ބަންގްލަދޭޝްގެ ޚާރިޖީ ވަޒީރު ރާއްޖެ އަށް ރަސްމީ ދަތުރުފުޅެއް ކުރައްވަނީ

ބަންގްލަދޭޝްގެ ޚާރިޖީ ވަޒީރު ޚަލީލުއްރަޙްމާން ރާއްޖެ އަށް ރަސްމީ ދަތުރުފުޅެއް ކުރައްވާ ގޮތަށް ހަމަޖެހިއްޖެ ކަމަށް އެ ގައުމުގެ ފޮރިން މިނިސްޓްރީން ހާމަ ކޮށްފި އެވެ.

ފިލިޕީންސާއި ދިވެހިރާއްޖެ ހިމެނޭހެން ކުރައްވާ މިދަތުރުފުޅަކީ ބަންގްލަދޭޝްގެ ފޮރިން މިނިސްޓްރީން ބުރާސްފަތި ދުވަހު ބުނެފައިވާ ގޮތުގައި، އދ. ގެ އާންމު މަޖިލީހުގެ ރިޔާސަތާ އެމަނިކުފާނު ހަވާލުވެވަޑައިގަތުމުގެ ކުރިން ކުރައްވާ މުހިންމު މަސައްކަތްތަކެއް ހިމެނޭ ދަތުރުފުޅެކެވެ.

މިނިސްޓްރީގެ އޮފިޝަލަކާ ހަވާލާދީ އެ ގައުމުގެ ބައެއް މީޑިއާ ތަކުން ރިޕޯޓުކޮށްފައިވަނީ، ޚަލީލުއްރަޙްމާން ޖުލައި މަހުގެ 23 ވަނަ ދުވަހު ފިލިޕީންސްގެ މެނީލާއަށް ވަޑައިގަންނަވާނީ 33 ވަނަ އާސިއާން ރީޖަނަލް ފޯރަމްގައި ބައިވެރިވެވަޑައިގަތުމަށެވެ. އެއަށްފަހު އެމަނިކުފާނު ދިވެހިރާއްޖެއަށް ޒިޔާރަތްކުރެއްވުމަށް ވަނީ ހަމަޖެހިފަ އެވެ. 

އދ. ގެ 81 ވަނަ އާންމު މަޖިލީހުގެ ރައީސްކަމަށް ޚަލީލުއްރަޙްމާން އިންތިޚާބުވެވަޑައިގަތީ ޖޫން މަހުގެ 2 ވަނަ ދުވަހު ބޭއްވި އިންތިޚާބުގަ އެވެ. އެ އިންތިޚާބުގައި ސައިޕްރަސްގެ ކެންޑިޑޭޓް އެންޑްރިއަސް އެސް. ކަކޫރިސްއާ ވާދަކުރައްވައި، ޚަލީލުއްރަޙްމާން ކާމިޔާބު ހޯއްދެވީ 99 ވޯޓު ހޯއްދަވައިގެންނެވެ.

ދިވެހިރާއްޖެއަށް ކުރައްވާ މި ދަތުރުފުޅުގައި މައިގަނޑު ގޮތެއްގައި މަޝްވަރާ ކުރައްވާނީ ދެ ގައުމުގެ ދެމެދުގައި އޮންނަ ގުޅުން އިތުރަށް ބަދަހިކުރުމާއި، އދ. އާއި ބައިނަލްއަގުވާމީ އެހެނިހެން ފޯރަމްތަކުގެ ތެރެއިން ސަރަހައްދީ މައްސަލަތަކުގައި ގުޅިގެން މަސައްކަތް ކުރުމާ ގުޅޭގޮތުންނެވެ.

ޚާރިޖީ ވަޒީރުގެ މި ދަތުރުފުޅަކީ އިންޑޯ-ޕެސިފިކް ސަރަހައްދުގައި ބަންގްލަދޭޝްގެ ޚާރިޖީ ނުފޫޒު ވަރުގަދަކުރުމަށާއި، އދ. ގެ އާންމު މަޖިލީހުގެ ރިޔާސަތުގެ ޒަރީއާއިން ދުނިޔޭގެ ނިޒާމު ހިންގުމުގައި އެ ގައުމުގެ ދައުރު ފުޅާކުރުމަށް މަސައްކަތް ކުރަމުންދާ ދަނޑިވަޅެއްގައި ކުރައްވާ ދަތުރުފުޅެކެވެ.