ފީފާ އިން އާޖެންޓީނާއަށް ބުރަވީތަ؟

ވޯލްޑް ކަޕްގެ ތަށި ދިފާއުކުރުމަށްޓަކައި އާޖެންޓީނާއިން އަންނަނީ އެ ގައުމުގެ ހުރިހާ ބާރެއް ބޭނުންކުރަމުންނެވެ. އަދި އެކަން އެގޮތަށް ކުރަންވެސް މިވަނީ މަޖުބޫރުވެފަ އެވެ.

ނޮކްއައުޓް ބުރުގެ ފުރަތަމަ ދެ މެޗުގައި ކޭޕް ވާޑް އަދި މިސްރުގެ މައްޗަށް އާޖެންޓީނާއިން ފަސޭހަކަމާއެކު ކުރިހޯދާނެ ކަމަށް ބެލެވުނު ނަމަވެސް، އެ ޓީމަށް އެ ދެ މެޗުންވެސް މޮޅުވެވުނީ 3-2 ގެ ނަތީޖާއަކުން، ވަރަށް ބޮޑަށް ހިތްވަރުކޮށްގެންނެވެ.

ނަމަވެސް، ގަދަ 16 ގައި މިސްރުގެ މައްޗަށް ހޯދި ކާމިޔާބީއާއެކު ބޮޑު މައްސަލައެއް ވަނީ ފެންމަތިވެފަ އެވެ. އެގޮތުން، އެ މެޗުގައި އިންސާފުކުރި ރެފްރީން މުބާރާތުން ވަކިކުރުމަށް އެފްރިކާގެ ގައުމެއް ކަމަށްވާ މިސްރުން މިވަނީ ފީފާގައި އެދިފަ އެވެ.

މިސްރުން ތުހުމަތުކުރާ ގޮތުގައި، ރެފްރީން ވަނީ އާޖެންޓީނާއަށް ބުރަވެ، އެ ގައުމުގެ ތަރި ލިއޮނަލް މެސީއަށް ނާޖާއިޒު ފައިދާތަކެއް ހޯދައިދީފަ އެވެ.

މެޗަށްފަހު ވާހަކަދައްކަމުން މިސްރުގެ ކޯޗު ހުސާމް ހަސަން ބުނީ، އެ ޓީމަށް "ބޭއިންސާފުން" ކަންތައްތައް ކުރިމަތިވި ކަމަށާއި، މެޗުގައި ވަރަށް ބޮޑު "ނާއިންސާފަކާ" ކުރިމަތިލާންޖެހުނު ކަމަށެވެ.

މީގެ އިތުރުން، ފީފާއިން ވަކި ފަރާތަކަށް ޖެހިފައިވާ ކަމަށްވެސް ހަސަން ވަނީ ތުހުމަތުކޮށްފަ އެވެ.

އޭނާ ބުނީ، "ފަހަރުގައި އެމީހުން ބޭނުންވަނީ ދުނިޔޭގެ ޗެމްޕިއަނުން މުބާރާތުގައި ބައިތިއްބަން ކަމަށް ވެދާނެ. ނޫނީ މެސީ މުބާރާތުގައި ކުރިއަށްދާތަން ދެކެން ބޭނުންވަނީ ކަމަށްވެސް ވެދާނެ،" ކަމަށެވެ.

އާޖެންޓީނާއަށް ކާމިޔާބީ ހޯދައިދިނުމަށް ހުރިހާ ކަމެއް ރޭވިފައިވާ ކަމަށް ބުނާ މި "ކޮންސްޕިރަސީ ތިއަރީ" ގައި އެއްވެސް ހަގީގަތެއްވޭތޯ ކުޅިވަރު ދިރާސާ ކުރާ ފަރާތްތަކުން ގެންދަނީ ތަހުގީގުތައް ހިންގަމުންނެވެ.

މިސުރުން ކުރާ ތުހުމަތުގައި ހަގީގަތެއްވޭތަ؟

އަންގާރަ ދުވަހު 3-2 އިން ބަލިވުމުން މިސްރުން އެހާ ބޮޑަށް މާޔޫސްވީ ކީއްވެގެންކަން ދެނެގަތުމަކީ އުނދަގޫ ކަމެއް ނޫނެވެ.

