ވިލާތުގެ ގަދަ ހޫނާ ގުޅިގެން 1300 އަށްވުރެ ގިނަ މީހުން މަރުވެއްޖެ

ވިލާތުގެ ގައުމުތަކަށް މިހާރު ކުރިމަތިވެފައިވާ، މީގެ ކުރިން ތަޖުރިބާކޮށްފައި ނުވާ ފަދަ ހޫނުގަދަ މޫސުމުގެ ސަބަބުން އެތައް ސަތޭކަ ބަޔަކު ވަނީ މަރުވެފައި ކަމަށް ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) ގެ އިސްވެރިޔާ ވިދާޅުވެއްޖެ އެވެ.

އާދިއްތަ ދުވަހު ޖަރުމަނުވިލާތާއި، ޕޮލެންޑް އަދި ޗެކް ރިޕަބްލިކް ފަދަ ގައުމުތަކުގެ ފިނިހޫނުމިން ވަނީ ރެކޯޑް މިންވަރަކަށް މައްޗަށް ގޮސްފަ އެވެ.

އެކްސްގައި ކުރެއްވި ޕޯސްޓެއްގައި ޑަބްލިއުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރެޔޭސަސް ވިދާޅުވީ، ޖޫން މަހުގެ 21 ވަނަ ދުވަހުން ފެށިގެން ވިލާތުގެ ގައުމުތަކަށް ކުރިމަތިވެފައިވާ ގަދަ ހޫނާ ގުޅިގެން، އާންމުކޮށް މަރުވާ މިންވަރަށް ވުރެ އިތުރަށް 1,300 އަށް ވުރެ ގިނަ މީހުން މަރުވެފައިވާ ކަމަށް ރެކޯޑް ކުރެވިފައިވާ ކަމަށެވެ.

"ހޫނުގެ ސަބަބުން ކުރިމަތިވާ ތަފާތު އުނދަގޫތަކަކީ ގިނަ ފަހަރަށް 'ހިމޭން ގާތިލެއް' ގެ ގޮތުގައި ސިފަކުރެވޭ ކަމެއް. އަދި ވިލާތުގެ ގޭބިސީތަކާއި، މަސައްކަތްކުރާ ތަންތަނާއި ސްކޫލްތަކަކީ މިފަދަ ގަދަ ހޫނަކަށް ކެތްކުރެވޭ ގޮތަށް ބިނާކޮށްފައިވާ ތަންތަނެއް ނޫން،" ޓެޑްރޯސް ވިދާޅުވި އެވެ.

ފަރަންސޭސިވިލާތުގެ ގައުމީ ސިއްހަތާ ބެހޭ ވުޒާރާއިން އާދިއްތަ ދުވަހުގެ ހެނދުނު ހާމަކުރި ގޮތުގައި، މިދިޔަ ބުދަ ދުވަހުން ފެށިގެން އެ ގައުމުގައި މަރުވާނެ ކަމަށް ލަފާކުރި މިންވަރަށް ވުރެ 1,000 އެއްހާ މީހުން ވަނީ އިތުރަށް މަރުވެފަ އެވެ.

އެ އިދާރާއިން ބުނި ގޮތުގައި މަރުވި މީހުންގެ ތެރޭގައި ގިނައީ އުމުރުން 65 އަހަރުން މަތީގެ މީހުންނެވެ. އަދި ގޭގައި ތިއްބާ މަރުވި މީހުންގެ އަދަދު 40 އިންސައްތަ އިތުރުވެފައިވާ ކަމަށް ވެސް އެ އިދާރާއިން ފާހަގަކުރި އެވެ.

"ވިލާތަކީ ދުނިޔޭގެ އެހެން ބައްރުތަކާ އަޅާބަލާއިރު އެންމެ ހަލުވިކަމާއެކު ހޫނުވަމުންދާ ބައްރު. މި ބައްރު ހޫނުވަމުންދަނީ ދުނިޔޭގެ އެވްރެޖް މިންގަނޑަށް ވުރެ ދެގުނަ ހަލުވިކޮށް،" ޓެޑްރޯސް އިންޒާރު ދެއްވި އެވެ.

