ފްރާންސް ބަލިކުރެވޭނެ ބަޔަކު އެބަތިބިތޯ ކުރެވޭ ސުވާލަށް ކުޅިވަރު ދިރާސާ ކުރާ ފަރާތްތަކުގެ ބަސް

"ފްރާންސަކީ އަހަރެމެންގެ ހަޔާތުގައި ވެސް ވޯލްޑް ކަޕް މުބާރާތެއް ކާމިޔާބުކުރާނެ ކަމަށް މިހާ ބޮޑަށް ގަބޫލުކުރެވޭ އެންމެ ވަރުގަދަ އެއް ޓީމު،" މިއީ އާސެނަލްގެ ކުރީގެ ފޯވާޑް އިއަން ރައިޓްގެ ބަހެވެ.

ޑިޑިއޭ ޑެޝޯމްޕްގެ އިރުޝާދުގެ ދަށުން ކުޅޭ ފްރާންސް ޓީމަކީ ބަލިކުރަން އެންމެ އުނދަގޫވާނެ ޓީމު ކަމަށް ގަބޫލުކުރަނީ ހަމައެކަނި އިއަން ރައިޓެއް ނޫނެވެ. ފުޓްބޯޅަ ދިރާސާކުރާ ފަރާތްތަކާއި، ސަޕޯޓަރުންގެ އިތުރުން ބެޓް ކުރާ ފަރާތްތަކުން ވެސް ބޮޑަށް ބުރަވަނީ މިފަހަރުގެ ތަށި ފްރާންސް އުފުލާލާނެ ކަމަށެވެ.

އެ ފަރާތްތަކަށް ދެރަބަހެއް ބުނެވޭކަށް ވެސް ނެތެވެ.

މިހާތަނަށް ކުޅުނު ފަސް މެޗުން ވެސް ފްރާންސް ވަނީ މޮޅުވެފަ އެވެ. އެ ޓީމުން 14 ލަނޑު ޖަހާފައިވާއިރު، ބައިކޮޅަށް ވަދެފައިވަނީ އެންމެ ދެ ލަނޑެވެ. އަދި ވޯލްޑް ކަޕްގައި އެ ޓީމުން ކުޅުނު މެޗުތަކުގެ ތެރެއިން ތިން ލަނޑަށް ވުރެ މަދުން ލަނޑު ޖެހިފައިވަނީ އެންމެ މެޗެއްގަ އެވެ.

ކީލިއަން އެމްބާޕޭ ހުއްޓުމެއް ނެތި ލަނޑު ޖަހަމުންދާއިރު، އޭނާގެ ފަހަތުން މައިކަލް އޮލީސޭ، އޮސްމާން ޑެމްބެލޭ އަދި ބްރެޑްލީ ބާކޯލާ ހިމެނޭ ނުރައްކާތެރި ތިން ކުޅުންތެރިން ދައްކަމުންދާ ކުޅުމުގެ ސަބަބުން، ދުނިޔޭގެ ކޮންމެ ޑިފެންސަކަށް ވެސް ބިރުވެރިކަން އޮންނާނެ އެވެ.

މީގެ އިތުރުން، ބެންޗުގައި ތިބި ޑެސިރޭ ދޫއޭ އާއި ރަޔާން ޗެރްކީ ފަދަ ހުނަރުވެރި ކުޅުންތެރިންނަށް ބަލާއިރު، މިއީ ހަގީގަތުގައި ވެސް ނުރައްކާތެރި ޓީމެކެވެ.

ބުރާސްފަތި ދުވަހުގެ ރޭ މޮރޮކޯއާ ދެކޮޅަށް ކުޅޭ ކުއާޓާ ފައިނަލް މެޗު (ރާއްޖޭ ގަޑިން ދަންވަރު 1:00 ގައި) ކައިރިވަމުން އަންނައިރު، 2018 ވަނަ އަހަރުގެ ޗެމްޕިއަނުން އަދި 2022 ވަނަ އަހަރުގެ ރަނަރަޕް ފްރާންސް ބަލިކުރެވޭނެ ބަޔަކު އެބަތިބިތޯ ބީބީސީ ސްޕޯޓްސްގެ ނޫސްވެރިން ވަނީ އެމީހުންގެ ޚިޔާލު ފާޅުކޮށްފަ އެވެ.

