ހަނގުރާމަ ހުއްޓާލުމުގެ އެއްބަސްވުމާ އެމެރިކާއިން ކަނޑައެޅިގެން ޚިލާފުވެފައިވާ ކަމަށް އީރާނުން ބުނެފި
9 ޖުލައި 2026 | ބުރާސްފަތި 09:51އީރާނާއި އެމެރިކާއާ ދެމެދު ވެފައިވާ ހަނގުރާމަ ހުއްޓާލުމުގެ އެއްބަސްވުމާ އެމެރިކާއިން ޚިލާފުވެފައިވާ ކަމަށް އީރާނުން ތުހުމަތުކޮށްފި. ހުރްމުޒް ކަނޑުއޮޅީގެ ސަލާމަތީ ކަންކަމާ މެދު ދެ ގައުމުގެ މެދުގައި ޚިޔާލުތަފާތުވުން އުފެދިފައިވާއިރު، އެމެރިކާއިން އީރާނުގެ އުމްރާނީ ވަސީލަތްތަކަށް ހަމަލާދީފައިވާތީ އެއީ ހަނގުރާމައިގެ ޖަރީމާއެއްގެ ގޮތުގައި އީރާނުން ވަނީ ސިފަކޮށްފައި.
ތެހެރާނަށް ދިން ވައިގެ ހަމަލާތަކާ ގުޅިގެން އުޑުމަތި އަލިވެފައި ވަނިކޮށް، އީރާނުގެ އެންމެ އުސް ބިނާ ކަމަށްވާ 435 މީޓަރުގެ މިލާދު ޓަވަރާ އެކު އެ ސިޓީ ފެންނަ މަންޒަރެއް - 7 މާރިޗް 2026 | ގެޓީ އިމޭޖަސް
އީރާނާއި އެމެރިކާއާ ދެމެދު ޖޫން މަހުގެ 17 ވަނަ ދުވަހު ސޮއިކުރި ފަހުމުނާމާގެ ދަށުން ގާއިމުކުރި ވަގުތީ ހަނގުރާމަ ހުއްޓާލުމުގެ އެއްބަސްވުމާ އެމެރިކާއިން ކަނޑައެޅިގެން ޚިލާފުވެފައިވާ ކަމަށް އީރާނުގެ ފޮރިން މިނިސްޓްރީން ތުހުމަތުކޮށްފި އެވެ.
މި އެއްބަސްވުމުގައި ބަޔާންކޮށްފައިވަނީ އަސްކަރީ ހުރިހާ އޮޕަރޭޝަންތަކެއް "ވަގުތުން އަދި ދާއިމީކޮށް ހުއްޓާލުމަށެވެ." މީގެ އިތުރުން ހުރްމުޒް ކަނޑުއޮޅިން ދަތުރުކުރާ ވިޔަފާރި އުޅަނދުފަހަރަށް ރައްކާތެރިކަމާއެކު ދަތުރުކުރެވޭނެ އިންތިޒާމުތައް ހަމަޖެއްސުމަށް އީރާނުން އެންމެ ފުރިހަމައަށް މަސައްކަތްކުރަން ޖެހޭނެ ކަމަށްވެސް އެ އެއްބަސްވުމުގައިވެ އެވެ.
މި ފަހުމުނާމާގައި ހިމެނޭ މި މާއްދާ ދެ ގައުމުން މާނަކުރާ ގޮތް ތަފާތުވުމަކީ، މިހާރު އުފެދިފައިވާ ހަމަނުޖެހުންތަކުގެ މައިގަނޑު ސަބަބު ކަމަށް ބައެއް ރިޕޯޓުތައް ބުނެ އެވެ.
އީރާނުގެ ފޮރިން މިނިސްޓްރީން ބުނި ގޮތުގައި، ހުރްމުޒް ކަނޑުއޮޅިން ދަތުރުކުރި ބައެއް އުޅަނދުތަކަކާ ގުޅޭގޮތުން ހިނގި ކަމަށް ބުނާ ހާދިސާތަކަކަށް ރައްދު ދިނުމުގެ ނަމުގައި، އެމެރިކާއިން ހަމަލާދީފައިވަނީ ދޮގު ބަހަނާތަކެއް ދައްކައިގެންނެވެ.
މީގެ ކުރިން އެމެރިކާއިން ވަނީ ހުރްމުޒް ކަނޑުއޮޅިން ދަތުރުކުރި ވިޔަފާރި ތިން އުޅަނދަކަށް އީރާނުން އަމާޒުކޮށްފައިވާ ކަމަށް ބުނެ، އީރާނުން ހަނގުރާމަ ހުއްޓާލުމުގެ އެއްބަސްވުމާ ކަނޑައެޅިގެން ޚިލާފުވެފައިވާ ކަމަށް ތުހުމަތުކޮށްފަ އެވެ. ނަމަވެސް، އެ ހަމަލާތަކުގެ ޒިންމާ އީރާނުން އުފުލާފައެއް ނުވެ އެވެ.
މީގެ އިތުރުން، މިދިޔަ ބުދަ ދުވަހު އެމެރިކާގެ ރައީސް ޑޮނަލްޑް ޓްރަމްޕް، އީރާނުގެ ލީޑަރުންނަކީ "ނުލަފާ" އަދި "މޮޔަ" ބައެއްގެ ގޮތުގައި ސިފަކުރައްވައި ދެއްކެވި ދަށް ފެންވަރުގެ ވާހަކަތައްވެސް އީރާނުގެ ފޮރިން މިނިސްޓްރީން ވަނީ ކުށްވެރިކޮށްފައެވެ.
އީރާނުން އިތުރަށް ތުހުމަތުކުރާ ގޮތުގައި، އެ ގައުމުގެ ރޭލު ދަތުރުފަތުރުކުރާ ދެ ބްރިޖެއް ހިމެނޭހެން އެކި ސަރަހައްދުތަކަށް އަމާޒުކޮށް އެމެރިކާއިން ދީފައިވާ ހަމަލާތަކަކީ ހަނގުރާމައިގެ ބޮޑު ޖަރީމާއެކެވެ.