މެޗު ނިމެން 11 މިނެޓަށް ވެފައި ވަނިކޮށް، މިސްރު އޮތީ 2-0 އިން ކުރީގަ އެވެ. އެއީ އެ ގައުމުގެ ތާރީޚުގައި ފުރަތަމަ ފަހަރަށް ވޯލްޑް ކަޕްގެ ކުއާޓާ ފައިނަލަށް ދިއުމާ ފިޔަވަޅަކާ ގާތުގަ އެވެ.

ނަމަވެސް، އާޖެންޓީނާއިން ކުޅުން ވަރުގަދަކޮށް، މެޗުގެ ނަތީޖާ އަނބުރާލައި، އިތުރު ވަގުތުގައި ލަނޑު ޖަހައި މޮޅުވުމުން މިސްރުގެ އުންމީދުތައް ފެނަށްވި އެވެ.

މިސްރުން ބުނާ ގޮތުގައި މި ނަތީޖާގެ ފަހަތުގައި ޝައްކު އުފެދޭ ކަންތައްތަކެއް އެބަހުއްޓެވެ. އެ ޓީމު މުބާރާތުން ވަކިވާންޖެހުނީ ފްރާންސްގެ ރެފްރީ ފްރާންސުއާ ލެޓެކްސިއޭ އާއި އޭނާގެ ޓީމުން ހެދި "ބޮޑެތި ގޯސްތަކެއްގެ" ސަބަބުންނާއި ގެންގުޅުނު "އަޑިނޭނގޭ" އުސޫލުތަކުގެ ސަބަބުން ކަމަށް އެ ގައުމުން ބުނެ އެވެ.

މިސްރުން ޖެހި ލަނޑެއް ވީޑިއޯ އެސިސްޓަންޓް ރެފްރީ (ވީއޭއާރް) މެދުވެރިކޮށް ބަލައި، ރެފްރީ ވަނީ ބާތިލުކޮށްފަ އެވެ.

މީގެ އިތުރުން، އާޖެންޓީނާއިން މެޗުން މޮޅުވި ލަނޑަކީވެސް ގަބޫލުކުރެވޭނެ ލަނޑެއް ނޫން ކަމަށާއި، އޭގެ ބަދަލުގައި މިސްރަށް ޕެނަލްޓީއެއް ލިބެންޖެހޭނެ ކަމަށް އެ ޓީމުން ދައުވާކުރެ އެވެ.

މުސްތަފާ ޒީކޯ ޖެހި މޮޅު ލަނޑު ބާތިލުކުރީ، އެ ހަމަލާ ފެށުނު ވަގުތު މަރުވާން އަތިއްޔާ، އާޖެންޓީނާގެ ލިސަންޑްރޯ މާޓިނޭޒްގެ ފައިމައްޗަށް އެރި ކަމަށް ބުނެ އެވެ.

މިއީ ބަހުސް ކުރެވިދާނެ ނިންމުމެއް ނަމަވެސް، އެ ވަގުތު މިސްރު އޮތީ 1-0 އިން ކުރީގަ އެވެ. އަދި އޭގެ ނުވަ މިނެޓު ފަހުން އެ ޓީމުން ދެވަނަ ލަނޑެއްވެސް ޖެހި އެވެ. އެހެންކަމުން، ޒީކޯގެ ލަނޑު ބަލައިގަތް ނަމަ މެޗުގެ ނަތީޖާ ބަދަލުވާނެ ކަމަށް ބުނާ ބުނުމަކީ ސާބިތުކޮށްދެވޭނެ ކަމެއް ނޫނެވެ.

އެންޒޯ ފެނާންޑޭޒް ބޮލުން ޖަހައި އާޖެންޓީނާ މޮޅުކޮށްދިން ލަނޑުގެ ކުރިން، ދެ ފަހަރެއްގެ މަތިން ޕެނަލްޓީ ލިބެންޖެހޭނެ ކަމަށް މިސްރުން ގަބޫލުކުރެ އެވެ.

އަލެކްސިސް މެކް އެލިސްޓާ ހިފެހެއްޓި ކަމަށް ބުނެ ހަމްދީ ފަތުހީ ވެއްޓުނު ނަމަވެސް، ރިޕްލޭތަކުން އެކަން ސާފެއް ނުވެ އެވެ. އަދި ހޫލިއަން އަލްވަރޭޒް އޭނާ ކައްސާލި ކަމަށް މުހައްމަދު ސަލާހްވެސް ޝަކުވާ ކުރި އެވެ.