'ފްރާންސްގެ ފަރާތުން އިދިކޮޅު ޓީމުތަކަށް ފުރުސަތު ލިބޭ'

އިއާން ޑެނިސް، ބީބީސީ ރޭޑިއޯ 5، ސީނިއަރ ފުޓްބޯލް ރިޕޯޓަރ

މި މުބާރާތުގައި ބަލިކުރަން އެންމެ އުނދަގޫ ޓީމަކީ ސްޕެއިން ކަމަށް އަޅުގަނޑު ދެކެމެވެ. ފްރާންސަށް ވުރެ ބޮޑަށް އަޅުގަނޑު ތާއީދުކުރަނީ ސްޕެއިން އަށެވެ. ދެ ޓީމުގެ ކުޅުން ބެލުމަށްފަހު އަޅުގަނޑުގެ ވިސްނުން މިހާރު ވަނީ ބަދަލުވެފަ އެވެ.

ސްޕެއިންގެ ކުޅުމުގައި ކޮންޓްރޯލް ބޮޑެވެ. ޑިފެންސް ވަރުގަދަވުމުގެ ސަބަބުން އިދިކޮޅު ޓީމުތަކަށް ފުރުސަތުތައް ލިބެނީ ވަރަށް މަދުންނެވެ. އަދި މިހާތަނަށް އެ ޓީމުގެ ބައިކޮޅަށް ލަނޑެއް ވެސް ނުވަދެ އެވެ.

ފްރާންސް ކުޅުނު ގްރޫޕް ސްޓޭޖުގެ ހުރިހާ މެޗެއް އަޅުގަނޑު ބެލީމެވެ. ނަމަވެސް ސްޕެއިންގެ ކިބައިގައި ހުރި ފަދަ ކޮންޓްރޯލެއް ފްރާންސްގެ ކިބައަކުން ނުފެނެއެވެ. އަދި އިދިކޮޅު ޓީމުތަކަށް ފުރުސަތުތައް ލިބޭކަން ފާހަގަކުރެވެ އެވެ.

ސެނެގާލާ ދެކޮޅަށް ކުޅުނު މެޗުގެ ފުރަތަމަ ހާފު ނިމުނުއިރު ސެނެގާލް އޮންނަންޖެހޭނީ ކުރީގަ އެވެ. އަދި ބޮސްޓަންގައި ނޯވޭއާ ދެކޮޅަށް ކުޅުނު މެޗުގައި، ނޯވޭގެ މުހިންމު ކުޅުންތެރިން ނެތް ނަމަވެސް، ފުރަތަމަ ހާފުގައި ފްރާންސަށް ވަނީ ނުރައްކާކޮށްފަ އެވެ.

އަޅުގަނޑު ގަބޫލުކުރާ ގޮތުގައި މޮރޮކޯއަށް ފްރާންސަށް ގޮންޖެހުންތަކެއް ކުރިމަތިކުރެވިދާނެ އެވެ. ނަމަވެސް ސެމީ ފައިނަލުގައި ފްރާންސާ ބައްދަލުކުރާނީ ސްޕެއިން ކަމަށް ބެލެވެ އެވެ. މިއީ ޔޫރޯ 2024 ގެ ސެމީ ފައިނަލްގެ ތަކުރާރުވުމަކަށް ވާނެ އެވެ. އެ މެޗުން ސްޕެއިން މޮޅުވީ 2-1 އިންނެވެ.

'ފްރާންސް ބަލިކުރެވިދާނެ ކަމަށް ޓީމުތަކުން ގަބޫލުކުރާނެ'

ފިލް މެކްނަލްޓީ، ބީބީސީ ސްޕޯޓްސްގެ ޗީފް ފުޓްބޯޅަ ރައިޓަރު

މިހާތަނަށް ވޯލްޑް ކަޕްގައި އެންމެ މޮޅު ކުޅުމެއް ދައްކާފައިވަނީ ފްރާންސްއެވެ. އެމްބާޕޭ، އޮލީސޭ އަދި ޑެމްބެލޭ އިސްވެ ތިބެ ދައްކަމުންދާ އެޓޭކިންގް ކުޅުން ފާހަގަކޮށްލެވެ އެވެ.

