އިރާނުން ޑްރޯން އުފެއްދުން ތިން ގުނައަށް އިތުރުކޮށްފި

އެމެރިކާ އާއި އިސްރާއީލުން ދާދިފަހުން އެ ގައުމާ ދެކޮޅަށް ހިންގި އުދުވާނީ ހަނގުރާމައިގެ ތެރޭގައި، އެ ގައުމުން އަމިއްލައަށް އުފައްދާ އެކި ބާވަތްތަކުގެ ޑްރޯން ނުވަތަ އިންސާނަކާ ނުލައި އުދުހޭ އުޅަނދުތައް އުފެއްދި މިންވަރު ތިން ގުނައަށް ވަނީ އިތުރުވެފައިވާ ކަމަށް އިރާނުގެ ވަގުތީ ދިފާއީ ވަޒީރު ވިދާޅުވެއްޖެ އެވެ. އަދި އެ ދުވަސްވަރު އިރާނުން އަމިއްލައަށް އުފައްދާ ހަތިޔާރާއި އަސްކަރީ ސާމާނު އުފެއްދުމުގެ މަސައްކަތްތައް ފުރިހަމަ ބާރުމިނުގައި ކުރިއަށްދިޔަކަން ވެސް ވަޒީރު ވަނީ ފާހަގަކުރައްވާފަ އެވެ.

ޕާލަމަންޓުގެ ނޭޝަނަލް ސެކިއުރިޓީ އެންޑް ފޮރިން ޕޮލިސީ ކޮމިޝަނުގެ މެންބަރުންނާއެކު ބޭއްވި ބައްދަލުވުމަކަށްފަހު، ބްރިގޭޑިއާ ޖެނެރަލް މަޖީދު އިބްނު އަލް-ރިޒާ ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ވިދާޅުވީ، ދާދިފަހުން ކުރިމަތިވި ހަމަލާތަކުން އެނގިގެންދިޔައީ އިރާނުގެ ދިފާއީ ބާރުގެ އެންމެ މުހިންމު ތަނބަކީ އެ ގައުމުގެ ފަންނީ މާހިރުންނާއި، އެންމެ ފަހުގެ ޒަމާނީ ޓެކްނޮލޮޖީއަށް ކުރާ އިންވެސްޓްމަންޓްތައް ކަމަށެވެ.

މީގެ އިތުރުން އޭނާ ވިދާޅުވީ، ހަނގުރާމައިގެ ތެރޭގައި ދިފާއީ އާލާތްތައް އުފެއްދުމުގެ މަސައްކަތް އެއްވެސް މެދުކެނޑުމެއް ނެތި ކުރިއަށްދިޔަ ކަމަށާއި، އޭގެ އިތުރުން ޑްރޯން އުފެއްދުމުގެ ގާބިލުކަން ތިން ގުނައަށް އިތުރުވެގެންދިޔަ ކަމަށެވެ.

އެމެރިކާ އާއި އިސްރާއީލުން އިރާނާ ދެކޮޅަށް ކުރި ދެވަނަ އުދުވާނީ ހަނގުރާމަ ފެށީ ފެބްރުއަރީ މަހުގެ 28 ވަނަ ދުވަހުއެވެ. މި ހަނގުރާމަ ފެށީ އިރާނުގެ އިސްލާމީ އިންގިލާބުގެ ލީޑަރު އާޔަތުﷲ ސައްޔިދު އަލީ ޚާމަނާއީ އާއި އަސްކަރިއްޔާގެ އިސް ކޮމާންޑަރުންތަކެއް އަވަހާރަކޮށްލުމާ އެކުގަ އެވެ.

މި ހަމަލާތަކުގެ ރައްދުގައި އިރާނުގެ ސިފައިން ވަނީ 40 ދުވަހުގެ ތެރޭގައި 100 ފަހަރަށްވުރެ ގިނައިން ރައްދު ހަމަލާދީފަ އެވެ. އެމެރިކާ އާއި އިސްރާއީލުގެ އަސްކަރީ މަރުކަޒުތަކަށް އަމާޒުކޮށް ދިން މި ހަމަލާތަކުގައި އެ ގައުމުތަކުގެ އަސްކަރީ ވަސީލަތްތަކަށް ބޮޑެތި ގެއްލުންތަކެއް ލިބިފައިވެ އެވެ.

ޖޫން މަހުގެ 15 ވަނަ ދުވަހު ވޮޝިންޓަނާއި ތެހެރާނުން ވަނީ ޕާކިސްތާނު މެދުވެރިވެގެން އެއްބަސްވުމަކަށް އާދެވިފައިވާކަން އިއުލާންކޮށްފަ އެވެ. މި އެއްބަސްވުމުގެ މަގްސަދަކީ ލުބުނާން ހިމެނޭހެން އެކި ސަރަހައްދުތަކުގައި ކުރިއަށްދާ އަސްކަރީ ހަރަކާތްތައް ހުއްޓާލުމާއި، ހުރްމުޒް ކަނޑުއޮޅި އަލުން ހުޅުވާލުމުގެ އިތުރުން، އިރާނާ ދެކޮޅަށް ކަނޑުގެ މަގުން އަޅާފައިވާ ހުރަސްތައް ނައްތާލުމެވެ.