އޭޝިއާ ސަރަހައްދުން އިގްތިސާދު އެންމެ ކުޑަކޮށް ކުރިއަރާނީ އަފްޣާނިސްތާނާއި ދިވެހިރާއްޖެ: އޭޑީބީ

އޭޝިއާ އަދި ޕެސިފިކް ސަރަހައްދުގެ އިގްތިސާދުތަކުގެ ކުރިއެރުން، 2025 ވަނަ އަހަރު ހުންނާނެ ކަމަށް ލަފާކުރި 5.5 އިންސައްތައިން، 2026 ވަނަ އަހަރު 4.9 އިންސައްތައަށް ދަށްވާނެ ކަމަށް އޭޝިއަން ޑިވެލޮޕްމަންޓް ބޭންކް (އޭޑީބީ) އިން ލަފާކޮށްފި އެވެ.

ފިލިޕީންސްގެ މެނީލާގައި މަރުކަޒުވެފައިވާ މި ބޭންކުން މި ބަދަލުތައް ގެނެސްފައިވަނީ މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން ކުރިމަތިވަމުންދާ ފުޅާ އަސަރުތަކާ ގުޅިގެންނެވެ. އަހަރަކު ދެ ފަހަރު ނެރޭ އޭޑީބީގެ މައި ރިޕޯޓް ކަމަށްވާ "އޭޝިއަން ޑިވެލޮޕްމަންޓް އައުޓްލުކް" ގައި ބަޔާންކޮށްފައިވާ ގޮތުގައި، ދެކުނު އޭޝިއާ ސަރަހައްދުގެ ގައުމުތަކުގެ ތެރެއިން މި ސަރަހައްދުން އެންމެ ބާރަށް ކުރިއަރާނެ ކަމަށް ލަފާކުރެވެނީ 7.3 އިންސައްތައިގެ ކުރިއެރުމަކާއެކު އިންޑިއާ އެވެ. އޭގެ ފަހަތުން ބޫޓާންގެ އިގްތިސާދު 7.2 އިންސައްތައިގައި ކުރިއަރާނެ ކަމަށް ވަނީ ލަފާކޮށްފަ އެވެ. ޕާކިސްތާނުގެ އިގްތިސާދު 3.7 އިންސައްތައިގައި ކުރިއަރާނެ ކަމަށް ލަފާކޮށްފައިވާއިރު، އެ ގައުމު ވެގެންދާނީ މި ސަރަހައްދުގައި ތިންވަނައަށް އެންމެ ލަސްކޮށް ކުރިއަރާ އިގްތިސާދަށެވެ. މި ލިސްޓުގެ އެންމެ ފަހަތުގައި އުޅެނީ 3 އިންސައްތައިގެ ކުރިއެރުމަކާއެކު އަފްޣާނިސްތާނާއި ދިވެހިރާއްޖެއެވެ. .

އޭޑީބީގެ ރިޕޯޓުގައި ފާހަގަކޮށްފައިވާ ގޮތުގައި، ހަކަތައިގެ އަގު ބޮޑުވުމާއި ރެމިޓެންސް ނުވަތަ ބޭރުން ފޮނުވާ ފައިސާއަށް ކުރިމަތިވެފައިވާ ފިއްތުންތަކުގެ ސަބަބުން، 2027 ވަނަ މާލީ އަހަރު ޕާކިސްތާނުގެ އިގްތިސާދީ ކުރިއެރުން ހުންނާނެ ކަމަށް ލަފާކުރި މިންވަރު ވަނީ 3.7 އިންސައްތައަށް ދަށްކޮށްފަ އެވެ. ނިމިދިޔަ މާލީ އަހަރުވެސް އެ ގައުމުގެ އިގްތިސާދު ކުރިއަރާފައިވަނީ ހަމަ މި މިންވަރަށެވެ. މިއަހަރުގެ އޭޕްރީލް މަހު އޭޑީބީން ލަފާކޮށްފައިވަނީ މި މާލީ އަހަރު ޕާކިސްތާނުގެ އިގްތިސާދު 4.5 އިންސައްތައިގައި ކުރިއަރާނެ ކަމަށެވެ. ނަމަވެސް މިހާރު ވަނީ އެ މިންވަރު ގާތްގަނޑަކަށް އެއް އިންސައްތަ ދަށްކޮށްފަ އެވެ.

މެދުއިރުމަތީގެ ހަމަނުޖެހުންތަކުގެ ނޭދެވޭ އަސަރުތައް މެދުނުކެނޑި ކުރިމަތިވަމުންދާތީ، 2027 ވަނަ މާލީ އަހަރު ޕާކިސްތާނުގެ އިންފްލޭޝަން ނުވަތަ ތަކެތީގެ އަގު އުފުލޭނެ ކަމަށް ލަފާކުރި މިންވަރު 8.3 އިންސައްތައަށް ވަނީ މަތިކޮށްފަ އެވެ. މިއީ ބަންގްލަދޭޝް އަށް ލަފާކޮށްފައިވާ 8.8 އިންސައްތައަށް ފަހު މި ސަރަހައްދުގައި ދެވަނައަށް އެންމެ މަތީ އިންފްލޭޝަން ރޭޓެވެ. މީގެއިން ދޭހަވަނީ އަފްޣާނިސްތާން، ބޫޓާން، ދިވެހިރާއްޖެ، ނޭޕާލް އަދި ސްރީލަންކާއަށްވުރެ ބޮޑެތި ގޮންޖެހުންތަކެއް ޕާކިސްތާނަށް ކުރިމަތިވެފައިވާ ކަމެވެ. ހަނގުރާމައިގެ އަސަރު ކުރި ނަމަވެސް، އިންޑިއާގެ އިންފްލޭޝަން ހުންނާނެ ކަމަށް ލަފާކުރެވެނީ އެންމެ 4 އިންސައްތައިގަ އެވެ. މީގެ އެއް ސަބަބަކީ ޕާކިސްތާނުގެ ސަރުކާރުން ޕެޓްރޯލާއި ޑީސަލުން ޓެކްސް ބޮޑުކުރި ގޮތަށް އިންޑިއާ ސަރުކާރުން އަމަލުކޮށްފައި ނުވުމެވެ.

ނިމިދިޔަ މާލީ އަހަރަށް ބަލާއިރު، 2026 ވަނަ އަހަރުގެ ކުރީކޮޅު އަރްމީނިއާ، ޖޯޖިއާ، މޮންގޯލިއާ، ނޭޕާލް، ޕާކިސްތާން، ފިލިޕީންސް އަދި ވިއެޓްނާމްގައި އިންފްލޭޝަން ހުރީ ކަނޑައެޅިފައިވާ އަމާޒަށްވުރެ މަތީގައެވެ. މިއާ ގުޅިގެން އެ ގައުމުތަކުގެ މަރުކަޒީ ބޭންކުތަކުން ވަނީ އިންޓްރެސްޓް ރޭޓް އެއްވަރެއްގައި ހިފެހެއްޓުމަށާއި، ބައެއް ހާލަތްތަކުގައި ރޭޓްތައް މަތިކުރުމަށް ނިންމައި، އިގްތިސާދީ ހަމަޖެހުން ގާއިމުކުރުމަށް ފިޔަވަޅުތަކެއް އަޅާފަ އެވެ.