އުތުރުގެ ރަށަކަށް ނިސްބަތްވާ ނުކުޅެދުންތެރިކަން ހުންނަ ހުނަރުވެރި ޒުވާނަކު ވަޒީފާއިން ވަކިކޮށްފި

އުތުރުގެ ރަށަކަށް ނިސްބަތްވާ ނުކުޅެދުންތެރިކަން ހުންނަ ހުނަރުވެރި ޒުވާނަކު ފެނަކަ ކޯޕަރޭޝަން ލިމިޓެޑް (ފެނަކަ) ގެ ވަޒީފާއިން ވަކިކުރުމާ ގުޅިގެން ޖެންޑަރ މިނިސްޓްރީގެ ކުރީގެ ސްޓޭޓް މިނިސްޓަރު އިފްހާމް ހުސައިން ކަންބޮޑުވުން ފާޅުކުރައްވައިފި އެވެ.

ޖެންޑަރ މިނިސްޓްރީން ދޭ "ރިވެލި އެވޯޑު" ވެސް ހާސިލުކޮށްފައިވާ ޒުވާނެއްކަން ފާހަގަކުރައްވައި ހޯމަ ދުވަހު އެކްސްގައި އިފްހާމް ކުރެއްވި ޕޯސްޓެއްގައި ވިދާޅުވީ ނުކުޅެދުންތެރިކަން ހުންނަ ފަރާތްތަކަށް ވަޒީފާގެ ފުރުސަތު ފަހިކޮށްދިނުމުގެ ސިޔާސަތުގެ ދަށުން އެޒުވާނާ ވަޒީފާ އަދާކުރަމުން ދިޔައީ ފެނަކައިގެ ރަށު އޮފީހުގައި ކަމަށެވެ.

ނަމަވެސް، ރަށު ތެރޭގައި ކުރިމަތިވި ބުލީކުރުމުގެ މައްސަލަތަކުގެ ސަބަބުން އެ ޒުވާނާގެ ނަފްސާނީ ހާލަތު ގޯސްވެ، އާއިލާއަށް ޖެހުނީ ނަފްސާނީ ދުޅަހެޔޮކަމަށްޓަކައި މާލެއަށް ދިރިއުޅުން ބަދަލުކުރަން ކަމަށް އޭނާ ވިދާޅުވި އެވެ. 

އާއިލާ މާލެއަށް ބަދަލުވުމާ ގުޅިގެން ފެނަކައިގެ މާލޭ އޮފީހުން ވަޒީފާ ހަމަޖައްސައިދިނުމަށް އެދުމުން ދިން ޖަވާބަށް އިޝާރާތް ކުރައްވައި އިފްހާމް ވިދާޅުވީ، މާލޭ އޮފީހުގައި ޖާގަ ނެތް ކަމަށް ބުނެފައިވާ ކަމަށާއި، ހަތަރު މަހުގެ މުސާރަ ދިނުމަށްފަހު ވަޒީފާއިން ވަކިވުމަށް އެޒުވާނާ އަށް އަންގާފައިވާ ކަމަށެވެ.

ރާއްޖެ ޓީވީގެ ފަލަސުރުހީ ޕްރޮގްރާމުގައި ޖެންޑަރ މިނިސްޓްރީގެ ސްޓޭޓް މިނިސްޓަރ އިފްހާމް ހުސައިން ވާހަކަ ދައްކަވަނީ

އިފްހާމް ވިދާޅުވީ، ސިޔާސީ ބޭނުންތަކަށް ފެނަކައިން އެތައް ހާސް މުވައްޒަފުންނަކަށް ނިމިދިޔަ އިންތިޚާބުތަކުގައި ވަޒީފާ ދީފައިވާއިރު، މިފަދަ ޚާއްސަ އެހީތެރިކަމަށް ބޭނުންވާ ފަރާތެއްގެ ވަޒީފާ، ޖާގަނެތް ކަމަށްބުނެ ބަދަލުކޮށް ނުދީ ވަޒީފާއިން ވަކިކުރުމަކީ ބަލައިގަނެވޭނެ ކަމެއް ނޫން ކަމަށެވެ. 

މީގެ އިތުރުން މި މައްސަލައަކީ އެކަނިވެރި މައެއްގެ ގޮތުގައި ދަރިފުޅު ބަލަހައްޓަމުންދާ އެ މަންމައަށް ލިބުނު ބޮޑު މާޔޫސްކަމެއްގެ ގޮތުގައި އިފްހާމް ސިފަކުރެއްވި އެވެ. އަދި އެ މަންމަ މިއަދުވެސް ޖެންޑަރ މިނިސްޓްރީގައި އޭނާ ގެ ދަރިފުޅު ބިކަވިޔަނުދީ ވަޒީފާގެ ފުރުސަތެއް ހޯދައިދިނުމަށް އެދި އާދޭސް ކުރަމުންދާ ކަމަށް އިފްހާމް ވިދާޅުވި އެވެ. 

އިފްހާމް ވަނީ މިފަދަ ނާޒުކު ހާލަތްތަކުގައި ތިބޭ ފަރާތްތަކަށް އިހުމާލުނުވެ، އެ ފަރާތަށް ވަޒީފާގެ ފުރުސަތު އަލުން ހަމަޖައްސައިދިނުމަށް ސަރުކާރަށް ގޮވާލައްވާފަ އެވެ.

މިސަރުކާރުން ބައެއް މީހުންނާ މެދު ވަރަށް ބޮޑަށް އަނިޔާވެރިވަމުންދާ ކަމަށް ތުހުމަތުތައް ކުރެވޭއިރު، 13 ޖުލައި ފެށިގެން ކުރިއަށް އޮތް 3 މަސް ދުވަހުގެ ތެރޭގައި  ސަރުކާރު ކުންފުނިތަކުގެ މުވައްޒަފުންގެ އަދަދު 33 އިންސައްތަ މަދުކުރަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ވަނީ އަންގާފަ އެވެ. މިފަދަ އެންގުމެއް އޭޕްރީލް މަހުގެ ތެރޭގައި އެންގި ނަމަވެސް ސަރުކާރުން އޭރު އެއާ އެއްގޮތަށް އަމަލުނުކޮށް އެމަހުގެ ތެރޭގައި ބޭއްވި ލޯކަލް ކައުންސިލް އިންތިޚާބާ ދިމާކޮށް ގިނަ ބަޔަކަށް ސިޔާސީ ގޮތުން ވަޒީފާ ދީފައިވެ އެވެ. 

އިންތިޚާބުގެފަހުން ކުންފުނިތަކުން މުވައްޒަފުންގެ އަދަދު މަދުކުރުމުގެ މަސައްކަތް ސަރުކާރުން ކުރަމުން ދާއިރު އިދިކޮޅު އެމްޑީޕީއަށް ނިސްބަތްވާ މުވައްޒަފުން ވަޒީފާތަކުން ވަކިކުރަމުންދާ ކަމުގެ އަޑު ވަނީ ގަދަ ވެފަ އެވެ.