މާޓިނޭޒް އާއި ސަލާހްގެ ހާދިސާގައި ފައިގައި ފައިން ޖެހުމުގެ އެއްގޮތް ކަންތައްތަކެއް ހުރި ނަމަވެސް، އެއީ ޕެނަލްޓީއެއް ދޭންޖެހޭ ވަރުގެ ކަމެއް ނޫނެވެ.

ސަލާހަށް ކުރި ފައުލް އޭރިއާގެ ބޭރުން ހިނގި ނަމަ، އެ ލަނޑު ބާތިލުކުރުމުގެ ފުރުސަތު މިސްރަށް ބޮޑުވީހެވެ. އެހެންވިނަމަ، ވީއޭއާރް އިން ބަލާނީ ޕެނަލްޓީއަކަށްވުރެ ބޮޑަށް، މާޓިނޭޒްގެ ހާދިސާގައިވެސް ބެލި ފަދައިން ފައުލެއް ހިނގާފައިވޭތޯ އެވެ.

މިއީ ބަހުސް ކުރެވޭނެ ކަންކަން ކަމަށް ވިޔަސް، މިއީ މެސީއަށް ފައިދާކޮށްދޭން ރާވައިގެން ހިންގާފައިވާ ކަންކަން ކަމަށް ބުނާނެ ހެއްކެއް ނެތެވެ.

ފްރާންސާ ދެކޮޅަށް ނުކުންނާނީ މުޅިންވެސް އާޖެންޓީނާގެ ރެފްރީންގެ ޓީމެއް

ބުރާސްފަތި ދުވަހު ފްރާންސާއި މޮރޮކޯ ބައްދަލުކުރާ ކުއާޓާ ފައިނަލް މެޗަށް ރެފްރީން ހަމަޖައްސާފައިވާ ގޮތަށް ބަލާލަމާ ހިނގާށެވެ.

މި ފަހަރުގެ ވޯލްޑް ކަޕްގައި ފުރަތަމަ ފަހަރަށް، ދަނޑުމަތީގައި ހަރަކާތްތެރިވާ ހުރިހާ ރެފްރީންނަކީ (އިސް ރެފްރީ، ދެ އެސިސްޓަންޓް ރެފްރީން، ހަތަރުވަނަ އޮފިޝަލް އަދި ރިޒާވް އޮފިޝަލް) އެއް ގައުމަކަށް ނިސްބަތްވާ ބައެކެވެ.

އަދި އެ ގައުމަކީ އާޖެންޓީނާ އެވެ.

މީގެ ކުރިން ފަކުންޑޯ ޓެލޯ އިންސާފުކުރި ދެ މެޗުގައި، ހަތަރުވަނަ އޮފިޝަލާއި ރިޒާވް އޮފިޝަލުންނަށް ތިބީ ފުރަތަމަ ސައުދީ އަރަބިއްޔާގެ ރެފްރީންނެވެ. އޭގެ ފަހުން ކޮލަމްބިއާގެ ރެފްރީންނެވެ.

މިކަމާ ގުޅިގެން ދެކެވޭ ވާހަކައަކީ، މުބާރާތް ކާމިޔާބުކުރާނެ ކަމަށް އެންމެ ބޮޑަށް ބެލެވޭ ފްރާންސް މުބާރާތުން ވަކިވުމަކީ އާޖެންޓީނާ ބޭނުންވާނެ ގޮތް ކަމަށެވެ.

މިއީ ޓެލޯގެ ކެރިއަރުގައި އޭނާއަށް ލިބުނު އެންމެ ބޮޑު އެއް މެޗެވެ. އަދި މިއީ ޖެހިޖެހިގެން ދެ ވޯލްޑް ކަޕެއްގައި އޭނާ ކުއާޓާ ފައިނަލް މެޗެއް އިންސާފުކުރާ ދެވަނަ ފަހަރެވެ. މިފަދަ މަތީ ފަންތީގެ ރެފްރީއަކު އޭނާގެ އަބުރާއި އިތުބާރު ގެއްލޭ ފަދަ ކަމެއް ކުރާނެ ކަމަކަށް ނުބެލެވެ އެވެ.

