ބޭރު ފައިސާގެ ބާޒާރަށް އަންނަ ބަދަލުތަކާ ޑޮލަރުގެ ކަޅު ބާޒާރެއް އުފެދިފައިވާތީ އެމްޑީޕީގެ ޕީޖީ އާ ގަވަރުނަރު ބައްދަލު ކުރެއްވުމަށް އެދިއްޖެ
ބޭރު ފައިސާގެ ކަޅު ބާޒާރު ބޮޑުވެ، ބޭންކުތަކުން ޑޮލަރު ލިމިޓް ކުރުމާ ގުޅިގެން އާންމުންނާއި ވިޔަފާރިތަކަށް ކުރިމަތިވާ ދަތިތަކާ މެދު މަޝްވަރާ ކުރުމަށް އެމްޑީޕީގެ ޕާލިމަންޓްރީ ގްރޫޕުން އެމްއެމްއޭގެ ގަވަރުނަރާ ބައްދަލުކުރުމަށް ވަނީ ހުށަހަޅާފަ. މި ބައްދަލުވުމުގައި މަރުކަޒީ ބޭންކުގެ މިނިވަންކަމާ މެދު އުފެދޭ ސުވާލުތަކާއި، އިގްތިސާދީ ގޮންޖެހުންތަކުން އަރައިގަތުމަށް ކުރެވިދާނެ މަސައްކަތްތަކާ ގުޅޭގޮތުން މައުލޫމާތު ސާފުކުރުމަށް ވަނީ ނިންމާފަ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) | ރައްޔިތުންގެ މަޖިލިސް
ބޭރު ފައިސާގެ ބާޒާރަށް އަންނަ ބަދަލުތަކާ ބޭރު ފައިސާގެ ކަޅު ބާޒާރެއް އުފެދިފައިވާތީ އެކަމާ ގުޅޭ ގޮތުން މޯލްޑިވްސް މަނިޓަރީ އޮތޯރިޓީގެ ގަވަރުނަރު އަހުމަދު މުނައްވަރު، އެމްޑީޕީގެ ޕާލިމަންޓްރީ ގްރޫޕާ ބައްދަލު ކުރެއްވުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހަޅުއްވައިފި އެވެ.
ގަވަރުނަރު މުނައްވަރަށް މެންބަރު ފޮނުއްވި ސިޓީގައި ވަނީ ބޭރު ފައިސާގެ ބާޒާރަށް އަންނަމުންދާ ބަދަލުތަކާ މަނިޓަރީ ޕޮލިސީ ތަންފީޒު ކުރުމުގައި ހުރި ކަންބޮޑުވުންތަކާ ގުޅޭގޮތުން މަޝްވަރާ ކުރުމަށް ބައްދަވުމަކަށް އެދި ދަންނަވާފަ އެވެ.
މެންބަރު ވިދާޅުވީ ބޭރު ފައިސާއާ ބެހޭ ގާނޫނަށް 1 ޖަނަވަރީ 2025 އިން ފެށިގެން އަމަލުކުރަން ފަށާފައިވީ ނަމަވެސް އެ ގާނޫނު ތަންފީޒުކުރުމުގައި ދިމާވެފައިވާ ނިޒާމީ މައްސަލަތަކުގެ ސަބަބުން ބޭރު ފައިސާގެ ރަސްމީ ނޫން ބާޒާރެއް (ކަޅު ބާޒާރެއް) އުފެދިފައިވާ ކަން ފާހަގަކުރެވޭ ކަމަށެވެ.
މި މައްސަލައިގެ ސަބަބުން ރައްޔިތުންނަށާ ދިވެހި އިގްތިސާދަށް ކުރިމަތިވަމުންދާ ގޮންޖެހުންތަކާ ގުޅޭ ގޮތުން މަޝްވަރާ ކުރުމަށް އެންމެ އަވަސް ފުރުސަތެއްގައި ބައްދަލުވުމެއް ހަމަޖައްސަވައި ދެއްވުމަށް އެދިވަޑައިގަންނަވާ ކަމަށެވެ. މެންބަރުގެ ސިޓީގައި ވަނީ އެ ބައްދަލުވުމުގައި މަޝްވަރާ ކޮށް، ސާފު ކުރަން ބޭނުންވާ މައިގަނޑު ކަންތައްތައް ހިމަނާފަ އެވެ.
