15 ބަލިމީހަކު މަރާލިކަން ސާބިތުވެ ޖަރުމަނުގެ ޑޮކްޓަރަކު އުމުރަށް ޖަލަށްލައިފި

ޖަރުމަނުވިލާތުގައި ބަލިމީހުންނަށް ފަރުވާދޭ ޕެލިއޭޓިވް ކެއަރ ޑޮކްޓަރަކު، އޭނާގެ ބެލުމުގެ ދަށުގައި ތިބި 15 ބަލިމީހަކު މަރާލިކަން ސާބިތުވެ، އުމުރަށް ޖަލަށްލުމަށް ހުކުމްކޮށްފި އެވެ.

ޖަރުމަނުގެ ޕްރައިވެސީ ގަވާއިދުތައް އޮންނަ ގޮތުން "ޔޯހަންސް އެމް" ގެ ނަމުން ނަންދެވިފައިވާ މި 41 އަހަރުގެ ޑޮކްޓަރު، 2021 ވަނަ އަހަރުގެ ސެޕްޓެމްބަރު މަހުން ފެށިގެން 2024 ވަނަ އަހަރުގެ ޖުލައި މަހުގެ ނިޔަލަށް 12 އަންހެނުންނާއި 3 ފިރިހެނުން މަރާލިކަން ސާބިތުވާކަމަށް ބާލިންގެ ކޯޓަކުން ވަނީ ކަނޑައަޅާފަ އެވެ.

ކަމާބެހޭ އިދާރާތަކުން ގަބޫލުކުރާ ގޮތުގައި މިއީ މިހާތަނަށް ފެންމަތިވެފައިވާ މަދު މިންވަރެކެވެ. މި ޑޮކްޓަރާ ގުޅުންހުރި އިތުރު އެތައް ހާދިސާއެއް ޕްރޮސިކިއުޓަރުން މިހާރު ދަނީ ތަހުގީގު ކުރަމުންނެވެ.

މި ހާދިސާތަކުގައި މަރުވި މީހުންގެ އުމުރަކީ 25 އަހަރާއި 94 އަހަރާ ދެމެދެވެ. ކޯޓަށް ހުށަހެޅުނު މައުލޫމާތުތަކުން އެނގޭ ގޮތުގައި، އެ އެންމެންނަކީވެސް ބޮޑެތި ބަލިތައް ތަހައްމަލު ކުރަމުންދިޔަ މީހުން ނަމަވެސް، އެއީ އެ ވަގުތު މަރުވާނެ ކަމަށް ބެލެވުނު މީހުންނެއް ނޫނެވެ.

ޕްރޮސިކިއުޓަރުން ބުނި ގޮތުގައި، ބަލިމީހުންގެ ގޭގެއަށް ޒިޔާރަތްކޮށް، އެމީހުންގެ އެއްވެސް ރުހުމެއް ނެތި، ފުރާނައަށް ނުރައްކާވާ ފަދަ ބާރުގަދަ ބޭސްތަކެއް އެއްކޮށްގެން އެ ޑޮކްޓަރު ވަނީ ދީފަ އެވެ.

އަދި އޭނާ ކުރި ކުށް ފޮރުވުމުގެ ގޮތުން، ބައެއް ފަހަރު އެމީހުން ދިރިއުޅޭ ތަންތަނުގައި ރޯކޮށްލާފައިވާ ކަމަށްވެސް ޕްރޮސިކިއުޓަރުން ބުންޏެވެ.

2024 ވަނަ އަހަރުގެ ޖުލައި މަހު އޭނާ ހައްޔަރުކުރުމުގެ ކުޑަދުވަސްކޮޅެއް ކުރިން، އެއް ދުވަހެއްގެ ތެރޭގައި ދެ ބަލިމީހަކު މަރާލާފައިވާ ކަމަށް ޕްރޮސިކިއުޓަރުން ބުނެ އެވެ. އެއީ ބާލިންގެ މެދުތެރޭގައި ހުރި ގެއެއްގައި ދިރިއުޅުނު 75 އަހަރުގެ ފިރިހެނަކާއި، އޭގެ މަދު ގަޑިއިރުތަކެއް ފަހުން އަވަށްޓެރި ސަރަހައްދެއްގައި ދިރިއުޅުނު 76 އަހަރުގެ އަންހެނެކެވެ.

އެ އަންހެން މީހާ މަރާލުމަށްފަހު، އޭނާ ދިރިއުޅުނު ގޭގައި ރޯކޮށްލަން ޑޮކްޓަރު މަސައްކަތް ކުރި ނަމަވެސް އެކަން ކާމިޔާބު ނުވި ކަމަށް ތަހުގީގަށް ވަނީ އެނގިފަ އެވެ.

