އެއްކޮޅުން ވަޒީފާތައް ބަހަމުން، އަނެއްކޮޅުން ގިނަބަޔަކު ވަޒީފާ އިން ވަކި ކުރުމަށް ފެނަކައިގެ ރިޑަންޑަންސީ ޕޮލިސީ ބަދަލުކޮށްފި
ފެނަކައިގެ ބައެއް ޚިދުމަތްތައް ސްޓެލްކޯއަށް ބަދަލުކުރުމަށް ޕީސީބީން އެންގުމާ ގުޅިގެން، ކުންފުނީގެ އިދާރީ އޮނިގަނޑަށް އަންނަ ބަދަލުތަކުގެ ސަބަބުން މުވައްޒަފުން ވަކިކުރެވޭނެ އާ އުސޫލެއް ވަނީ އެކުލަވާލާފަ. މި އުސޫލުގެ ދަށުން މާލީ ހާލަތަށް ރިއާޔަތްކޮށް މުވައްޒަފުން މަދުކުރުމުގެ ބާރު ކުންފުންޏަށް ލިބިދޭއިރު، މުވައްޒަފުން ވަކިކުރަން ނިންމާފައިވާ ދަނޑިވަޅެއްގައި ސިޔާސީ މަގާމުތަކަށް މީހުން އިތުރުކުރަމުންދާތީ އާންމުންގެ ފާޑުކިޔުން ވަނީ އަމާޒުވެފަ. މި ބަދަލުތަކަކީ ކުންފުނީގެ ހިންގުން ހަރުދަނާކޮށް ޚިދުމަތުގެ ފެންވަރު މަތިކުރުމަށް އަޅާ ފިޔަވަޅުތަކެއް ކަމަށް ފެނަކައިން ބުނޭ.
އިންތިހާބުތަކާ ދިމާކޮށް މިސަރުކާރުން ވަނީ އެތައް ހާސް ވަޒީފާ އެއް، އެންމެ ބޮޑު ގެއްލުމަކާ އެކު ހިންގާ ފެނަކަ އިން ދީފަ. | ރާއްޖެއެމްވީ
ފެނަކަ ކޯޕަރޭޝަން ލިމިޓެޑަށް މާލީގޮތުން ކުރިމަތިވެފައިވާ ބޮޑެތި ގޮންޖެހުންތަކުން އަރައިގަތުމަށް ކަމަށް ބުނެ، އެ ކުންފުނީގެ ގިނަ އަދަދެއްގެ މުވައްޒަފުން ވަޒީފާއިން ވަކިކުރެވޭ ގޮތަށް "ރިޑަންޑަންސީ އުސޫލު" އިސްލާހުކޮށް އަމަލުކުރަން ފަށައިފި އެވެ.
މި އާ އުސޫލު ފާސްކޮށްފައިވަނީ މި ހިނގާ މެއި މަހުގެ 13 ވަނަ ދުވަހު ބޭއްވި އެ ކުންފުނީގެ ޑިރެކްޓަރުންގެ ބޯޑު ބައްދަލުވުމުގަ އެވެ.
ފެނަކަ އިން އާންމުކޮށްފައިވާ ސާކިއުލާއެއްގައި ބުނެފައިވަނީ، ކުންފުނީގެ މާލީ ހާލަތު ރަނގަޅުކޮށް، ހިންގުން ހަރުދަނާކުރުމަށްޓަކައި އަޅަންޖެހޭ ފިޔަވަޅުތައް އެޅުމަށް ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަންގާފައިވާ ކަމަށެވެ. މީގެ އިތުރުން، ބ. އަތޮޅުން ފެށިގެން މ. އަތޮޅާ ހަމައަށް ފެނަކައިން ފޯރުކޮށްދެމުންދާ ހުރިހާ ޚިދުމަތްތަކެއް ސްޓޭޓް އިލެކްޓްރިކް ކޮމްޕެނީ ލިމިޓެޑް (ސްޓެލްކޯ) އަށް ބަދަލުކުރުމަށްވެސް ޕީސީބީން ވަނީ އަންގާފަ އެވެ.
