ހިތަދޫ އުތުރު ދާއިރާގެ ބައި އިލެކްޝަންގެ ވަގުތީ ނަތީޖާ އިން ސޯބެ ކުރި ހޯއްދަވައިފި
ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ ބައި-އިލެކްޝަންގެ ވޯޓުލުން ހޮނިހިރު ދުވަހުގެ ހެނދުނުން ފެށިގެން ހަވީރުގެ ނިޔަލަށް ވަނީ ކުރިއަށް ގެންގޮސްފަ. މި އިންތިޚާބުގައި ވޯޓުލުމަށްޓަކައި ހިތަދޫ އާއި މާލޭގައި ޖުމްލަ 7 ފޮއްޓެއް ބަހައްޓާފައިވާއިރު، 4،121 މީހުންނަށް ވޯޓު ދިނުމުގެ ހައްޤު ލިބިގެންވޭ. އިލެކްޝަންސް ކޮމިޝަނުން މިހާރު ވަނީ ވޯޓުލުން ނިންމާލައި، ވަގުތީ ނަތީޖާތައް އިއުލާންކުރަން ފަށާފަ.
ހޫނު ޚަބަރު
ރައްޔިތުންގެ މަޖިލީހުގެ ހުސްވެފައިވާ ހިތަދޫ އުތުރު ދާއިރާގެ ބައި އިލެކްޝަންގެ ވަގުތީ ނަތީޖާ އިން އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ކެނޑިޑޭޓް އަބްދުﷲ ސޯދިގު (ސޯބެ) ކުރި ހޯއްދަވައިފި އެވެ.
ސަރުކާރު ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ ފަރާތުން ވާދަކުރައްވާފައި ވަނީ އަހުމަދު ސައީދު (ސޮޑާ) އެވެ.
ވަގުތީ ނަތީޖާ ދައްކާގޮތުން ހަތް ވޯޓު ފޮށިން އެމްޑީޕީ ގެ ކެންޑިޑޭޓް ސޯދިގު އަށް ލިބިފައިވަނީ 1337 ވޯޯޓެވެ. އަދި ޕީއެންސީގެ ކެންޑިޑޭޓް ސައީދު އަށް ލިބިފައިވަނީ 1312 ވޯޓެވެ.
މި އިންތިޚާބުގެ ވޯޓުލުން ފަށާފައިވަނީ ހޮނިހިރު ދުވަހުގެ ހެނދުނު 8:00 ގަ އެވެ. ވޯޓުލުން މިއަދު ހަވީރު 5:00 އާ ހަމައަށް ވަނީ ކުރިއަށް ގެންގޮސްފަ އެވެ.
މި އިންތިޚާބުގައި ވޯޓުލުމަށްޓަކައި ޖުމްލަ 7 ވޯޓު ފޮއްޓެއް ވަނީ ބަހައްޓާފަ އެވެ. އޭގެ ތެރޭގައި ހިމެނެނީ އައްޑޫ ސިޓީ ހިތަދޫގައި ބަހައްޓާފައިވާ 5 ފޮއްޓާއި، މާލޭގައި ދިރިއުޅޭ އެ ދާއިރާގެ ރައްޔިތުންނަށް ޚާއްޞަކޮށްގެން މާލޭގައި ބަހައްޓާފައިވާ 2 ފޮއްޓެވެ. ހިތަދޫގައި ވޯޓު ފޮށިތައް ބަހައްޓާފައިވަނީ ހިތަދޫ ސްކޫލްގަ އެވެ.
މާލޭގައި ވޯޓުލުން ކުރިއަށްދަނީ ދަރުމަވަންތަ ސްކޫލްގަ އެވެ. އިލެކްޝަންސް ކޮމިޝަނުން ހާމަކޮށްފައިވާ ތަފާސްހިސާބުތަކަށް ބަލާއިރު، މި ބައި-އިލެކްޝަންގައި ވޯޓު ދިނުމުގެ ހައްޤު ޖުމްލަ 4،121 މީހުންނަށް ލިބިގެންވެ އެވެ.
