ކުވޭތުގެ ބޯޑަރު މަރުކަޒުތަކަކާއި ތެޔޮ ޕްލެޓްފޯމަކަށް ހަމަލާދީފި
ކުވޭތުގެ އުތުރު ބޯޑަރުގެ ތިން މަރުކަޒަކަށް ދިން ޖިނާއީ ހަމަލާތަކަކާއި، ކަނޑުގެ ސަރަހައްދުގައި ހުރި ތެޔޮ ޕްލެޓްފޯމަކަށް އަމާޒުވި ޑްރޯން ހަމަލާއެއްގައި މުވައްޒަފަކަށް އަނިޔާވެއްޖެއެވެ. މި ހަމަލާތަކާ ގުޅިގެން އެ ތަންތަނަށް ބޮޑެތި ގެއްލުންތަކެއް ލިބިފައިވާ ކަމަށް އެ ގައުމުގެ ޑިފެންސް މިނިސްޓްރީން ވަނީ ހާމަކޮށްފައެވެ.
ހޫނު ޚަބަރު
ކުވޭތުގެ ބޯޑަރު ސަރަހައްދުގެ ތިން މަރުކަޒަކަށާއި، ކަނޑުގެ ސަރަހައްދުގައި ހުރި ތެޔޮ ނަގާ ޕްލެޓްފޯމަކަށް ހަމަލާތަކެއް ދީފި ކަމަށާއި، މި ހަމަލާތަކުގެ ސަބަބުން ބޮޑެތި ގެއްލުންތަކެއް ލިބިފައިވާ ކަމަށް އެ ގައުމުން ހާމަކޮށްފި އެވެ.
ކުވޭތުގެ ޑިފެންސް މިނިސްޓްރީން ނެރުނު ބަޔާނެއްގައި ބުނެފައިވަނީ، އެ ގައުމުގެ އުތުރުގެ ބޯޑަރު ސަރަހައްދުގައި ހުންނަ އެއްގަމު ބޯޑަރުގެ ތިން މަރުކަޒަކަށް "ހަމަލާތަކެއް" އަމާޒުވެފައިވާ ކަމަށެވެ.
މީގެ އިތުރުން، ކުވޭތުގެ ކަނޑުގެ ސަރަހައްދުގައި ކުވޭތު އޮއިލް ކޮމްޕެނީން ތެޔޮ ނެގުމުގެ މަސައްކަތް ކުރަމުންދާ ޕްލެޓްފޯމަކަށް ޑްރޯން ހަމަލާއެއް ދީފައިވާ ކަމަށްވެސް އެ ބަޔާނުގައި ބުނެފައިވެ އެވެ. މި ހަމަލާގައި އެ ތަނުގައި މަސައްކަތް ކުރަމުންދިޔަ މުވައްޒަފަކަށް އަނިޔާވެފައިވާ ކަމަށްވެސް އެ ގައުމުގެ ސަރުކާރުން ވަނީ ހާމަކޮށްފަ އެވެ.
