އީރާނުގެ ކުރީގެ އެންމެ މަތީ ވެރިޔާގެ މަރަށް ބަދަލުހިފުމަކީ "ގައުމީ ވާޖިބެއް" ކަމަށާއި، އެކަން "ލަސްނުވެ ހިނގާނެ" ކަމަށް މުޖުތަބާ ޚާމަނާއީ ވިދާޅުވެއްޖެ
11 ޖުލައި 2026 | ހޮނިހިރު 12:22އީރާނުގެ ކުރީގެ ލީޑަރު އަވަހާރަކޮށްލި މީހުންގެ ކިބައިން ބަދަލުހިފުމަކީ ގައުމީ ވާޖިބެއް ކަމަށް އެ ގައުމުގެ އާ އެންމެ މަތީ ވެރިޔާ މުޖުތަބާ ޚާމަނާއީ ވިދާޅުވެއްޖެއެވެ. އެމެރިކާގެ ކުރީގެ ރައީސް ޓްރަމްޕް އަވަހާރަކޮށްލަން އީރާނުން ރާވަމުންދާ ކަމަށް އިސްރާއީލުން ތުހުމަތުކުރާއިރު، މުޖުތަބާ އަދިވެސް ހުންނެވީ އާންމުންނަށް ފެނިވަޑައިނުގެން ސިއްރުވެރި ހާލަތެއްގައެވެ. އެހެންކަމުން މި އިންޒާރާއެކު ދެ ގައުމުގެ މެދުގައި އޮތް ނުތަނަވަސްކަން ވަނީ އިތުރަށް ބޮޑުވެފައެވެ.
އީރާނުގެ އަވަހާރަކޮށްލާފައިވާ ކުރީގެ ރޫހާނީ ލީޑަރު އަލީ ޚާމަނާއީ (ވ) އާއި، އޭނާގެ ދަރިކަލުން އަދި މިހާރުގެ ރޫހާނީ ލީޑަރު މުޖުތަބާ ޚާމަނާއީ ފެންނަ ބިލްބޯޑެއްގެ ކައިރިން ތެހެރާނުގައި މީހަކު ހިނގާފައި ދަނީ. | ގެޓީ އިމޭޖަސް
އީރާނުގެ އެންމެ މަތީ ވެރިޔާ މުޖުތަބާ ޚާމަނާއީގެ ޓެލެގްރާމް އެކައުންޓް މެދުވެރިކޮށް ހޮނިހިރު ދުވަހު އާންމުކުރި ލިޔުމެއްގައި، އަވަހާރަކޮށްލާފައިވާ އޭނާގެ ބައްޕާފުޅު އަދި އީރާނުގެ ކުރީގެ އެންމެ މަތީ ވެރިޔާގެ މަރަށް ބަދަލުހިފުމަކީ "ގައުމީ ވާޖިބެއް" ކަމަށާއި، އެކަން "ލަސްނުވެ ހިނގާނެ" ކަމަށް ވިދާޅުވެއްޖެ އެވެ.
އަވަހާރަކޮށްލާފައިވާ ލީޑަރަށް ނިސްބަތްކުރައްވައި އެ ބަޔާނުގައި ވިދާޅުވެފައިވަނީ، "ތިޔަ މާތް ލެޔާއި، މި ދެ ހަނގުރާމައިގައި ޝަހީދުވި އެންމެހައި ފަރާތްތަކުގެ ލެޔަށް، ކުށްވެރި އަދި އަބުރުގެއްލިފައިވާ ގާތިލުންގެ ކިބައިން ބަދަލުހިފާނެކަމުގެ ވައުދު އަހަރެމެން ވަމެވެ."
މީގެ އިތުރުން، އެ ބަޔާނުގައި ވިދާޅުވެފައިވަނީ، "އެންމެ މަތިން ފެށިގެން ތިރިއަށް ނަންތައް އެނގި، ލިޔެކިޔުންތަކުން ފެންނަން ހުރި މި ކުށްވެރިން، މުސްކުޅި ކަމުގައި އެނދުމަތީގައި އޮވެ އަމާން މަރަކުން މަރުވުމަށް ކުރާ އުންމީދު، އެމީހުންނާއެކު ކަށްވަޅަށް ގެންދާނެ އެވެ."
މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ދިން ވައިގެ ހަމަލާތަކެއްގައި އަވަހާރަކޮށްލި އޭނާގެ ބައްޕާފުޅު، އަލީ ޚާމަނާއީގެ ޖަނާޒާގެ ރަސްމިއްޔާތާ ދިމާކޮށް މުޖުތަބާ ޚާމަނާއީ މި މެސެޖު ނެރުއްވީ އޭނާގެ ބައްޕަ އަވަހާރަވިތާ މަސްތަކެއް ފަހުންނެވެ.
