ ގުޅޭގޮތުން ކަންބޮޑުވުން ފާޅު ކުރައްވައި މަޝްވަރާކުރައްވާފަ އެވެ.

މި ބައްދަލުވުމާ ގުޅޭގޮތުން މީޑިއާތަކަށް ހުޅުމާލޭ ދާއިރާގެ ކުރީގެ މެންބަރު އަދި އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒު ވިދާޅުވީ އަތޮޅު ކައުންސިލްތައް އުވާލުމަކީ އެލްޖީއޭގެ ފަންނީ ބޭފުޅުންގެ ލަފައެއް ނޫންކަން މި ބައްދަލުވުމުން އެނގިގެން ގޮސްފައިވާ ކަމަށެވެ. އަދި އެ އޮތޯރިޓީގައި ތިއްބެވި ފަންނީ އަދި ތަޖުރިބާކާރު ބޭފުޅުން، ގާނޫނީ ގޮތުން އުފެދިފައިވާ ކައުންސިލްތަކެއް އުވާލުމަށް އެއްވެސް ލަފައެއް ދެއްވާފައި ނުވާކަން އޭނާ ފާހަގަކުރެއްވި އެވެ.

އެލްޖީއޭގެ ސީއީއޯގެ އިނގޭތޯ؟ އެތާ ތިއްބެވި ޓެކްނިކަލް ބޭފުޅެއް ނޫން އެ ބޭފުޅާގެ އަމިއްލަ ވިސްނުމާއި، އަމިއްލަ ތަޖުރިބާއަށް ބަލާއިރުގައި އަތޮޅު ކައުންސިލު އޮތުމަކީ ރަނގަޅު ކަމެއް ނޫން ކަމަށް އެ ބޭފުޅާ ދެކެވަޑައިގަތް އިނގޭތޯ. ދެން އަދި އެހެންނަމަވެސް، އެތަނުގައި ތިއްބެވި ފަންނީ ބޭފުޅުން، ތަޖުރިބާކާރު ބޭފުޅުން، އެކިއެކި ގޮތުގައި އެއްވެސް ނިޒާމުގެ ތެރޭގައި އުފެދިފައި އޮތް ކައުންސިލަށް އުވާލުމަކަށް އެ ބޭފުޅުންނެއް ލަފައެއް ދީފައެއް ނެތް. ދުނިޔޭގައި ލާމަރުކަޒީ ނިޒާމު ހިނގަމުންދާއިރުގައި އެކި ޓިއަރ އެކި ލެވެލްގައި އެބަހުރި ފަށަލަތައް. އެހެންވީމަ އެއްވެސް ފަށަލައެއް އުވާލުމަކީ މިއީ ނިޒާމަށް ރަނގަޅު ކަމެއް ކަމަކަށް އެ ބޭފުޅުންނަށް ގަބޫލެއް ނުކުރެވޭނެ. އެހެންނަމަވެސް، އެނގެން މި ދިޔައީ ރައްޔިތުންގެ މަޖިލީހުގެ ތެރޭގައި ސަރުކާރުގެ ސިޔާސަތުގެ ތެރެއިން ގެނެސްފައި އޮތް ބަދަލެއް ކަމަށް މީ

އަލީ ނިޔާޒު

މީގެ އިތުރުން ނިޔާޒު ވަނީ ފ. އަތޮޅުގެ މުދަލުގެ މައްސަލަ އަށް ވެސް އިޝާރާތް ކުރައްވާ ވާހަކަ ދައްކަވާފަ އެވެ.

ނިިޔާޒު ވިދާޅުވީ މި ބައްދަލުވުމުގައި ފ. އަތޮޅު ކައުންސިލްގެ މުދަލާއި ބިންތައް ނިލަންދޫ ކައުންސިލްގެ މިލްކަކަށް ބަދަލުކުރި މައްސަލައިގައި ވަރަށް ބޮޑަށް މަޝްވަރާ ކުރެވުނު ކަމަށެވެ. މުޅި އަތޮޅުގެ ރައްޔިތުންގެ ފައިސާ ހިމެނޭ މުދަލެއް ވަކި ރަށެއްގެ ކައުންސިލަށް ބަދަލުކުރުމުގައި ސިޔާސީ ނުފޫޒު އޮތް ކަމަށް އޭނާ ތުހުމަތު ކުރެއްވި އެވެ.

ފުރަތަމަ މިކަހަލަ ކަމެއް މި ދިމާވީ ނިލަންދޫ ކައުންސިލަށް. ނިލަންދޫ ދާއިރާގެ ރައްޔިތުންގެ މަޖިލީހުގެ މެންބަރެއް ކޮން ބޭފުޅުންނަކަށް ތިބެވަޑައިގަންނަވާނެ. އެހެންވީމާ، އިއްތިފާގަކުން ވެސް މިކަން ބަދަލުދިނުމުގެ ކަންތައްތައް ނުވަތަ މުޅި އަތޮޅު ކައުންސިލުގެ މުދަލާ ދޭތެރޭގައި އެލް.ޖީ. އޭއަށް ޢަމަލުކުރާ ގޮތް ފެނިގެން މި ދިޔައީ ނިލަންދޫ ކަންތައް ކުރި ގޮތަށް. އެހެންވީމާ، އަޅުގަނޑުމެން އަހަން ބޭނުންވި ލިޔެފައި އޮތް އުސޫލެއް އެބައޮތްތޯ؟ މި ބަދަލުދިނުމުގެ އެއްވެސް ކަހަލަ އިޖުރާއަތެއް އެ ބޭފުޅުންގެ ރައްޔިތުންނަށް ހާމަވާ ގޮތަށް އެ ބޭފުޅުން ކަންކަން ކުރައްވާށޭ މުސްތަޤުބަލުގައި. އެ ބޭފުޅުން ދެކޭގޮތުގައި ރަނގަޅު ނިންމުމެއް، އެކަމަކު އަޅުގަނޑުމެން ދެކޭގޮތުގައި ރަނގަޅު ނިންމުމެއް ނޫން

އަލީ ނިޔާޒު

ނިޔާޒު ވިދާޅުވީ، އެލްޖީއޭއިން ނިންމާ މިފަދަ ބޮޑެތި ނިންމުންތަކަކީ ރައްޔިތުންނަށް ހާމަކަން ބޮޑު ގޮތެއްގައި ފެންނަންޖެހޭ ކަންކަން ކަމަށްވާތީ، އެލްޖީއޭގެ ބައްދަލުވުންތައް ލައިވްކުރުމަށް އެދިފައިވާ ކަމަށެވެ. އަދި މުދާ ބަދަލުކުރުމުގައި އަމަލުކުރާނެ ސާފު އުސޫލެއް އޮންނަންޖެހޭނެ ކަމަށް ވެސް އޭނާ ވިދާޅުވި އެވެ.