ފީފާގެ ރެފްރީންގެ އިސްވެރިޔާ ކޮލީނާގެ ބަސް: ރެފްރީންގެ ނިންމުން ރަނގަޅު، އިންސާފުވެރިކަމާ މެދު ސުވާލު އުފެއްދުން ބަލައި ނުގަނެވޭނެ!

ފީފާ ވޯލްޑް ކަޕްގެ ގަދަ 16 ގައި އާޖެންޓީނާ އާއި މިޞްރު ބައްދަލު ކުރި މެޗުގައި ރެފްރީންގެ ނިންމުންތައް ވަކި ފަރާތަކަށް ޖެހިފައިވާ ކަމަށް ބުނެ ކުރާ ތުހުމަތުތައް، ފީފާގެ ރެފްރީންނާ ބެހޭ އިސްވެރިޔާ އަދި ދުނިޔޭގައި މިހާތަނަށް އުފެދުނު އެންމެ މޮޅު ފުޓުބޯޅަ ރެފްރީ ޕިއަރްލުއީޖީ ކޮލީނާ ދޮގު ކޮށްފި އެވެ. 

މުބާރާތުގައި އާޖެންޓީނާ އާއި މިޞްރު ބައްދަލު ކުރި މެޗު އާޖެންޓީނާ އިން ކާމިޔާބު ކުރީ، ފަހަތުން އަރައި ތިން ލަނޑު ޖަހައިގެންނެވެ. ކޮލީނާ ވިދާޅުވެފައި ވަނީ، އެ މެޗުގައި ރެފްރީން އަމަލު ކޮށްފައި ވަނީ ފުރިހަމަ މިނިވަންކަމާ އެކު ކަމަށެވެ. 

ފީފާގެ ރަސްމީ ވެބްސައިޓުގައި ބުރާސްފަތި ދުވަހު ޝާއިއުކުރި އިންޓަވިއުއެއްގައި ކޮލީނާ ވިދާޅުވީ، ރެފްރީންނަށް ފާޑު ކިޔުމަކީ ފުޓުބޯޅައިގެ ބައެއް ނަމަވެސް، ރެފްރީންގެ އިޚުލާސްތެރިކަމާ މެދު ސުވާލު އުފެއްދުމަކީ ބަލައި ގަނެވޭނެ ކަމެއް ނޫން ކަމަށެވެ. ކުރު މުއްދަތެއްގެ ތެރޭގައި ގިނަ މެޗު ތަކެއް ކުޅެން ޖެހުމުން ބައެއް ކަންކަން އުންމީދުކުރާ ގޮތަށް ނުދިޔުމަކީ އެކަށީގެންވާ ކަމެއް ކަމަށާއި، އެފަދަ ހާލަތް ތަކުގައި ރެފްރީން ތިބޭނީ ކުރިއަށް އޮތް މެޗު ތަކަށް ވެސް ތައްޔާރުވާން ކަމަށް އޭނާ ފާހަގަ ކުރެއްވި އެވެ. 

އެ މެޗުގައި މިޞްރުގެ މުސްތަފާ ޒީކީ ޖެހި ލަނޑު ބަކައި ނުގަންނަން ވީޑިއޯ އެސިސްޓެންޓް ރެފްރީ (ވީއޭއާރު) އިން ނިންމިއިރު، އެކަމާ މިޞްރުން ވަނީ ކަންބޮޑުވުން ފާޅު ކޮށްފައި އެވެ. މިޞްރުން ބުނެފައި ވަނީ އެއީ ނެތް ފައުލެއް ދައްކައިގެން ކުރި ކަމެއް ކަމަށެވެ.

މި ތުހުމަތު ތަކަށް ރައްދު ދެއްވަމުން ކޮލީނާ ވިދާޅުވީ، ޒީކޯގެ ލަނޑު ބާތިލު ކުރަން ވީއޭއާރް އިން ނިންމީ ރަނގަޅަށް ކަމަށާއި، އެ ލަނޑު ޖެހުމުގެ ކުރިން އާޖެންޓީނާގެ މާޓިނޭޒް އަށް މިޞްރުގެ ކުޅުންތެރިޔާ ފައުލް ކޮށްފައިވާ ކަމަށެވެ. އަދި މިޞްރުގެ މުޙައްމަދު ޞަލާޙު އާއި އާޖެންޓީނާގެ ހޫލިއަން އަލްވަރޭޒްއާ ދެމެދު ހިނގި ކުރިމަތިލުމަކީ، ފުޓުބޯޅައިގައި އާންމުކޮށް ހިނގާ ކަމެއްގެ ގޮތުގައި ރެފްރީ އާއި ވީއޭއާރު އިން ވެސް ނިންމާފައިވާ ކަމަށް އޭނާ ވިދާޅުވި އެވެ. 

ކޮލީނާ އިތުރަށް ވިދާޅުވީ، ފީފާގެ ރެފްރީންގެ ނިންމުން ތަކަށް ފީފާގެ ރައީސް ޖިއާނީ އިންފަންޓީނޯ އަށް ވެސް ނުފޫޒު ނުފޯރުވޭނެ ކަމަށެވެ. އަދި މިފަދަ އަސާސެއް ނެތް ތުހުމަތު ތަކުގެ ސަބަބުން ރެފްރީންނާއި، އެމީހުންގެ އާއިލާ ތަކަށް ނުރައްކާ ކުރިމަތި ވެދާނެ ކަމުގެ އިންޒާރު ވެސް އޭނާ ދެއްވި އެވެ.

ބައެއް ނިންމުން ތަކަކީ ބަލާ މީހާގެ ނަޒަރިއްޔާތުން ތަފާތު ވެދާނެ ކަންކަން ނަމަވެސް، މުޅި މުބާރާތުގައި ވީއޭއާރްގެ އުސޫލުތައް ތަންފީޒު ކުރެވުނު ގޮތާ މެދު ފީފާ އިން ހިތްހަމަ ޖެހޭ ކަމަށް ކޮލީނާ ވިދާޅުވި އެވެ.