ގްލޯބަލް އެއާލައިންސް އިން މިއަހަރު ފަހުކޮޅު ރާއްޖެއަށް ދަތުރުތައް ފަށަނީ

ޔޫކޭގެ އައު އެއާލައިނެއް ކަމަށްވާ "ގްލޯބަލް އެއާލައިންސް" ގެ ވިޔަފާރި ޕްލޭނަށް ބޮޑެތި ބަދަލުތަކެއް ގެންނަން ނިންމައިފި އެވެ. އެ ކުންފުނީގެ ބާނީ ޖޭމްސް އެސްކުއިތު ހާމަކުރެއްވި ގޮތުގައި، މިދިޔަ އަހަރު ފެށި އެޓްލާންޓިކް ހުރަސްކުރާ ދަތުރުތައް ވަގުތުން އަލުން ފެށުމުގެ ބަދަލުގައި، އެ އެއާލައިންގެ އެއާބަސް އޭ380 މަރުކާގެ ބޯޓު މިއަހަރުގެ ފަހުކޮޅު ރާއްޖެއަށް ދަތުރުތައް ފެށުމަކީ އެކަށީގެންވާ ކަމެކެވެ.

"މެޓްރޯ" ނޫހަށް ދެއްވި ބަސްދީގަތުމެއްގައި އެސްކުއިތު ވިދާޅުވީ، ގިނަ ދުވަސްތަކެއް ވަންދެން ބޯޓު މަރާމާތުކުރުމުގެ މަސައްކަތްތަކަށްފަހު، އެ އެއާލައިންގެ ހަމައެކަނި އެއާބަސް އޭ380 އަލުން އުދުހުންތަކަށް ތައްޔާރުވަމުންދާއިރު، މިހާރު އަމާޒު ހިފާފައިވަނީ މަތީ ފަންތީގެ ޗުއްޓީ މަންޒިލްތަކަށް ކަމަށެވެ.

މީގެ އަހަރުތަކެއް ކުރިން ގްލޯބަލް އެއާލައިންސްގެ ޕްލޭންތައް ފުރަތަމަ އިއުލާނުކުރިއިރު، އެ ކުންފުނީގެ އޭ380 ނެޓްވޯކްގެ މައިގަނޑު މަންޒިލްތަކުގެ ގޮތުގައި ކަނޑައަޅާފައިވަނީ އެމެރިކާގެ ނިއުޔޯކާއި ލޮސް އެންޖެލިސް އެވެ. އަދި އެއާލައިންގެ ޚިދުމަތް ފެށުމަށް ތައްޔާރުވަމުންދިޔައިރު، އެއާބަސް އޭ380 އަކީ އެޓްލާންޓިކް ހުރަސްކޮށް ކުރާ މަތީ ފަންތީގެ ދަތުރުފަތުރުގެ މުސްތަގުބަލު ކަމަށް އެ ކުންފުނިން އިޝްތިހާރު ކުރި އެވެ.

ނަމަވެސް، ދަތުރުވެރިންގެ ޝައުގުވެރިކަން ހުރި ގޮތަށް ބަލާއިރު ރާއްޖެއަކީ ވަރަށް ބޭނުންތެރި މަންޒިލެއްގެ ގޮތުގައި މިހާރު ފާހަގަކުރެވޭ ކަމަށް އެސްކުއިތު ވިދާޅުވި އެވެ.

"ޔޫކޭގެ ކޮންމެ މީހެއްގެ ގާތުގައިވެސް ރާއްޖެއަށް ދާން ބޭނުންތޯ އަހައިފިނަމަ، އަހަރެން ގަބޫލުކުރާ ގޮތުގައި ކޮންމެ މީހަކުވެސް ބުނާނީ ދާން ބޭނުންވާ ކަމަށް. އެއީ އެމީހުންގެ ހުވަފެނީ ޗުއްޓީ ނުވަތަ ހަނީމޫނަށް ދާން ބޭނުންވާ ތަން. އަދި ޔޫކޭއިން ރާއްޖެއަށް ކުރާ ދަތުރުތައް މިހާރު އޮތީ ބޭނުންވާ މިންވަރަށްވުރެ މަދުކޮށް،" އެސްކުއިތު މެޓްރޯއަށް ކިޔައިދެއްވި އެވެ.

އެމެރިކާއާއި އެޓްލާންޓިކް ހުރަސްކޮށް ކުރާ ދަތުރުތަކަކީ އަދިވެސް އެއާލައިންގެ އިސްކަންދޭ މަންޒިލްތަކެއްކަން ފާހަގަކުރައްވަމުން، އެސްކުއިތު ވިދާޅުވީ އެ ކުންފުނިން މިހާރު ގިނަ އައު ރޫޓުތަކެއް ދިރާސާކުރަމުންދާ ކަމަށެވެ.

"ދުނިޔޭގެ އެކި ކަންކޮޅުތަކުގެ އެއާޕޯޓްތަކުން އޭ380 ބޯޓު އެ ތަންތަނަށް ގެންދަން ބޭނުންވެގެން އަޅުގަނޑުމެންނަށް ވަރަށް ގިނަ ހުށަހެޅުންތައް ލިބެމުންދޭ. އަޅުގަނޑުމެންގެ އަތުގައި އެބައޮތް އެއާޕޯޓްތަކުގެ ބޮޑު ލިސްޓެއް، އެ ތަންތަނަށް ދަތުރުކުރުމުން އެކި ކަހަލަ އިނާޔަތްތައް ދޭނެ ކަމަށް ބުނެފައިވާ. އޭގެ ތެރޭގައި އެމެރިކާގެ ހުޅަނގު އައްސޭރިއާއި، ދެކުނު އެމެރިކާގެ އިތުރުން ދުރު އިރުމަތީގެ ބައެއް ގައުމުތައްވެސް ހިމެނޭ،" އެސްކުއިތު ވިދާޅުވި އެވެ.

މީގެ އިތުރުން، ހޮނޮލުލޫއަށް ދަތުރުތައް ފެށުމުގެ ވިސްނުން ގެންގުޅުއްވާކަން ހާމަކުރައްވަމުން އޭނާ ވިދާޅުވީ، އެއީ ގާތްގަނޑަކަށް 15 ނުވަތަ 16 ގަޑިއިރުގެ ދިގު ދަތުރަކަށް ވުމުން ތެޔޮ ޚަރަދަށް ބަލާއިރު އެއީ އެންމެ ފައިދާހުރި ގޮތް ނޫން ކަމަށް ވެދާނެ ކަމަށެވެ. ނަމަވެސް އެ ރޫޓުގައި އެއްފަހަރު ނުވަތަ ދެފަހަރު ދަތުރުކޮށްލުމަކީ އެކަށީގެންވާ ކަމެއް ކަމަށް އޭނާ ވިދާޅުވިއެވެ.

އެއާލައިންގެ ބާނީ ލަފާކުރައްވާ ގޮތުގައި، މިއަހަރުގެ ނިޔަލަށް، ނުވަތަ އަންނަ ކްރިސްމަސްގެ ކުރިން އެއާލައިންގެ ޚިދުމަތްތައް އަލުން ފެށޭނެ އެވެ.