އީރާނުން ދޭ ރައްދު ހަމަލާތަކުން އިސްރާއީލަށް ސަލާމަތް ނުވެވޭނެ: އީރާން
10 ޖުލައި 2026 | ހުކުރު 13:02އީރާނުގެ އަސާސީ ވަސީލަތްތަކަށް ދޭ ކޮންމެ ހަމަލާއެއްގެ ބަދަލު ހިފާނެ ކަމަށް އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލުން ވަނީ ބުނެފައި. އިސްރާއީލުން ހިންގާ ލާއިންސާނީ އަމަލުތަކާ ގުޅިގެން އީރާނުގެ މުޖާހިދުން ދޭ ރައްދު ހަމަލާތަކުން އެ ގައުމަށް ސަލާމަތް ނުވެވޭނެ ކަމުގެ އިންޒާރުވެސް އެ ކައުންސިލުން ވަނީ ދީފައި.
އީރާނުގެ ތެހެރާނުގައި 2026 ވަނަ އަހަރުގެ މާރިޗު މަހުގެ 4 ވަނަ ދުވަހު ދިން ހަމަލާއެއްގައި ގެއްލުން ލިބިފައިވާ މީހުން ދިރިއުޅޭ އިމާރާތެއްގެ ކައިރީގައި، އެ ގައުމުގެ ދިދަ ވިހުރެމުންދަނީ؛ މި ފޮޓޯ ނަގާފައިވަނީ 2026 އޭޕްރިލް 14 ގައި. | ރޮއިޓާސް
އީރާނުގެ އިންފްރާސްޓްރަކްޗަރ ނުވަތަ އަސާސީ ވަސީލަތްތަކަށް ދޭ ކޮންމެ ހަމަލާއަކަށް ރައްދުދޭނެ ކަމަށް އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ އިސްވެރިޔާ ވިދާޅުވެއްޖެ އެވެ. އެމެރިކާއާއި އީރާނާ ދެމެދު ފަހަކަށް އައިސް ބަދަލުކުރަމުންދާ ހަމަލާތަކާ ގުޅިގެން، އީރާނުން ދޭ ރައްދު ހަމަލާތަކުން އިސްރާއީލަށް ސަލާމަތް ނުވެވޭނެ ކަމުގެ އިންޒާރުވެސް އޭނާ ވަނީ ދެއްވާފައެވެ.
އީރާނުގެ ދައުލަތުގެ ޓީވީން އާންމުކުރި ބަޔާނެއްގައި، އެ ގައުމުގެ ސުޕްރީމް ނޭޝަނަލް ސެކިއުރިޓީ ކައުންސިލްގެ ސެކްރެޓަރީ މުޙައްމަދު ބާގިރު ޒުލްގަދަރު ވިދާޅުވީ، މީގެ ކުރިންވެސް އިއުލާންކޮށްފައިވާ ފަދައިން، އީރާނުގެ އިންފްރާސްޓްރަކްޗަރއަށް ދޭ ކޮންމެ ހަމަލާއެއްގެ ބަދަލު ހިފާނެ ކަމަށެވެ. އަދި މިފަދަ ލާއިންސާނީ އަމަލުތައް ހިންގާ ޒަޔަނިސްޓް އިސްރާއީލުގެ މުޖުރިމު ސަރުކާރަށް، އީރާނުގެ މުޖާހިދުންގެ ފަރާތުން ލިބޭ ރައްދު ހަމަލާތަކުން ސަލާމަތް ނުވެވޭނެ ކަމަށްވެސް އޭނާ ވިދާޅުވި އެވެ.