މި ބަދަލުތަކާ ގުޅިގެން ކުންފުނީގެ އިދާރީ އޮނިގަނޑަށް ގެނެވޭ ބަދަލުތަކުގެ ސަބަބުން، މުވައްޒަފުން ވަޒީފާ އިން ވަކިކުރަންޖެހޭ ހާލަތްތަކުގައި އަމަލުކުރާނެ ގޮތްތައް "ފެނަކަ ކޯޕަރޭޝަން ލިމިޓެޑުގެ ރިޑަންޑަންސީ އުޞޫލު 2024" ގައި ވަނީ ބަޔާންކޮށްފަ އެވެ. މި އުސޫލުގެ ދަށުން މުވައްޒަފުން ވަޒީފާއިން ވަކިކުރެވޭނެ މައިގަނޑު ހަތަރު ހާލަތެއް ވަނީ ކަނޑައަޅާފަ އެވެ.
އޭގެ ތެރޭގައި ހިމެނެނީ ކުންފުނިން ހިންގާ ވިޔަފާރިއެއް ނުވަތަ ދެމުންގެންދާ ޚިދުމަތެއް ހުއްޓާލުމާއި، ކުންފުނީގެ ހިންގުމަށް އަންނަ ބަދަލަކާ ގުޅިގެން މަގާމެއް އުވިގެން ދިއުމެވެ. އަދި ކުންފުނީގެ އިދާރީ އޮނިގަނޑަށް ގެނެވޭ ބަދަލެއްގެ ތެރެއިން މަގާމެއް އުނިވުމުގެ އިތުރުން، ކުންފުނީގެ މާލީ ހާލަތު ދަށްވުމުގެ ސަބަބުން މުވައްޒަފުން މަދުކުރަންޖެހޭ ހާލަތްތަކުގައިވެސް މުވައްޒަފުން ވަކިކުރުމުގެ ބާރު މި އުސޫލުން ކުންފުންޏަށް ލިބިދެ އެވެ.
ފެނަކައިން ބުނެފައިވަނީ މި ބަދަލުތަކަކީ ރައްޔިތުންނަށް ދެވޭ ޚިދުމަތުގެ ފެންވަރު މަތިކުރުމަށާއި، ކުންފުނިން ނިންމަންޖެހޭ ނިންމުންތައް އަވަހަށް ތަންފީޒުކުރުމަށް މަގުފަހިކުރުމަށް ގެނެވޭ ބަދަލުތަކެއް ކަމަށެވެ. އަދި މިކަމާ ގުޅޭގޮތުން އިތުރު މައުލޫމާތު ސާފުކުރަން ބޭނުންވާ މުވައްޒަފުންނަށް ކުންފުނީގެ ހިއުމަން ރިސޯސަސް ޑިޕާޓްމެންޓުން އެހީތެރިކަން ފޯރުކޮށްދޭނެ ކަމަށްވެސް އެ ކުންފުނިން ބުނެއެވެ.
ނަމަވެސް، ކުންފުނީގެ މާލީ ހާލަތު ގޯސްވެގެން މުވައްޒަފުން ވަކިކުރަން އާ އުސޫލެއް އެކުލަވާލާފައިވާއިރު، ސިޔާސީ ބޭނުންތަކަށްޓަކައި އަދިވެސް ކުންފުންޏަށް އާ މުވައްޒަފުން އިތުރުކުރަމުންދާ ކަމުގެ ޝަކުވާ އާންމުންގެ މެދުގައި ވަނީ ބޮޑުވެފަ އެވެ. އެއްކޮޅުން ގިނަ އަދަދެއްގެ މުވައްޒަފުން ވަޒީފާ އިން ވަކިކުރުމުގެ ބިރުވެރިކަން އުފެދިފައިވާއިރު، އަނެއްކޮޅުން ސިޔާސީ ނުފޫޒުން ވަޒީފާ ބަހަމުންދާ ދިއުމަކީ ކުންފުނީގެ މާލީ ހާލަތު އިތުރަށް ގޯސްވެދާނެ ކަމެއްގެ ގޮތުގައި ގިނަ ބަޔަކު ދެކެ އެވެ.
