މުވައްޒަފުން ވަކިކުރަން ނިންމި ނިންމުމަކީ އެމްޑީޕީ މީހުންނަށް އަންނަ ހަމަލާއެއް: އާސިފް

ކުންފުނިތަކުން 33 އިންސައްތަ މުވައްޒަފުން ވަކިކުރަން ނިންމި ނިންމުމަކީ އެމްޑީޕީ މީހުންނަށް އަންނަ ހަމަލާއެއް ކަމަށް ޕީޕަލްސް ނެޝަނަލް ފްރަންޓް (ޕީއެންއެފް) ގެ ސެނެޓަރ އަދި ގާނޫނީ ވަކީލު އާދަމް އާސިފް ވިދާޅުވެއްޖެ އެވެ.

ރާއްޖެ ޓީވީގެ "ފަލަ ސުރުހީ" ޕްރޮގްރާމްގައި ވާހަކަ ދައްކަވަމުން އާސިފް ވިދާޅުވީ ކުންފުނިތަކުގައި މަސައްކަތް ކުރާ 33 އިންސައްތަ މީހުންނަކީ 19 ހާހެއްހާ މީހުން ކަމަށާއި މީހުން ވަކިކުރާއިރު ކުރާނީ އެމްޑީޕީ މީހުންނަށް ބަލާފަ ކަމަށެވެ.

އާސިފް ވިދާޅުވީ ކުންފުނިތަކަށް މީހުން ނެގުމުގައި މިހާރު ގެންގުޅެނީ ސިޔާސީ މަގާމްތަކަށް ރައީސުލްޖުމްހުރިއްޔާ މީހުން އައްޔަން ކުރަން ގެންގުޅޭ އުސޫލު ކަމަށެވެ. އަދި ވަޒީފާތަކުގައި ބަހައްޓާނީ ޕީއެންސީގެ ދާއިރާތަކުގެ ރައީސުން ނުވަތަ ރައްޔިތުންގެ މަޖިލިސް މެންބަރުން ބުނާ މީހުން އެކަނި ކަމަށް ވެސް އާސިފް ވިދާޅުވި އެވެ.

ދާއިރާތަކުގެ އިންތިހާބު ބޭއްވި އިރުގައި ދާއިރާގެ ރައީސްއާއި އިންގޭތޯ މީ ސްޓިއަރިންގ ކޮމިޓީގެ ރައީސްއާއި މިހެން ގޮސް ސްޓިއަރިންގ ކޮމިޓީގެ މެންބަރުންނާއި ދާއިރާގެ ނައިބުން މިދިނީތާ މަގާމްތައް މީހުންނަށް މިސާލަކަށް 12 ވަރަކަށް ދާއިރާ މިއޮތީތާ ޕީއެންސީގެ މެންބަރުން ނެތް ރާއްޖޭގައި މިތަންތާގައި ވެސް މިހާރު ހުންނާނެ ޕީއެންސީގެ ދާއިރާގެ ރައީސުން އިނގޭތޯ މި ދާއިރާގެ ރައިސްއާ ނޫނީއާ ސްޓިއަރިން ކޮމިޓީގެ ރައީސްއާ މި މީހުން ބޭނުންވާ ބަޔަކު ވަޒީފާގައި ތިބޭ، ބައިތިއްބާނީ މިސާލަކަށް ބަލަމާ ހިނގާ ސަރުކާރަށް ގެރެންޓީ ވޯކާސް ކަމަށް އެމީހުން ގަބޫލުކުރާ އާއިލާތަކުގެ ނޫން އެހެން އެންމެން ކަނޑާނެ

އާދަމް އާސިފް

މީގެ އިތުރުން އާސިފް ވިދާޅުވީ ރައީސް މުއިއްޒު ޕްރޮމޯޓް ނުކުރާ އެންމެން ވަކި ކުރާނެ ކަމަށާއި ވަކިން ޚާއްސަކޮށް މިއީ އެމްޑީޕީ މީހުންނަށް އަންނަ ހަމަލާއެއް ކަމަށެވެ. އަދި ރައީސް މުއިއްޒު އެ ވަޑައިގަންނަވަނީ ޑިކްޓޭޓަރޝިޕްއަކާއި ދިމާލަށް ކަމަށް ވެސް އާސިފް ވިދާޅުވި އެވެ.

ޕީސީބީން ވަނީ ޖުލައި މަހުގެ 13 ވަނަ ދުވަހުން ފެށިގެން ސަރުކާރުގެ ކުންފުނިތަކުން 33 އިންސައްތަ މުވައްޒަފުން މަދުކުރުމަށް 3 މަހުގެ މުއްދަތެއް ދީފަ އެވެ.