ސްޕެއިންގައި ފެތުރެމުންދާ ވަރުގަދަ އަލިފާނުގައި 11 މީހުން މަރުވެއްޖެ

ސްޕެއިންގެ ދެކުނު ސަރަހައްދުގައި ރޯވި ވަރުގަދަ އަލިފާނުގެ ހާދިސާއެއްގައި މަދުވެގެން 11 މީހުން މަރުވެފައިވާ ކަމަށާއި، މިއީ އެ ގައުމުގެ ތާރީޚުގައިވެސް ހިނގި އެންމެ ނުރައްކާތެރި އަލިފާނުގެ ހާދިސާތަކުގެ ތެރޭގައި ހިމެނޭ ކަމެއް ކަމަށް ކަމާބެހޭ ފަރާތްތަކުން ހުކުރު ދުވަހު ބުނެފި އެވެ. މި ހާދިސާ ހިނގާފައިވަނީ މުޅި ސްޕެއިންގައި ހޫނުމިން އިންތިހާއަށް މަތިވެފައިވާ ދަނޑިވަޅެއްގަ އެވެ.

އަލްމޭރިއާ ސަރަހައްދުގައި ރޯވި މި އަލިފާނުގެ ހާދިސާގައި މަރުވި ބައެއް މީހުން ފެނިފައިވަނީ އަނދާފައިވާ އުޅަނދުތަކުގެ ތެރެއިންނެވެ. މި ހާދިސާގައި އިތުރު އަށް މީހަކަށް އެކިވަރުގެ އަނިޔާތައް ލިބިފައިވާއިރު، އަލިފާން ނިއްވުމުގެ މަސައްކަތުގައި 150 ފަޔަރ ފައިޓަރުންނާއި ސްޕެއިންގެ މިލިޓަރީ އިމަޖެންސީ ޔުނިޓުގެ 220 ސިފައިން ދަނީ ހަރަކާތްތެރިވަމުންނެވެ.

ސަރަހައްދީ ކަމާބެހޭ އިދާރާތަކުން ބުނާ ގޮތުގައި، މަރުވި މީހުންގެ ތެރޭގައި އިނގިރޭސިވިލާތުގެ ހަތަރު ރައްޔިތަކު ހިމެނޭ ކަމަށް ބެލެވެ އެވެ. އެންޑަލޫޝިއާގެ ރީޖަނަލް ލީޑަރު ހުއާން މެނުއަލް މޮރޭނޯ "ކަޑޭނާ ސާ" ރޭޑިއޯ ސްޓޭޝަނަށް ދެއްވި އިންޓަވިއުއެއްގައި ވިދާޅުވީ، މި ހާދިސާއާ ގުޅިގެން 19 މީހަކު ވީނުވީއެއް ނޭނގި ގެއްލިފައިވާ ކަމަށެވެ.

މި ހާދިސާގައި 12 މީހުން މަރުވި ކަމަށް ކަމާބެހޭ ފަރާތްތަކުން ކުރިން ރިޕޯޓުކުރި ނަމަވެސް، ހުކުރު ދުވަހުގެ ހެނދުނު އެ އަދަދު ވަނީ 11 އަށް އިސްލާހުކޮށްފަ އެވެ.

މި އަލިފާންގަނޑު ރޯވެފައިވަނީ ސިއެރާ ޑި ލޮސް ފިލަބްރޭސް ފަރުބަދަތަކާ ކައިރީގައި އޮންނަ ހިކި ސަރަހައްދެއްގެ އަވަށެއްގަ އެވެ. އަލިފާން ރޯވާން މެދުވެރިވި ސަބަބު ކަމާބެހޭ ފަރާތްތަކުން އަދި ކަށަވަރުކޮށްދީފައި ނުވި ނަމަވެސް، އެ ސަރަހައްދުން ރިޕޯޓުކުރި މީހުން ބުނެފައިވަނީ ކަރަންޓު ކޭބަލެއް ބިމަށް ވެއްޓުމުގެ ސަބަބުން އުފެދުނު އަލިފާން ކައިރީގައި އޮތް ޖަންގައްޔަށް ވަރަށް އަވަހަށް ފެތުރިގެން ދިޔައީ ކަމަށެވެ.