ނަމަވެސް، ކަން ހިނގާ ގޮތަށްވުރެ ބޮޑަށް މީހުންނަށް ފެންނަ ގޮތް މުހިންމުވާ ފަހަރު އާދެއެވެ. ފްރާންސް ކުޅޭ ކުއާޓާ ފައިނަލް މެޗަކަށް އާޖެންޓީނާގެ ރެފްރީން ހަމަޖެއްސުމަކީ ބަލާލަން އެހާ ރީތި މަންޒަރެއް ނޫނެވެ.

ރަތް ކާޑަކުން ސަލާމަތްވެ، މެސީ ފަސް ލަނޑު ޖެހުން

މުބާރާތުގެ ކުރީކޮޅު މެސީއަށް ރަތް ކާޑެއް ދައްކަންޖެހޭ ފަދަ ހާލަތެއް ދިޔަ ހަނދާން އާކޮށްލަމާ ހިނގާށެވެ.

އަލްޖީރިއާގެ ކެޕްޓަން އީސާ މަންޑީއަށް ކުރި ފައުލާ ގުޅިގެން މެސީއަށް ރީނދޫ ކާޑެއްވެސް ނުދައްކަ އެވެ.

އޭގެ ފަހުން، މިދިޔަ ހަފުތާގައި މި ވޯލްޑް ކަޕްގައި އެންމެ ބޮޑު ސަމާލުކަމެއް ލިބުނު އެއް ހާދިސާ ހިނގި އެވެ.

ބޮސްނިއާއާ ދެކޮޅަށް ކުޅުނު މެޗުގައި، މެސީ ކުރި ފައުލާ ދާދި އެއްގޮތް ފައުލެއް ކުރުމުން، ވީއޭއާރް ބެލުމަށްފަހު ފޮލަރިން ބަލޯގަންއަށް ރަތް ކާޑު ދެއްކި އެވެ. ދެ ކުޅުންތެރިންވެސް ފައުލްކޮށްފައިވަނީ އިދިކޮޅު ކުޅުންތެރިޔާގެ ފައިގެ ކުޑަކަޅުވާ މަސްގަނޑަށެވެ.

ބަލޯގަންގެ ސަސްޕެންޝަން އުވާލުމަށް އެމެރިކާއިން މަސައްކަތް ކުރިއިރު، މި ނުކުތާ ފާހަގަކޮށްފައިވާ ކަމަށް ބެލެވެ އެވެ.

މެސީއަށް ރަތް ކާޑު ދެއްކި ނަމަ، އަލްޖީރިއާ ކޮޅަށް ޖެހި ދެ ލަނޑާއި، އޮސްޓްރިއާ ކޮޅަށް ޖެހި ދެ ލަނޑު އޭނާއަކަށް ނުޖެހުނީހެވެ. އެއީ އޭނާ ހުންނާނީ ސަސްޕެންޝަނެއްގައި ކަމަށްވާތީ އެވެ. (ބަލޯގަންގެ މައްސަލައިގައި ފީފާއިން އަމަލުކުރި ގޮތަށް، މާއްދާ 27 ގެ ދަށުން މެސީއަށް ލުޔެއް ނުދޭ ނަމައެވެ.)

އަދި ގްރޫޕް ސްޓޭޖުގެ ފަހު މެޗުގައި އުރުދުންއާ ދެކޮޅަށް ކުޅުނު މެޗުގައިވެސް އޭނާއަކަށް ނުކުޅެވުނީހެވެ. އެ މެޗުގައިވެސް އޭނާ ލަނޑު ޖެހި އެވެ.

މިއީ މި މުބާރާތުގައި މިހާތަނަށް އޭނާ ޖެހި އަށް ލަނޑުގެ ތެރެއިން ފަސް ލަނޑެވެ.

މިއީ މެސީއަށް ދިން ހާއްސަ އިނާޔަތެއް ބާވައެވެ؟

މާޒީގައި އިންފަންޓީނޯ މެސީއަށް ފުރުސަތު ހޯދައިދިނުން

ފީފާގެ ރައީސް ޖިއާނީ އިންފަންޓީނޯ ބާއްވާ މުބާރާތްތަކުގައި މެސީ ބައިވެރިވުމަކީ އޭނާ ވަރަށް ބޭނުންވާ ކަމެއް ކަމަށް ފެނެ އެވެ.