އެ ބަޔާނުގައި އިތުރަށް ބުނެފައިވަނީ، "އަހަރެމެން ދުނިޔޭގައި ތިބިކަމުގައި ވިޔަސް ނުވަތަ ނެތްކަމުގައި ވިޔަސް،" މި ބަދަލުހިފުމުގެ ވައުދު "މާލަސްތަކެއް ނުވެ" ފުއްދާނެ ކަމަށެވެ.
އީރާނުން މި އިންޒާރު ދީފައިވަނީ، އެމެރިކާގެ ރައީސް ޑޮނަލްޑް ޓްރަމްޕް އަވަހާރަކޮށްލަން އީރާނުން މަސައްކަތް ކޮށްފިނަމަ، އެ ގައުމު "ސުންނާފަތިކޮށްލާނެ" ކަމުގެ އިންޒާރު ޓްރަމްޕް ދެއްވިތާ މަދު ގަޑިއިރުތަކެއްގެ ތެރޭގަ އެވެ.
އިސްރާއީލުގެ އިންޓެލިޖެންސް އެޖެންޓުން ވަނީ އީރާނުން އެމެރިކާގެ ލީޑަރު އަވަހާރަކޮށްލަން އުޅޭ ކަމަށް ތުހުމަތު ކުރެވޭ މައުލޫމާތުތަކެއް ދާދި ފަހުން ޓްރަމްޕްގެ ސަރުކާރާ ހިއްސާކޮށްފަ އެވެ. އިސްރާއީލުގެ މަސްދަރަކާއި އެމެރިކާގެ އޮފިޝަލަކު ބުނެފައިވާ ގޮތުގައި، މި އިންޒާރުތަކުން ދޭހަވަނީ ތެހެރާންގެ ހަރުކަށި ފިކުރުގެ ލީޑަޝިޕްގެ ބައެއް ފެކްޝަންތަކުގެ މެދުގައި އެފަދަ ޝައުގުވެރިކަމެއް ހުރި ކަމެވެ. ނަމަވެސް، މި މައްސަލައާ ގުޅުންހުރި އެމެރިކާގެ ދެ މަސްދަރަކުން ބުނި ގޮތުގައި، އެމެރިކާގެ އިންޓެލިޖެންސްގެ އެންމެ ފަހުގެ ވަޒަންކުރުންތަކުން ޓްރަމްޕް އަވަހާރަކޮށްލަން އީރާނުން އާ، ވަކި ހާއްސަ ރޭވުމެއް ރާވާފައިވާ ކަމުގެ ނިޝާނެއް ނުފެނެ އެވެ. އެހެންނަމަވެސް، އީރާނުގެ އެކި ފަރާތްތަކުން އެފަދަ ކަމެއް ކުރަން ބޭނުންވާ ކަމުގެ ވާހަކަތައް މެދުނުކެނޑި ދެކެވެމުންދާ ކަމަށް އެ ފަރާތްތަކުން ފާހަގަކުރި އެވެ.
އީރާނުގެ އާ އެންމެ މަތީ ވެރިޔާގެ މަގާމަށް އައްޔަންކުރެވުނު ފަހުން، މުޖުތަބާ ޚާމަނާއީ އަދި މިހާތަނަށް އާންމުންގެ ކުރިމައްޗަށް ނުކުމެވަޑައިގެންފައެއް ނުވެ އެވެ.
އޭނާގެ ބައްޕާފުޅާއި މަންމާފުޅު އަދި އަނބިކަނބަލުން އަވަހާރަވި، ފެބްރުއަރީ މަހު އިސްރާއީލާއި އެމެރިކާއިން ދިން ހަމަލާގައި އޭނާއަށް ވެސް އަނިޔާވެފައިވާ ކަމަށް ބެލެވޭއިރު، ހަނގުރާމަ ފެށުނީއްސުރެ އޭނާ އާންމުންގެ ތެރެއިން ފެނިފައެއް ނުވެ އެވެ. އޭނާގެ ސަޕޯޓަރުންނާ މުއާމަލާތް ކުރައްވަނީ ހަމައެކަނި ލިޔުމުން ނެރުއްވާ ބަޔާންތަކުންނެވެ. އަދި މިހާތަނަށް އޭނާގެ މޫނު ފެނިފައި ނުވާއިރު، އޭނާގެ އަޑުވެސް ބޭނުންކުރައްވާފަ އެއް ނުވެއެވެ.
ހޮނިހިރު ދުވަހު ނެރުނު މި މެސެޖަކީ ޚާމަނާއީ އެ މަގާމަށް އައްޔަންކުރެވުނު ފަހުން އާންމުކުރި މަދު މެސެޖުތަކުގެ ތެރެއިން މެސެޖެކެވެ.
މަސްދަރު: ސީއެންއެން
