ޖަރުމަނުގެ ޒުވާނުންގެ މަރުކަޒެއްގައި ބަޑިޖަހައި ފަސް މީހަކު މަރާލައިފި

ޖަރުމަނުވިލާތުގެ އުތުރުގެ ސިޓީއެއް ކަމަށްވާ ސްޓޭޑް ގައި ހުންނަ ކުޑަކުދިންނާއި ޒުވާނުންގެ މަރުކަޒެއްގައި ބަޑިޖަހައި ފަސް މީހަކު މަރާލާފައިވާ ކަމަށް އެ ގައުމުގެ ފުލުހުން ބުނެފި އެވެ.

މި ހާދިސާއާ ގުޅިގެން ދެ މީހަކު ފުލުހުންގެ ބެލުމުގެ ދަށަށް ގެނެސްފައިވާ އިރު، އޭގެ ތެރެއިން އެކަކީ މި ހަމަލާ ދިން ކަމަށް ތުހުމަތު ކުރެވޭ މީހާ ކަމަށް ފުލުހުންގެ ތަރުޖަމާނަކު ބީބީސީއަށް މައުލޫމާތު ދީފައިވެ އެވެ.

މި ހަމަލާގައި މަރުވި މީހުންގެ އުމުރާއި، މި ޖަރީމާ ހިންގަން މެދުވެރިވި ސަބަބާ ބެހޭ ތަފްސީލެއް ފުލުހުން އަދި ހާމައެއް ނުކުރެ އެވެ.

މި ބަޑިޖެހުމުގެ ހާދިސާގައި އިތުރު ބަޔަކަށް އެކިވަރުގެ އަނިޔާތައް ލިބިފައިވީ ނަމަވެސް،  އާންމުންނަށް އިތުރު ނުރައްކަލެއް ނެތް ކަމަށް ފުލުހުން ވަނީ ބުނެފަ އެވެ. ހާދިސާ ހިނގި ސަރަހައްދުގައި ކުއްލި ހާލަތްތަކުގައި ހަރަކާތްތެރިވާ ގިނަ އަދަދެއްގެ މުވައްޒަފުން ދަނީ މަސައްކަތް ކުރަމުންނެވެ. 

ހެމްބާގްގެ ހުޅަނގުން އޮންނަ ސްޓޭޑް ސިޓީއަކީ ގާތްގަނޑަކަށް 50،000 މީހުންގެ އާބާދީއެއް އޮންނަ ސިޓީއެކެވެ.