މިދިޔަ އަހަރު އެމެރިކާގައި ބޭއްވި އަލްބަދަލު ކްލަބް ވޯލްޑް ކަޕަށް ބަލާލަމާ ހިނގާށެވެ.

މުބާރާތް ބާއްވާ ގައުމުން ބައިވެރިވާނީ ކޮން ޓީމެއްކަން ކަށަވަރުވުމުގައި ލަސްތަކެއް ކުރިމަތިވި އެވެ.

އާންމު އުސޫލުން ނަމަ، އެއީ 2025 ވަނަ އަހަރުގެ ޗެމްޕިއަން ޓީމެވެ. ސަބަބަކީ މިއީ ކާމިޔާބީގެ މައްޗަށް ބިނާކޮށް އެންމެ މޮޅު ޓީމުތައް ބައިވެރިވާ މުބާރާތަކަށް ވާތީ އެވެ.

ނަމަވެސް ކަންތައްވީ އެހެންނެއް ނޫނެވެ.

އިންޓަ މިއާމީން 2024 ވަނަ އަހަރުގެ އެމްއެލްއެސް ސަޕޯޓާސް ޝީލްޑް (އެންމެ ގިނަ ޕޮއިންޓް ހޯދާ ޓީމަށް ދޭ އެވޯޑް) ކާމިޔާބުކުރި އެވެ.

އެކަމަކު، ޕްލޭ-އޮފް ކާމިޔާބުކޮށް ޗެމްޕިއަންކަން ހޯދީ އެލްއޭ ގެލެކްސީ އެވެ.

އެހެންނަމަވެސް، ކްލަބް ވޯލްޑް ކަޕުން ފުރުސަތު ދިނީ އިންޓަ މިއާމީއަށެވެ.

މީގެ ސަބަބުން، އިންޓަ މިއާމީގެ ހާޑް ރޮކް ސްޓޭޑިއަމްގައި އަލް އަހްލީއާ ދެކޮޅަށް ކުޅުނު ފުރަތަމަ މެޗުގައި ކުޅުމުގެ ފުރުސަތު މެސީއަށް ލިބުނެވެ.

ވޯލްޑް ކަޕްގައި އާޖެންޓިނާ އަށް ފަހި މަގެއް

ފީފާއިން ވަނީ މިދިޔަ ޑިސެމްބަރު މަހު ބޭއްވި ވޯލްޑް ކަޕް ގުރުއަތުލުމަށް ކުޑަ ނަމަވެސް މުހިންމު ބަދަލެއް ގެނެސްފަ އެވެ.

ދުނިޔޭގެ ރޭންކިންގެ ގަދަ ހަތަރު ގައުމު ކަމަށްވާ ފްރާންސް، އާޖެންޓީނާ، ސްޕެއިން އަދި އިންގްލެންޑް ހިމެނީ ވަކި ހަތަރު ކުއާޓާއެއްގަ އެވެ.

މި ގައުމުތަކުން ގްރޫޕްގެ އެއްވަނަ ހޯދައިފި ނަމަ (އެ ގައުމުތަކުން އެއްވަނަ ހޯދިއެވެ)، ސެމީ ފައިނަލާ ހަމައަށް އެއް ގައުމު އަނެއް ގައުމާ ބައްދަލެއް ނުކުރާނެ އެވެ.

ފްރާންސާއި ސްޕެއިން އޮތީ އެއް ފަޅީގަ އެވެ. އެހެންކަމުން އެ ދެ ޓީމު ސެމީގައި ބައްދަލުކުރުމުގެ ފުރުސަތު އެބައޮތެވެ. އަނެއް ފަޅީގައި އޮތީ އާޖެންޓީނާ އާއި އިންގްލެންޑެވެ.

މިގޮތަށް ހެދުމުގެ ބޭނުމަކީ މުބާރާތުގެ ކުރީކޮޅު ބޮޑެތި ޓީމުތައް ބައްދަލުކުރުން މަދުކުރުމެވެ.