އެހެންނަމަވެސް، އެއީ ބަލިނުކުރެވޭނެ ޓީމެއް ނޫނެވެ. ކުއާޓާ ފައިނަލުން މޮޅުވެއްޖެ ނަމަ، ސެމީ ފައިނަލުގައި އެ ޓީމަށް ކުރިމަތިލާން ޖެހޭނީ ޔޫރަޕްގެ ޗެމްޕިއަން ސްޕެއިންއާ އެވެ.

ފްރާންސް ކިތަންމެ މޮޅުވި ނަމަވެސް، މިއީ ޑެޝޯމްޕްގެ ޓީމަށް ކުރިމަތިވާނެ ވަރަށް ބޮޑު އިމްތިހާނެކެވެ.

ސްޕެއިން މިހާރު އޮތީ ބަލިނުވެ 35 މެޗު ހަމަކޮށްފަ އެވެ. އެ ޓީމަށް ނަތީޖާ ނެރެން އެނގެ އެވެ. އެންމެ ފަހުން ޕޯޗުގަލްއާ ދެކޮޅަށް ކުޅުނު މެޗުގެ އިތުރު ވަގުތުގައި ލަނޑު ޖަހައިގެން މޮޅުވުމަކީ މީގެ ހެއްކެކެވެ.

އަދި ފްރާންސަށް ސްޕެއިން ބަލިކުރެވުނު ނަމަވެސް، ފައިނަލުގައި އެންމެ ފަހުގެ ޗެމްޕިއަން އާޖެންޓީނާ ނުވަތަ އިންގްލެންޑާ ބައްދަލުކުރަން ޖެހުމުގެ ފުރުސަތު އެބައޮތެވެ.

ފްރާންސަކީ މުބާރާތް ކާމިޔާބުކުރާނެ ކަމަށް އެންމެ ބޮޑަށް ބެލެވޭ ޓީމު ނަމަވެސް، އިދިކޮޅު ޓީމުތަކުން ފްރާންސް ބަލިކުރެވިދާނެ ކަމަށް ގަބޫލުކުރާނެއެވެ. އަދި މި މުބާރާތުން ފެނުނު ނަތީޖާތަކަށް ބަލާއިރު، އެއްވެސް ކަމަކީ ކުރިން ކަށަވަރުވެފައި އޮތް ކަމެއް ނޫންކަން ހަނދާން ބަހައްޓަން ޖެހެ އެވެ.

'ސްޕެއިންއަށް ބޮޑު ފުރުސަތެއް އެބައޮތް'

އެލިޒަބަތު ކޮންވޭ، ބީބީސީ ސްޕޯޓްސްގެ ނޫސްވެރިޔާ

މި ވޯލްޑް ކަޕްގައި ސްޕެއިންއަށް މާ ބޮޑު ސަމާލުކަމެއް ލިބިފައި ނެތް ނަމަވެސް، ފްރާންސް ބަލިކުރުމުގެ ފުރިހަމަ ފުރުސަތު އެ ޓީމަށް އެބައޮތެވެ.

މީގެ ބޮޑު ސަބަބަކީ އެ ޓީމުގެ އެންމެ ބޮޑު ތަރި ލަމީން ޔަމާލް، އަނިޔާއިން ރަނގަޅުވަމުން އަންނާތީ، އެހެން ކުޅުންތެރިން ފަދަ މޮޅު ކުޅުމެއް އަދި ދެއްކިފައި ނުވުމެވެ.

އެހެން ޓީމުތަކުން ވަކިވަކި ކުޅުންތެރިންގެ ހުނަރަށް ބަރޯސާވާއިރު، ސްޕެއިން ފާހަގަކުރެވެނީ އެ ޓީމުގެ ތަރުތީބުވެފައިވާ ސިސްޓަމްގެ ސަބަބުންނެވެ. ކޭޕް ވާޑޭއާ އެއްވަރުވި މެޗަށްފަހު ކުޅުނު ހަތަރު މެޗުން ވެސް މޮޅުވިއިރު، ބައިކޮޅަށް ލަނޑެއް ވަދެފައެއް ނުވެއެވެ. މީގެ މައިގަނޑު ސަބަބަކީ ޒުވާން ޕާއު ކުބާސީ އާއި ތަޖުރިބާކާރު އައިމެރިކް ލަޕޯޓްގެ ވަރުގަދަ ޑިފެންސެވެ.

