ހޫޘީ އިން ދެމުން އަންނަ ހަމަލާތައް، އިތުރު ހަ މަސް ދުވަހަށް މޮނިޓާ ކުރުމަށް އދ.ގެ ސަލާމަތީ މަޖިލީހުން ފާސްކޮށްފި

ރަތް ކަނޑުގައި ހަރަކާތްތެރިވާ ޔަމަންގެ ހޫޘީން ދެމުންދާ ހަމަލާތައް މޮނިޓާ ކުރުމުގެ މަސައްކަތް އިތުރު ހަ މަސް ދުވަހަށް ކުރިއަށް ގެންދިއުމަށް އެކުވެރި ދައުލަތްތައް (އދ) ގެ ސަލާމަތީ މަޖިލީހުން ފާސްކޮށްފި އެވެ.

މި ނިންމުން ފާސްކޮށްފައި ވަނީ މިކަމަށްޓަކައި ސަލާމަތީ މަޖިލީހުގައި ނެގުނު ވޯޓުގައި ބައިވެރިވި ގައުމު ތަކުގެ ތެރެއިން 13 ގައުމެއްގެ ތާއީދާ އެކުގައި އެވެ. ނަމަވެސް މި ވޯޓުގައި ރަޝިޔާ އަދި ޗައިނާ އިން ބައިވެރިވެފައި ނުވެ އެވެ. މި ގަރާރު ފާސްވުމާ ގުޅިގެން، ރަތް ކަނޑުގެ ހާލަތާ ގުޅޭ ގޮތުން ކޮންމެ މަހަކު އެއް ފަހަރު އދ.ގެ ސެކްރެޓަރީ ޖެނެރަލް ސަލާމަތީ މަޖިލީހަށް ރިޕޯޓެއް ހުށަހަޅުއްވަން ޖެހޭނެ އެވެ.

ޔަމަންގައި ހަރަކާތްތެރިވާ ހޫޘީން ރަތް ކަނޑުން ދަތުރުކުރާ އުޅަނދު ފަހަރަށް އަމާޒުކޮށް ހަމަލާ ދޭން ފަށާފައި ވަނީ 2023 ވަނަ އަހަރުގެ ފަހު ކޮޅުގައި އެވެ. ހޫޘީން ބުނަމުން ދަނީ މި ހަމަލާ ތަކަކީ އިޒްރޭލް އިން ޣައްޒާގައި ހިންގަމުންދާ ގަތުލުއާންމާ ދެކޮޅަށް ދެމުންދާ ހަމަލާ ތަކެއް ކަމަށާއި، އެމީހުން އަމާޒު ކުރަނީ އިޒްރޭލްއާ ގުޅުންހުރި އުޅަނދު ފަހަރަށް ކަމަށެވެ.

ދުނިޔޭގެ ވިޔަފާރީގެ މުހިންމު މަގަކަށްވާ ރަތް ކަނޑުގައި ހޫޘީން ދެމުންދާ ހަމަލާ ތަކުގެ ސަބަބުން، ބައިނަލްއަޤުވާމީ ކަނޑު ދަތުރު ފަތުރަށް ބޮޑެތި ހުރަސް ތަކެއް ވަނީ ކުރިމަތިވެފައި އެވެ. މިކަމުގެ ސަބަބުން ގިނަ ކުންފުނި ތަކަކުން މިހާރު ދަތުރު ފަތުރުގެ މަގު ބަދަލުކޮށް، ދިގު މަގު ތަކުން ދަތުރު ކުރަން ވަނީ މަޖުބޫރުވެފައި އެވެ.

އދ.ގެ ސަލާމަތީ މަޖިލީހުން މި ނިންމުން ނިންމާފައި ވަނީ ރަތް ކަނޑުގެ ސަލާމަތާއި ރައްކާތެރިކަން ކަށަވަރު ކުރުމަށް ބައިނަލްއަޤުވާމީ ފެންވަރުގައި ކުރަމުންދާ މަސައްކަތް ތަކުގެ ތެރެއިންނެވެ. މޮނިޓާ ކުރުމުގެ މުއްދަތު އިތުރު ކުރުމުން، ހޫޘީންގެ ހަރަކާތްތަކާއި، އޭގެ ސަބަބުން ކުރާ އަސަރުތައް ގާތުން ބަލައި، އަޅަން ޖެހޭ ފިޔަވަޅުތަކާ މެދު މަޝްވަރާ ކުރުމުގެ ފުރުސަތު ސަލާމަތީ މަޖިލީހަށް ލިބިގެންދާނެ އެވެ.