ނަމަވެސް، ގްރޫޕްތައް ނިމޭ ގޮތަކުން، މީގެ ސަބަބުން ބޮޑެތި ގައުމުތަކަށް ކުރިއަށްދާން ފަސޭހަ މަގުތަކެއް ލިބިގެންދެ އެވެ.

ނޮކްއައުޓް ބުރުގެ ފުރަތަމަ ދެ ބުރުގައި، ދުނިޔޭގެ ގަދަ 10 ގެ ތެރޭގައި ހިމެނޭ ޓީމުތައް ބައްދަލުކުރީ އެންމެ ދެ މެޗުގައެވެ. އެއީ ނެދަލެންޑްސް އާއި މޮރޮކޯ، އަދި ސްޕެއިން އާއި ޕޯޗުގަލް ބައްދަލުކުރި މެޗެވެ.

އާޖެންޓީނާއަށް ލިބިފައިވަނީ އެންމެ ފަސޭހަ މަގު ކަމަށް ބެލެވެ އެވެ. އެހެންނަމަވެސް، ދުނިޔޭގެ ރޭންކިންގެ 67 ވަނައިގައި އޮތް ކޭޕް ވާޑް އަދި 29 ވަނައިގައި އޮތް މިސްރު އަތުން އެ ޓީމު މޮޅުވީ ކިރިޔާ 3-2 އިންނެވެ.

ކުއާޓާ ފައިނަލްގައި ދެން އެ ޓީމު ނުކުންނާނީ ރޭންކިންގެ 19 ވަނައިގައި އޮތް ސްވިޒަލެންޑާ ދެކޮޅަށެވެ.

އިންގްލެންޑުން ސެމީ ފައިނަލާ ހަމައަށް ދާއިރު، އާޖެންޓީނާއާ ދިމާނުވާ ނަމަ، ރޭންކިންގެ ގަދަ 10 ގެ ޓީމަކާ ބައްދަލެއް ނުކުރާނެއެވެ. ނަމަވެސް އެ ޓީމަށް ވަނީ އަޒްޓެކާ ސްޓޭޑިއަމްގައި 14 ވަނައިގައި އޮތް މެކްސިކޯ ބަލިކުރަން ޖެހިފަ އެވެ.

ސްޕެއިން ވަނީ 5 ވަނައިގައި އޮތް ޕޯޗުގަލް ބަލިކޮށްފަ އެވެ. ދެން އެ ޓީމު ކުޅޭނީ 9 ވަނައިގައި އޮތް ބެލްޖިއަމާ ދެކޮޅަށެވެ. ފްރާންސް ކުއާޓާގައި ނުކުންނާނީ 7 ވަނައިގައި އޮތް މޮރޮކޯއާ ދެކޮޅަށެވެ.

މި ހުރިހާ ކަމަކަށް ބަލާއިރު، އެންމެ ބޮޑު ފައިދާއެއް ލިބިފައިވަނީ އާޖެންޓީނާއަށެވެ.

ރެފްރީން އާޖެންޓީނާއަށް ރީނދޫ ކާޑު ދައްކަނީ މަދުންބާ؟

ކުއާޓާ ފައިނަލް މެޗުތަކަކީ ނުރައްކާ ބޮޑު މެޗުތަކެކެވެ. 17 ކުޅުންތެރިއަކު މިހާރުވެސް ތިބީ ރީނދޫ ކާޑެއްގެ މަތީގަ އެވެ. އެހެންކަމުން އިތުރު ކާޑެއް ލިބިއްޖެ ނަމަ ސެމީ ފައިނަލް މެޗު އެ ކުޅުންތެރިންނަށް ގެއްލޭނެ އެވެ.

ނަމަވެސް އާޖެންޓީނާއަށް މި ބިރު ކުޑައެވެ. ސެމީގައި އިންގްލެންޑް ނުވަތަ ނޯވޭއާ ދެކޮޅަށް ކުޅޭ މެޗު ގެއްލުމުގެ ބިރު އޮތީ ހަމައެކަނި ގޮންޒާލޯ މޮންޓިއެލް އަށެވެ.