ސްޕެއިންގެ ކުޅުން ދަނޑުގެ އަރިމަތިން ބައްޓަންކުރުމުގެ ސަބަބުން ލަމީން ޔަމާލަށް ޖާގަ ލިބި، ފުރުސަތުތައް އުފެއްދުމަށް މަގުފަހިވެއެވެ. ހަމައެއާއެކު، ރޮޑްރީ އާއި ޕެޑްރީ މެދުތެރެ ކޮންޓްރޯލްކޮށް، މެޗުގެ ދުވެލި ހިފަހައްޓައެވެ. އެންމެ ފަހުން ފްރާންސާ ދެކޮޅަށް ކުޅުނު ދެ މެޗުން ވެސް ސްޕެއިން ވަނީ މޮޅުވެފައެވެ. ލިބޭ ފުރުސަތުތަކުގެ ބޭނުން ހިފައިފި ނަމަ، ސްޕެއިންއަށް ފްރާންސް ބަލިކުރެވޭނެ އެވެ.

'އެންމެ ފޯރިގަދަ ޓީމުތައް ވެސް ބަލިވެދާނެ'

ޖޯން މަރޭ، ބީބީސީ ރޭޑިއޯ 5 ލައިވްގެ ސީނިއާ ކޮމެންޓޭޓަރު

މި މުބާރާތުގައި މިހާތަނަށް އެންމެ ރީތި އަދި ފޯރިގަދަ ފުޓްބޯޅައެއް ކުޅެމުންދަނީ ފްރާންސް އެވެ.

ނަމަވެސް ތާރީޚަށް ބަލާއިރު، މިފަދަ މޮޅު ކުޅުމެއް ދައްކާ ޓީމުތައް ވޯލްޑް ކަޕްގެ މުހިންމު ހިސާބުތަކުން ބަލިވެފައި އެބަހުއްޓެވެ. 1982 ވަނަ އަހަރުގެ ބްރެޒިލް ޓީމަކީ މީގެ އެންމެ ބޮޑު މިސާލެވެ. މީގެ އިތުރުން 1986 ގެ ޑެންމާކް، 2006 ގެ ޖަރުމަން އަދި 2014 ގައި އަމިއްލަ ގައުމުގައި ކުޅުނު ބްރެޒިލް ޓީމު ވެސް ހިމެނެ އެވެ.

އެހެންކަމުން، ސެމީ ފައިނަލުގައި ސްޕެއިންއާ ބައްދަލުކުރަން ޖެހިއްޖެ ނަމަ، ޔޫރަޕްގެ ޗެމްޕިއަނުން ފްރާންސްގެ މައްޗަށް ކުރިހޯދުމަކީ ވަރަށް އެކަށީގެންވާ ކަމެކެވެ.

'ފްރާންސްގެ އަސްލު ބާރު އަދި ނުފެންނާތީ އޮތް ބިރު'

ނިއުލް ޖޯންސްޓަން، ބީބީސީ ސްޕޯޓްސްގެ ނޫސްވެރިޔާ

ޖެހިޖެހިގެން ތިންވަނަ ފަހަރަށް ވޯލްޑް ކަޕް ފައިނަލަށް ދިއުމަށް ފްރާންސް ކުރަމުންދާ ދަތުރު ހުއްޓުވުމަށްޓަކައި ވަރަށް ޚާއްސަ ކަމެއް ކުރަން ޖެހޭނެ އެވެ.

ފިލަޑެލްފިއާގައި މޫސުން ގޯސްވުމުގެ ސަބަބުން މެޗު ދެ ގަޑިއިރަށް މެދުކަނޑާލަން ޖެހުމާއި، ކޯޗު ޑެޝޯމްޕްގެ މަންމަ ނިޔާވުމުގެ ސަބަބުން އެއް މެޗުގައި އޭނާ ނެތުމާއި، އަދި ޕެރަގުއޭގެ ފަރާތުން ކުރިމަތިވި އުނދަގޫތަކުން އަރައިގަނެ، ފްރާންސް މިހާރު އޮތީ ގަދަ އަށެއްގަ އެވެ.

އެ ޓީމުގެ ކުޅުން ބަލާލަން ވަރަށް ހިތްގައިމެވެ. ޚާއްސަކޮށް ގަދަ 32 ގެ ތެރޭގައި ސްވިޑަންއާ ދެކޮޅަށް ކުޅުނު މެޗުގައި 25 ހަމަލާ އުފެއްދިކަން ފާހަގަކޮށްލެވެއެވެ. އިދިކޮޅު ޓީމުތަކަށް އޮތް ބިރަކީ، ފްރާންސްގެ އަސްލު ފެންވަރު އަދިވެސް މި މުބާރާތުގައި ފެނިފައި ނުވުމެވެ.