އެގޮތުން ބޭންކް އޮފް މޯލްޑިވްސް އިން އިންވެސްޓްމަންޓްގެ ނަމުގައި ޕެރަލަލް މާކެޓް ރޭޓާ އެއްވަރުގެ ބޮޑު އަގެއްގައި ޑޮލަރު ގަތުމުގެ މުއާމަލާތްތައް ފަށާފައިވާތީ، އެފައިދައިން ރާއްޖޭގެ ބޭންކިންގ ނިޒާމުގެ ތެރެއިން ރަސްމީ އެކްސްޗޭންޖް ރޭޓަށް ވުރެ ބޮޑު އަގުގައި ޑޮލަރު ގަތުމުގައި އަމަލުކުރާ ރެގިއުލޭޓަރީ އުސޫލުތަކާ، މިކަމުގެ ސަބަބުން ރާއްޖޭގެ އެކްސްޗޭންޖް ނިޒާމަށް ކުރާނެ އަސަރާއި، ކަޅުބާޒާރުގެ ރޭޓަށް ކުރިމަތިވެދާނެ ނޭދެވޭ ނަތީޖާތަކާ ގުޅޭ މައުލޫމާތު ހޯދުމަށް ވަނީ ހުށަހަޅުއްވާފަ އެވެ.
އޭގެ އިތުރުން ބީއެމްއެލް އަ އެހެނިހެން ބޭންކުތަކުން ކާޑުތަކުގެ ޒަރީއާއިން ކުރާ ބޭރު ފައިސާގެ މުއާމަލާތްތަކުގެ ލިމިޓް ދަށްކުރުމާ ގުޅިގެން ރާއްޖެއިން ބޭރުގައި ތައުލީމު ހާސިލުކުރާ ދަރިވަރުންނާ، ބޭސްފަރުވާ އަށް ދާ ފަރާތްތަކުގެ އިތުރުން އާންމު ރައްޔިތުންނަށް ދިމާވެފައިވާ ދަތިތަކާ ކަންބޮޑުވުންތަކާ ގުޅިގެން މަޝްވަރާ ކުރުމަށް ވެސް ހިމަނާފައިވެ އެވެ.
މަޝްވަރާ ކުރުމަށް ހިމަނާފައިވާ އިތުރު ކަންކަމުގެ ތެރޭގައި ޕެރެލަލް މާކެޓްގައި ޑޮލަރުގެ އަގު އިންތިހާ އަށް އުފުލި، ބޮޑު އަގުގައި ވެސް ޑޮލަރު ހޯދުމަށް ދަތިވެފައިވާތީ މުދާ އިމްޕޯޓް ކުރުމަށް ކުރިމަތިވާ ހުރަސްތަކާ އޭގެ ސަބަބުން ތަކެތީގެ އަގު ބޮޑުވަމުންދާ މައްސަލަ ހިމެނެ އެވެ.
އެމްއެމްއޭގެ ގާނޫނުގެ ދަށުން މަނިޓަރީ ޕޮލިސީ ކަނޑައެޅުމުގެ ފުރިހަމަ އިޚްތިޔާރު މަރުކަޒީ ބޭންކަށް އޮތް ނަމަވެސް އެފަދަ މުހިއްމު ނިންމުންތައް ސަރުކާރުގެ ސިޔާސީ ފަރާތްތަކުން އިއުލާނު ކުރައްވަމުން ގެންދެވުމުގެ ސަބަބުން މަރުކަޒީ ބޭންކުގެ މިނިވަންކަމާ އިތުބާރާ މެދު އުފެދޭ ސުވާލުތައް ކުރުމަށް ވެސް ހުށަހަޅުއްވާފައި ވެ އެވެ.
އޭގެ އިތުރުން ވިޔަފާރިތަކަށާ އާންމު ރައްޔިތުންނަށް އަދި ޖުމްލަ އިގްތިސާދަށް ކުރިމަތިވެފައިވާ ޑޮލަރުގެ ދަތިކަން ހައްލުކުރުމަށް މަރުކަޒީ ބޭންކުން ކުރަމުންދާ މަސައްކަތް ދެނެގަތުމާއި އެ މަސައްކަތްތައް ހަލުވި ކުރުމަށް ރައްޔިތުންގެ މަޖިލީހުގެ ތެރެއިން އެމްޑީޕީ ގެ ޕާލިމަންޓްރީ ގްރޫޕަށް ދެވޭނެ އެއްބާރުލުން ތަކާ ގުޅޭ ގޮތުން ވެސް މަޝްވަރާ ކުރުމަށް ހުށަހަޅާފައި ވެ އެވެ.
އެހެންކަމުން މި މައްސަލަތަކަކީ ރައްޔިތުންގެ އާންމު ދިރިއުޅުމާ ރާއްޖޭގެ އިގްތިސާދީ ހަމަޖެހުމާ ސީދާ ގުޅުންހުރި ކަންތައްތަކަށް ވާތީ ގަވަރުނަރާ، އެމްޑީޕީ ޕާލިމަންޓަރީ ގްރޫޕާ ދެމެދު ބައްދަލުވުމެއް ބޭއްވުމަށް ކުރިއަށް އޮތް ހަފްތާގެ ތެރެއިން ވަގުތެއް ހަމަޖައްސަވައިދެއްވުމަށް މެންބަރު އެދިވަޑައިގެންފައި ވެ އެވެ.
