ރާއްޖެއިން ޔޫއޭއީއަށް ކަނޑައެޅުއްވި އައު ސަފީރު، ފަތްކޮޅުގެ އަރުވައިފި
ދިވެހިރާއްޖެއިން ޔޫއޭއީއަށް ކަނޑައެޅުއްވި އައު ސަފީރު ތާރިގު އިބްރާހީމް، އެ ގައުމުގެ ފޮރިން މިނިސްޓްރީގެ އެންޑަރސެކްރެޓަރީއާ ބައްދަލުކުރައްވައި، ދެ ގައުމުގެ ގުޅުން އިތުރަށް ބަދަހިކުރުމާ ގުޅޭގޮތުން މަޝްވަރާކުރެއްވި. މި ބައްދަލުކުރެއްވުމުގައި ސަފީރު ވަނީ ޔޫއޭއީގެ ލީޑަރޝިޕުން ހޯދަމުންދާ ކުރިއެރުންތަކަށް ތައުރީފުކުރައްވައި، ތިމާވެއްޓާއި، ފަތުރުވެރިކަމާއި، އިއާދަކުރަނިވި ހަކަތައިގެ ދާއިރާއިން ގުޅުން ފުޅާކުރުމަށް އުންމީދުކުރައްވާކަން ހާމަކުރައްވާފައި.
ޔުނައިޓެޑް އެރަބް އެމިރޭޓްސް (ޔޫއޭއީ) އަށް ދިވެހިރާއްޖޭގެ ފަރާތުން ކަނޑައެޅުއްވި އާ ސަފީރު ތޯރިގް އިބްރާހީމް، އެމަނިކުފާނުގެ ސަފީރުކަމުގެ ފަތްކޮޅު ޔޫއޭއީގެ މިނިސްޓްރީ އޮފް ފޮރިން އެފެއާޒްގެ އަންޑަރސެކްރެޓަރީ އުމަރު އުބައިދު އަލްހަސަން އަލްޝަމްސީ އަށް އަރުވަނީ. | ޝާރުޖާ24
ދިވެހިރާއްޖެއިން ޔޫއޭއީއަށް ކަނޑައެޅުއްވި އައު ސަފީރު ތާރިގު އިބްރާހީމްގެ ސަފީރުކަމުގެ ފަތްކޮޅު ޔުނައިޓެޑް އެރަބް އެމިރޭޓްސް (ޔޫއޭއީ) ގެ މިނިސްޓްރީ އޮފް ފޮރިން އެފެއާޒްގެ އެންޑަރސެކްރެޓަރީ، ހިޒް އެކްސެލެންސީ އުމަރު އުބައިދު އަލްހަސަން އަލްޝަމްސީ އަށް އަރުވައިފި އެވެ.
މި ބައްދަލުކުރެއްވުމުގައި އަލްޝަމްސީ ވަނީ ސަފީރު ތާރިގު އިބްރާހީމަށް އެމަނިކުފާނުގެ މަސްއޫލިއްޔަތު އަދާކުރެއްވުމުގައި ކާމިޔާބީއަށް އެދިވަޑައިގެންފަ އެވެ. އަދި ދެ ގައުމުގެ ރައްޔިތުންގެ މަސްލަހަތު ހިމެނޭހެން، އެކި ދާއިރާތަކުން ރާއްޖެއާއި ޔޫއޭއީއާ ދެމެދު އޮތް ގުޅުން އިތުރަށް ބަދަހިކުރުމަށް އެ ގައުމުން އަބަދުވެސް މަސައްކަތް ކުރާނެ ކަމުގެ ޔަގީންކަން އަލްޝަމްސީ އެރުވިއެވެ.
މި ބައްދަލުކުރެއްވުމުގައި ސަފީރު ތާރިގު އިބްރާހީމް ދެއްކެވި ވާހަކަފުޅުގައި، ޔޫއޭއީގެ ރައީސް ހިޒް ހައިނަސް ޝައިޚް މުޙައްމަދު ބިން ޒައިދު އަލް ނަހްޔާންގެ ހަރުދަނާ ލީޑަރޝިޕްގެ ދަށުން އެ ގައުމުން ސަރަހައްދީ އަދި ބައިނަލްއަގުވާމީ މައިދާނުގައި ހޯދަމުންދާ ކުރިއެރުންތަކަށް ތައުރީފު ކުރެއްވި އެވެ. މީގެ އިތުރުން، ދެ ގައުމުގެ ދެމެދުގައި އޮތް ގުޅުން އެކި ދާއިރާތަކުން އިތުރަށް ފުޅާކޮށް ތަރައްގީ ކުރުމަށް އުންމީދު ކުރައްވާ ކަމަށްވެސް ސަފީރު ވިދާޅުވި އެވެ. ޔޫއޭއީއާއި ދިވެހިރާއްޖެއާ ދެމެދު އޮންނަނީ ވަރުގަދަ ގުޅުމެއްކަން ފާހަގަކުރައްވަމުން، މޫސުމީ ބަދަލުތަކާ ދެކޮޅަށް ކުރެވޭ މަސައްކަތްތަކާއި، ތިމާވެށީގެ ދެމެހެއްޓެނިވިކަމާއި، ފަތުރުވެރިކަމުގެ އިތުރުން އިއާދަކުރަނިވި ހަކަތައިގެ ދާއިރާއިން ދެ ގައުމުގެ ގުޅުން ދަނީ ދުވަހުން ދުވަހަށް ބަދަހިވަމުންކަން ތާރިގް ފާހަގަ ކުރެއްވި އެވެ.