ހަމައެކަނި އެމްބާޕޭ، އޮލީސޭ އަދި ޑެމްބެލޭއަށް ބަލާއިރު ވެސް، އެ ތިން ކުޅުންތެރިން ވަނީ ޖުމްލަ 20 ލަނޑުގައި ހިއްސާވެފައެވެ. އަދި މިހާތަނަށް އެއްވެސް މެޗެއްގައި ފްރާންސްގެ މައްޗަށް އިދިކޮޅު ޓީމަކަށް ކުރިހޯދިފައެއް ނުވެ އެވެ.

މިހާތަނަށް ކުޅުނު ފަސް މެޗުގައި ބައިކޮޅަށް ވަނީ އެންމެ ދެ ލަނޑެވެ. އެއީ ވެސް ސެނެގާލް އަތުން 3-0 އިން އަދި ނޯވޭ އަތުން 2-0 އިން ކުރީގައި އޮއްވަ އެވެ. އާސެނަލްގެ ވިލިއަމް ސަލީބާ އާއި ބަޔާން މިއުނިކްގެ ދަޔޫ އުޕަމެކާނޯ ދަނީ ޑިފެންސް ވަރުގަދަކޮށް ބަލަހައްޓަމުންނެވެ.

ފްރާންސް ހުއްޓުވާނީ ކޮންބައެއް ހެއްޔެވެ؟

މޮރޮކޯ ބަލިކޮށްފި ނަމަ ސެމީގައި ބައްދަލުކުރާނީ ސްޕެއިން ނުވަތަ ބެލްޖިއަމްއާ އެވެ. ބައިކޮޅަށް ލަނޑެއް ނުވަދެ އޮތް ސްޕެއިން ވާނީ ބޮޑު އިމްތިހާނަކަށެވެ. ނަމަވެސް އަޅުގަނޑަށް ހީވަނީ ފްރާންސްގެ އެޓޭކްތައް ސްޕެއިންއަށް ވުރެ ވަރުގަދަވާނެ ކަމަށެވެ.

'އިންގްލެންޑަށް ފްރާންސް ހުއްޓުވިދާނެ'

އެލެކްސް ހަވަލް، ބީބީސީ ސްޕޯޓްސްގެ އިންގްލެންޑް ރިޕޯޓަރު

މި މުބާރާތް ފެށުނީއްސުރެ ފްރާންސަކީ އެންމެ ފޭވަރިޓް ޓީމެވެ. އެއީ ވަރުގަދަ ޓީމެއް ނަމަވެސް، އުނިކަންތައްތަކެއް އެބަހުއްޓެވެ.

އަޅުގަނޑު ގަބޫލުކުރާ ގޮތުގައި ފައިނަލުގައި ބައްދަލުކުރާނީ ފްރާންސާއި އިންގްލެންޑެވެ. އަދި ފްރާންސް ހުއްޓުވާނެ ޓީމަކީ އިންގްލެންޑެވެ.

އިންގްލެންޑްގެ މެދުތެރޭގައި ކުޅޭ ޑެކްލަން ރައިސް، އެލިއަޓް އެންޑަސަން އަދި ޖޫޑް ބެލިންގްހަމް އަކީ ފްރާންސްގެ މެދުތެރެއަށް ނުފޫޒު ފޯރުވޭނެ ފަދަ ބާރުގަދަ ކުޅުންތެރިންނެވެ.

ތޯމަސް ޓުޗެލްގެ އިރުޝާދުގެ ދަށުން ކުޅޭ އިންގްލެންޑުން ވަނީ މެކްސިކޯ ސިޓީގައި މެކްސިކޯ އަތުން 3-2 އިން މޮޅުވި މެޗުގައި، އުނދަގޫ ހާލަތްތަކާ ކުރިމަތިލާނެ ހިތްވަރު ހުރިކަން ސާބިތުކޮށްދީފަ އެވެ. ފްރާންސް ބަލިކުރުމަށް އިންގްލެންޑުން ވަރަށް ވަރުގަދަ ކުޅުމެއް ދައްކަން ޖެހޭނެ އެވެ. އެކަން ކޮށްފި ނަމަ، އެއީ އިންގްލެންޑަށް ލިބޭނެ އެންމެ ބޮޑު ކާމިޔާބީ އެވެ.

