އީރާނުގެ ދެކުނުގެ ސަރަހައްދުތަކަށް ހަމަލާ ދީފި

އީރާނުގެ ދެކުނުގައި އޮންނަ ހުރްމުޒްގާން ޕްރޮވިންސްގެ ބަންދަރު އައްބާސް އާއި، ގޭޝްމް އައިލެންޑް އަދި ހާޖީއާބާދަށް ބާރުގަދަ ގޮވުންތަކެއްގެ އަޑު އިވިފައިވާ ކަމަށް އެ ގައުމުގެ ދައުލަތުގެ މީޑިއާއިން ރިޕޯޓްކޮށްފި އެވެ.

އީރާނުގެ ސަރުކާރުގެ ޚަބަރު ފަތުރާ އިދާރާ، އިރްނާ (IRNA) އަށް މައުލޫމާތު ދެއްވަމުން ގޭޝްމްގެ ގަވަރުނަރު ހުސައިން އަމީރު ތައިމޫރީ ވިދާޅުވީ، ދުޝްމަނުންގެ 10 ނުވަތަ 11 ހަމަލާއެއް އެ ރަށަށް އަމާޒުވެފައިވާ ކަމަށެވެ.

ގަވަރުނަރު ވިދާޅުވި ގޮތުގައި މި ހަމަލާތައް އަމާޒުކޮށްފައިވަނީ ހަމައެކަނި އަސްކަރީ މަރުކަޒުތަކަށެވެ. އަދި މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް މިހާތަނަށް ލިބިފައި ނުވާ ކަމަށްވެސް އޭނާ ވިދާޅުވި އެވެ.

އިރްނާ ނިއުސް އެޖެންސީން ރިޕޯޓްކޮށްފައިވާ ގޮތުގައި، ގޭޝްމްގެ އިތުރުން ބަންދަރު އައްބާސްގެ ބަނދަރު ސަރަހައްދާއި ހާޖީއާބާދުން ވެސް ވަނީ ގޮވުންތަކުގެ އަޑު އިވިފަ އެވެ.

އީރާނުގެ ރަސްމީ މަސްދަރުތަކުން އިރްނާ އަށް މައުލޫމާތު ދީފައިވާ ގޮތުގައި، ހަމަލާ އަމާޒުވި ހުރިހާ ސަރަހައްދުތަކަކީ ވެސް އަސްކަރީ މަރުކަޒުތައް ހުންނަ ސަރަހައްދުތަކެވެ. އަދި މި ހަމަލާތަކާ ގުޅޭ އިތުރު ތަހުގީގުތައް މިހާރު ކުރިއަށްދާ ކަމަށް ވެސް އެ ފަރާތްތަކުން ބުނެފައިވެ އެވެ.