އިންގްލެންޑްގެ ކޯޗު ތޯމަސް ޓުޗެލްގެ ހަތަރު ކުޅުންތެރިއަކަށް ވަނީ ރީނދޫ ކާޑު ދައްކާފަ އެވެ. އޭގެ ތެރޭގައި ޓީމުގެ މުހިންމު ކުޅުންތެރިން ކަމަށްވާ ޖޫޑް ބެލިންހަމް އަދި ޑެކްލަން ރައިސް ހިމެނެ އެވެ.

މިހާތަނަށް އެންމެ މަދުން ރީނދޫ ކާޑު ލިބުނު ނޯވޭ ޓީމުގައި ކާޑެއް އޮތީ ހަމައެކަނި އެންޓޯނިއޯ ނޫސާ އަތުގަ އެވެ.

މިކަން ވަޒަންކުރުމަށްޓަކައި، ޓީމުތަކުން ކުރާ ފައުލްގެ އަދަދާއި ލިބޭ ކާޑުގެ އަދަދާ އަޅާކިޔަންޖެހެ އެވެ.

އާޖެންޓީނާއަށް ރީނދޫ ކާޑެއް ދައްކާފައިވަނީ ކޮންމެ 19.7 ފައުލަކަށެވެ.

ފައުލް ކުރާ ނިސްބަތުން އާޖެންޓީނާއަށްވުރެ މަދުން ކާޑު ލިބިފައިވަނީ ހަމައެކަނި ޗެކް ރިޕަބްލިކް (37.0)، ނޯވޭ (24.0) އަދި ޓިއުނީޝިއާ (27.0) އަށެވެ.

މުބާރާތުގައި މިހާރު ތިބި ޓީމުތަކުގެ ތެރެއިން އެންމެ ހަރުކަށިކޮށް ރެފްރީން އަމަލުކޮށްފައިވަނީ އިންގްލެންޑާ މެދުގަ އެވެ. އެ ޓީމަށް ކޮންމެ 7.7 ފައުލަކަށް ރީނދޫ ކާޑެއް ދައްކާފައިވެ އެވެ.

އާޖެންޓީނާއިން އިންގްލެންޑަށްވުރެ ގިނައިން ފައުލްކޮށްފައިވާއިރު، އެ ޓީމަށް ލިބިފައިވަނީ އިންގްލެންޑަށް ލިބުނު ކާޑުގެ ދެބައިކުޅަ އެއްބަ އެވެ.

މިއީ ފައުލް ކުރާ އަދަދަށް ބަލާއިރު، އާޖެންޓީނާއަށް ރެފްރީން ލުއި ދޭކަން ހާމަވާ ކަމެއް ކަމަށް ބެލެވިދާނެ އެވެ.

އާޖެންޓީނާއަށް ލިބޭ ޕެނަލްޓީތައް ދަނީ އިތުރުވަމުން

2022 ވަނަ އަހަރުގެ ވޯލްޑް ކަޕް އާޖެންޓީނާއިން ކާމިޔާބުކުރިއިރު، އެ ޓީމުން ވަނީ އާ ރެކޯޑެއް ގާއިމުކޮށްފަ އެވެ.

އެ މުބާރާތުގައި އެ ޓީމަށް ފަސް ޕެނަލްޓީ ލިބުނެވެ. މިއީ އެއް ވޯލްޑް ކަޕެއްގައި ޓީމަކަށް އެންމެ ގިނަ ޕެނަލްޓީ ލިބުނު ފަހަރެވެ.

2026 ވަނަ އަހަރުގެ މުބާރާތުގައިވެސް މިހާތަނަށް އެންމެ ގިނަ ޕެނަލްޓީ ލިބުނީ އާޖެންޓީނާއަށެވެ. އެ ޓީމަށް ތިން ޕެނަލްޓީ ލިބިފައިވާއިރު، އޮސްޓްރިއާ އަދި މިސްރު މެޗުގައި މެސީ ވަނީ ދެ ޕެނަލްޓީ ނާކާމިޔާބުކޮށްލާފަ އެވެ.

އިންގްލެންޑާއި ސްވިޒަލެންޑަށް ދެ ޕެނަލްޓީ ލިބިފައިވާއިރު، ބެލްޖިއަމް، ފްރާންސް އަދި ނޯވޭއަށް ލިބިފައިވަނީ އެންމެ ޕެނަލްޓީއެކެވެ.