އޭނާ އިތުރަށް ވިދާޅުވީ، ވިލާތުގެ އެތައް މިލިއަން ބަޔަކު މިހާރު ދިރިއުޅެމުންދަނީ އިންތިހާއަށް ގަދަ ހޫނުގެ ތެރޭގައި ކަމަށާއި، އެތައް ސަތޭކަ ބަޔަކު މަރުވެ، ސްކޫލްތައް ބަންދުކޮށް، ކަރަންޓުގެ ވިއުގަތަކަށް ނުކަތާވަރަށް ބާރުބޮޑުވެފައިވާ ކަމަށެވެ.

ވަގުތީ ތަފާސްހިސާބުތަކުން ދައްކާ ގޮތުގައި، ޖަރުމަނުވިލާތުގެ އިރުމަތީ ސަރަހައްދުތަކުގެ ފިނިހޫނުމިން 41.7 ޑިގްރީ ސެލްސިއަސްއަށް އެރުމާއެކު، ޖެހިޖެހިގެން ތިންވަނަ ދުވަހަށް އެ ގައުމުގެ ތާރީޚުގައި ވެސް އެންމެ ހޫނުގަދަ ދުވަހުގެ ރެކޯޑް އާދިއްތަ ދުވަހު ވަނީ އާވެފަ އެވެ.

ޕޮލެންޑް ބޯޑަރު ކައިރީގައި އޮންނަ އިރުމަތީ ބްރަންޑަންބާގްގެ ކޯޝަންގައި ހުންނަ ސްޓޭޝަނަކަށް، އެ ގައުމުގެ ގަޑިން ހަވީރު 16:00 ހާއިރު 41.7 ޑިގްރީ ސެލްސިއަސްގެ ހޫނުމިން ވަނީ ރެކޯޑް ކުރެވިފަ އެވެ.

ޗެކް ރިޕަބްލިކްގެ މީޓިއޮރޮލޮޖިކަލް އިންސްޓިޓިއުޓް (ސީއެޗްއެމްއައި) އިން ބުނި ގޮތުގައި، ޕްރާގްގެ އުތުރުގައި އޮންނަ ޑޮކްސަނީގެ ފިނިހޫނުމިން 41.1 ޑިގްރީ ސެލްސިއަސްއަށް އެރުމާއެކު، ދެ ދުވަސް ތެރޭގައި ދެވަނަ ފަހަރަށް އެ ގައުމުގެ ހޫނުމިނުގެ ރެކޯޑް ވަނީ އާވެފަ އެވެ.

ސީއެޗްއެމްއައި އިން ލަފާކުރާ ގޮތުގައި އާދިއްތަ ދުވަހަކީ ހޫނުމިން އެންމެ މައްޗަށް ދާނެ ދުވަހެވެ. އަދި އެ ދުވަހުގެ ފަހުގެ ވަގުތެއްގައި ހުޅަނގުގެ ސަރަހައްދުތަކަށް ތޫފާންތައް ކުރިމަތިވާނެ ކަމަށް ވެސް ވަނީ ލަފާކޮށްފަ އެވެ.

ޕޮލެންޑްގެ މީޓިއޮރޮލޮޖީ އެންޑް ވޯޓަރ މެނޭޖްމަންޓް (އައިއެމްޖީޑަބްލިއު) ގެ ތަރުޖަމާނަކު އޭއެފްޕީ ނިއުސް އެޖެންސީއަށް މައުލޫމާތު ދެއްވި ގޮތުގައި، އެ ގައުމުގެ ސްލޫބިސް އަވަށުގެ ފިނިހޫނުމިން 40.5 ޑިގްރީ ސެލްސިއަސްއަށް އެރުމާއެކު، ޕޮލެންޑްގެ ތާރީޚުގައި ވެސް މިހާތަނަށް ރެކޯޑް ކުރެވުނު އެންމެ މަތީ ހޫނުމިނުގެ ރެކޯޑް އާދިއްތަ ދުވަހު ވަނީ އާވެފަ އެވެ.