އަހަރެއްހާ ދުވަހަށް ދެމިގެންދިޔަ މި ޝަރީއަތުގެ ބޮޑު ބައެއްގައި އެ ޑޮކްޓަރު ހުރީ ހަނުހިމޭނުންނެވެ. ނަމަވެސް، ނިމިދިޔަ މަހު އޭނާ ވަނީ ބޮޑެތި ބަލިތައް ތަހައްމަލު ކުރަމުންދިޔަ 12 ބަލިމީހަކު "މަރާލި" ކަމަށް އިއުތިރާފުވެފަ އެވެ.

އޭނާ ކޯޓުގައި ބުނި ގޮތުގައި، އެމީހުން ތަހައްމަލު ކުރަމުންދިޔަ "ވޭނާއި ބަލިމަޑުކަމުން" ސަލާމަތްކޮށްދިނުމަކީ އޭނާ ކުރި ރަނގަޅު ކަމެއް ކަމަށް އޭނާގެ އަމިއްލަ ނަފްސަށް ވިސްނިފައިވެ އެވެ.

"މި ހުރިހާ ކަމެއްގެ ތެރޭގައިވެސް އަހަންނަށް ހީވީ މިއީ އެންމެންނަށްވެސް އެންމެ ރަނގަޅު ގޮތް ކަމަށް،" އޭނާ ބުންޏެވެ.

އަދި އޭނާގެ ސަބަބުން ލިބުނު ހުރިހާ ހިތާމައަކަށް މައާފަށް އެދޭ ކަމަށްވެސް އޭނާ ބުންޏެވެ.

ކަމާބެހޭ އިދާރާތަކުން ތުހުމަތު ކުރާ ގޮތުގައި އޭނާ ވަނީ އިތުރު ބަލިމީހުންވެސް މަރާލާފަ އެވެ. ޕްރޮސިކިއުޓަރުން މިހާރު ދަނީ އިތުރު 76 މައްސަލައެއް ތަހުގީގު ކުރަމުންނެވެ.

ޖަރުމަނުގެ މީޑިއާތަކުން ރިޕޯޓްކުރާ ގޮތުގައި، މި މައްސަލަތައް ސާބިތުވެއްޖެނަމަ، މިއީ ޖަރުމަނުގެ ތާރީޚުގައިވެސް ހިނގި އެންމެ ބޮޑު ސިލްސިލާ މަރުގެ ހާދިސާއަށް ވާނެ އެވެ.

ކުރިއަށް ހުރި ޝަރީއަތްތަކުގައި ބައިވެރިވެ، މައުލޫމާތު ހިއްސާކުރާނެ ކަމަށް ޑޮކްޓަރު ކޯޓުގައި ބުންޏެވެ.

ޝަރީއަތުގެ ކުރީކޮޅު، މަރުވި މީހުންގެ އާއިލާތަކުން ކޯޓުގައި ބުނެފައިވަނީ މިކަން އަދިވެސް ގަބޫލުކުރަން ދަތި ކަމަށެވެ.

2021 ވަނަ އަހަރު މަރުވި، އުމުރުން އެންމެ 25 އަހަރުގެ އަންހެން ކުއްޖާގެ މަންމަ ކޯޓުގައި ރޮމުން ބުނީ، އޭނާގެ ދަރިފުޅު ދުނިޔޭގައި ހުންނަން ބޭނުންނުވާ ކަމަށް ދުވަހަކުވެސް ބުނެފައި ނުވާ ކަމަށެވެ.

އަދި 2024 ވަނަ އަހަރު މަރުވި 72 އަހަރުގެ އަންހެނެއްގެ ފިރިހެން ދަރިފުޅު ބުނި ގޮތުގައި، އޭނާގެ މަންމަ ހުރީ އޭނާގެ ކޮއްކޮއާއެކު ބޯލްޓިކް ކަނޑުގެ ސަރަހައްދަށް ދަތުރެއް ދާން ރާވައިގެންނެވެ. "މަންމަ ބޭނުންވީ ދުނިޔޭގައި ހުންނަން،" އޭނާ ބުންޏެވެ.

ކޯޓުން ނިންމީ ޑޮކްޓަރުގެ ކުށަކީ އާދަޔާ ހިލާފަށް ނުރައްކާތެރި އަދި ސީރިއަސް ކުށެއް ކަމަށެވެ. އެހެންކަމުން، ޖަލު ހުކުމަށްފަހުވެސް އޭނާ މުޖުތަމައަށް ދޫނުކޮށް ބަންދުގައި ބެހެއްޓުމަށާއި، މުޅި އުމުރަށް ޑޮކްޓަރުކަން ކުރުން އޭނާއަށް މަނާކުރުމަށް ކޯޓުން ވަނީ އަމުރުކޮށްފަ އެވެ.