އިމަޖެންސީ ސާވިސަސް އިން މައުލޫމާތު ދޭ ގޮތުގައި، މި އަލިފާނުގެ ހާދިސާއާ ގުޅިގެން ބައެއް މަގުތައް ބަންދުކުރަން ޖެހުނުއިރު، އެ ސަރަހައްދުގައި ދިރިއުޅޭ 1،000 އެއްހާ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް ވަނީ މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާފަ އެވެ. އެކްސް (ކުރީގެ ޓުވިޓާ) މެދުވެރިކޮށް އޭނާ ވިދާޅުވީ، އަލްމޭރިއާ ޕްރޮވިންސަށް ކުރިމަތިވި މި ބިރުވެރި އަލިފާނުގެ ހާދިސާގެ ސަބަބުން ލިބުނު ގެއްލުންތަކާ މެދު އިންތިހާއަށް ހިތާމަކުރައްވާ ކަމަށެވެ.

ފަހަކަށް އައިސް ސްޕެއިންއަށް ވަނީ ވަރުގަދަ ހޫނުގެ ރާޅުތަކެއް ކުރިމަތިވެފަ އެވެ. އެގޮތުން ގިނަ ފަހަރު ހޫނުމިން 40 ޑިގްރީ ސެލްސިއަސްއަށް ވުރެ މައްޗަށްދެ އެވެ. ބާރު ވަޔާއި، މަތީ ހޫނުމިނުގެ އިތުރުން ވާރޭ ނުވެހި ގިނަ ދުވަސްވުމުގެ ސަބަބުން، ކުދިކުދި އަލިފާނުގެ ހާދިސާތައް ކޮންޓްރޯލުން ނެއްޓި ބޮޑެތި އަލިފާންގަނޑުތަކަށް ބަދަލުވެ އެވެ.

ނިމިދިޔަ ޖޫން މަހު ސްޕެއިންއަށް ވަނީ ރެކޯޑު މިންވަރަކަށް ހޫނުގަދަ ދުވަސްތަކެއް ކުރިމަތިވެފަ އެވެ. އަދި އެ ހޫނުގެ ސަބަބުން 1،000 އަށްވުރެ ގިނަ މީހުން މަރުވެފައިވާ ކަމަށް ތަފާސްހިސާބުތަކުން ދައްކަ އެވެ.

ހުޅަނގު ޔޫރަޕުގެ ބައެއް ސަރަހައްދުތަކަށް މިހާރު ކުރިމަތިވަމުންދަނީ ފާއިތުވި ހަ ހަފުތާގެ ތެރޭގައި ކުރިމަތިވި ތިންވަނަ ހޫނުގެ ރާޅެވެ.

ޔޫރަޕިއަން ޔޫނިއަންގެ ކޮޕަރނިކަސް ކްލައިމެޓް ޗޭންޖް ސާވިސްއިން ބުނާ ގޮތުގައި، ޔޫރަޕަކީ ދުނިޔޭގައި އެންމެ ހަލުވިކަމާއެކު ހޫނުވަމުންދާ ބައްރެވެ. 1980 ގެ އަހަރުތަކުން ފެށިގެން އެ ބައްރުގެ ހޫނުމިން އިތުރުވަމުންދަނީ ދުނިޔޭގެ އެވްރެޖް ރޭޓަށްވުރެ ދެގުނަ ހަލުވިކޮށެވެ. މުޅި ދުނިޔެއަށް ބަލާއިރު، 2025 ވަނަ އަހަރަކީ ރެކޯޑު ކުރެވުނު ތިންވަނައަށް އެންމެ ހޫނުގަދަ އަހަރެވެ. މީގެ ސަބަބުން ޔޫރަޕުގެ އެކި ހިސާބުތަކަށް ވަނީ ވަރުގަދަ ހޫނުގެ ރާޅުތަކެއް ކުރިމަތިވެފަ އެވެ.

ސައިންސްވެރިން އިންޒާރު ދޭ ގޮތުގައި، ޕެޓްރޯލާއި، ތެލާއި، އަދި ބޯޓުދެލި ފަދަ ތަކެތި އެންދުމުގެ ސަބަބުން ކުރިމަތިވާ މޫސުމީ ބަދަލުތަކުގެ ސަބަބުން، ހޫނުގަދަވުމާއި ހަނަފަސްކަން ކުރިމަތިވާ މިންވަރު ދަނީ އިތުރުވަމުންނެވެ. މީގެ ސަބަބުން ބައެއް ސަރަހައްދުތަކުގައި އަލިފާނުގެ ހާދިސާތައް ހިނގުމުގެ ފުރުސަތު ބޮޑުވެގެންދެއެވެ.