ފްރާންސްގެ އެންމެ ބޮޑު ބާރަކީ އެ ޓީމުގެ ނިކަމެތިކަމަށް ވެދާނެތަ؟

ޖޯން ބެނެޓް، ބީބީސީ ވޯލްޑް ސާވިސް

ފްރާންސްގެ އެޓޭކިންގް ހަތަރު ކުޅުންތެރިންގެ ކުޅުން ފެނުމުން، އެ ޓީމުގެ ބަލިކަށިކަމެއް ހޯދުމަކީ ވަރަށް އުނދަގޫ ކަމެކެވެ.

ނަމަވެސް، އެ ޓީމުގެ އެންމެ ބޮޑު ބާރަކީ އެހެން ވަރުގަދަ ޓީމަކާ ބައްދަލުކުރާއިރު ބަލިކަށިކަމަކަށް ވެދާނެ ހެއްޔެވެ؟

އޮލީސޭ ނަމްބަރު 10 ގެ މަގާމަށް ބަދަލުކުރުމުން ފްރާންސްގެ އެޓޭކް ވަނީ މާ ނުރައްކާތެރިވެފަ އެވެ. އެކަމަކު ވަރުގަދަ ޓީމަކާ ދެކޮޅަށް ކުޅޭއިރު، ބޯޅަ ނެތް ވަގުތުތަކުގައި މެދުތެރެއިން ފްރާންސް ބަލިކަށިވުމުގެ ފުރުސަތު އެބައޮތެވެ.

އިދިކޮޅު ޓީމުން ބޯޅަ ހިފަހައްޓައިގެން ކުޅޭއިރު، އޮލީސޭ އެކަށީގެންވާ ވަރަށް ފަހަތަށް ފައިބައި ޑިފެންސް ކުރާނެތޯ މިއީ އުފެދޭ ސުވާލެކެވެ. ފަހަރުގައި މޮރޮކޯއިން ދަނޑުގެ އެ ސަރަހައްދަށް އަމާޒުކޮށް ހަމަލާދީފާނެއެވެ. އަދި ސެމީ ފައިނަލުގައި ސްޕެއިން ފަދަ ބޯޅަ ހިފަހައްޓައިގެން ކުޅޭ ޓީމަކާ ދެކޮޅަށް މިއީ ބޮޑު އިމްތިހާނަކަށް ވާނެ އެވެ.

'މޮރޮކޯ ދަށްކޮށްނުލާ'

އެމްބާޕޭ އާއި އޮލީސޭގެ މޮޅު ކުޅުމާއެކު ފްރާންސަކީ މިވަގުތު ކޮންމެ ޓީމަކަށް ވެސް އޮތް ބޮޑު ބިރެކެވެ.

ނަމަވެސް މިއީ މުބާރާތުގެ އެންމެ ފަހު މަރުހަލާ އެވެ. މި ހިސާބުން ކޮންމެ ޓީމަކަށް ވެސް ކޮންމެ ޓީމެއް ބަލިކުރެވިދާނެ އެވެ.

މޮރޮކޯއަށް ފްރާންސާ ދެކޮޅަށް ކުޅުމަކީ އުނދަގޫ ކަމަކަށް ވާނެ އެވެ. އެކަމަކު ހަނދާން ކުރަންޖެހޭ ކަމަކީ، މީގެ ހަތަރު އަހަރު ކުރިން ވެސް މޮރޮކޯއަކީ ވޯލްޑް ކަޕްގެ ސެމީ ފައިނަލިސްޓުން ކަމެވެ. އަދި މިހާރު އެ ޓީމު އޮތީ ކުރިއަށް ވުރެ ވެސް ވަރުގަދަކޮށެވެ.

މޮރޮކޯއަކީ ޑިފެންސް ވަރުގަދަ ޓީމެކެވެ. ފްރާންސްގެ ހަމަލާތައް ހުއްޓުވައިފި ނަމަ، މޮރޮކޯއަށް މޮޅުނުވެވެންވީ ސަބަބެއް ނެތެވެ. އެ ޓީމުން ތަށި ހޯދުމަކީ ވެސް ނުވާނެ ކަމެއް ނޫނެވެ.