ޖަރުމަނުގައި މުވައްޒަކު ބަލިވެގެން ފޯނުން ސަލާމް ބުނާ އުސޫލު އުވާލައި އެންމެ ދުވަހަކު ބަލިވިޔަސް ޑޮކްޓަރުގެ ލިޔުން ގެންނަން މަޖުބޫރުކޮށްފި

ޖަރުމަނުވިލާތައި މުވައްޒަފުން ބަލިވެގެން ސަލާމް ބުނާ މިންވަރު "އާދަޔާ ހިލާފަށް އިތުރުވުމާ" ގުޅިގެން، އެކަން ހުއްޓުވުމަށް ހަރުކަށި ފިޔަވަޅުތަކެއް އެ ގައުމުގެ ޗާންސެލަރ ފްރީޑްރިކް މާރޒް އިއުލާން ކުރައްވައިފި އެވެ.

މި އިސްލާހީ ފިޔަވަޅުތަކުގެ ދަށުން، އެންމެ ދުވަހަކު ބަލިވެގެން ސަލާމް ބުނި ނަމަވެސް، ޑޮކްޓަރުގެ ސިޓީއެއް ހުށަހަޅަން ޖެހޭނެއެވެ. މިއީ ވަރަށް ބޮޑު ބަހުސަކަށް ވެފައިވާ ނިންމުމެއް ނަމަވެސް، މިއީ ގައުމުގެ ހާލަތަށް ބަލާއިރު ނިންމަން ޖެހިފައިވާ "އުނދަގޫ ނިންމުމެއް" ކަމަށް ޗާންސެލަރ ވަނީ ވިދާޅުވެފަ އެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ބުރާސްފަތި ދުވަހު ޗާންސެލަރ މާރޒް ވިދާޅުވީ، ޖަރުމަނުގެ ކުންފުނިތަކުގައި މުވައްޒަފުން ބަލިވެގެން ސަލާމް ބުނާ މިންވަރު އާދަޔާ ހިލާފަށް މަތިވެފައިވާތީ، އެކަން ދެން ބަލައިނުގަނެވޭނެ ކަމަށެވެ.

މީގެ އިތުރުން އޭނާ ވިދާޅުވީ، ފޯނުން ގުޅާލުމަށްފަހު ބަލިވެގެން ސަލާމް ބުނެވޭ އުސޫލު މިހާރު އުވާލާފައިވާ ކަމަށާއި، ބަލިވާ ފުރަތަމަ ދުވަހުން ފެށިގެން މެޑިކަލް ސެޓްފިކެޓް ނުވަތަ ޑޮކްޓަރުގެ ލިޔުން ހުށަހަޅަން ޖެހޭނެ ކަމަށެވެ. އަދި މުވައްޒަފުން ގިނަ ދުވަސްތަކެއް ވަންދެން މަސައްކަތަށް ނުނިކުމެ ތިބުމުގެ ސަބަބުން، ވާދަވެރި މާކެޓުގައި ޖަރުމަނަށް ލިބޭ ގެއްލުންތަކަށް ދެން ކެތް ނުކުރެވޭނެ ކަމަށްވެސް އޭނާ ވިދާޅުވި އެވެ.

ޖަރުމަނުވިލާތުގައި ބަލިވެގެން ސަލާމް ބުނާ މިންވަރު މާ މަތިކަމަށް ވިދާޅުވެ، ޗާންސެލަރ މާރޒް މީގެ ކުރިންވެސް ތަކުރާރުކޮށް ޝަކުވާ ކުރައްވާފައިވެ އެވެ. އަދި ހަފުތާއަކު ހަތަރު ދުވަހު މަސައްކަތް ކުރާ ގޮތަށް ހަމަޖެއްސުމާ ދެކޮޅު ހެއްދެވުމުގެ ސަބަބުންވެސް ޖަރުމަނުގެ ރައްޔިތުންގެ ނުރުހުން މީގެ ކުރިން އޭނާއަށް އަމާޒުވެފައިވެ އެވެ.

މިހާތަނަށް އަމަލުކުރަމުން އައި އުސޫލަކީ، ޑޮކްޓަރަކަށް ނުދައްކައި ތިން ދުވަހާ ހަމައަށް ބަލިވެގެން ސަލާމް ބުނެވުމެވެ.

އަދި ކުރިން އޮތް ގޮތުން ނަމަ، ޑޮކްޓަރަށް ޒިޔާރަތް ކުރުމެއް ނެތި، ފޯނުން ގުޅާލުމަށްފަހު އެއް ހަފުތާގެ މުއްދަތަށް ސަލާމް ބުނުމުގެ ފުރުސަތު މުވައްޒަފުންނަށް އޮވެއެވެ.

ނަމަވެސް، އާ އުސޫލުގެ ދަށުން ބަލިވާ ފުރަތަމަ ދުވަހުން ފެށިގެން ޑޮކްޓަރުގެ ސިޓީ ހޯދުން ވަނީ މަޖުބޫރުކޮށްފަ އެވެ.

ޗާންސެލަރ ނޫސްވެރިންނަށް މައުލޫމާތު ދެއްވަމުން ވިދާޅުވީ، މި ބަދަލުތަކުގެ ބޭނުމަކީ ޖަރުމަނުގެ އިގްތިސާދު އަލުން ކުރިއަށްދާނެ މަގަށް ރުޖޫއަކުރުން ކަމަށެވެ.

މި އިސްލާހީ ފިޔަވަޅުތަކުގެ ތެރޭގައި، ދަށް އާމްދަނީ ލިބޭ މީހުންނަށް އަހަރަކު 8.5 ބިލިއަން ޕައުންޑުގެ ޓެކްސް ލުއި ދިނުމާއި، އަގުހެޔޮ ބޯހިޔާވަހިކަން އިތުރުކުރުމާއި، އަދި އިނާޔަތްތަކަށް މަކަރު ހަދާ މީހުން ހޯދައި ފިޔަވަޅު އެޅުން ހިމެނެ އެވެ.

ޓެކްސްގެ މި ލުއިތަކަށް ބޭނުންވާ ފައިސާ ހޯދުމަށް ހަމަޖެހިފައިވަނީ، އަހަރަކު 250,000 ޕައުންޑަށްވުރެ ގިނައިން އާމްދަނީ ލިބޭ މީހުންގެ އަތުން ނަގާ ޓެކްސް 45 އިންސައްތައިން 47 އިންސައްތައަށް ބޮޑުކޮށްގެންނެވެ.

އެމްޕްލޯޔާސް އެސޯސިއޭޝަންގެ ރައީސް ރައިނާ ޑުލްގާ ވަނީ މި ފިޔަވަޅުތަކަށް މަރުހަބާ ވިދާޅުވެ، މިއީ މާ ކުރިންވެސް ގެންނަން ޖެހިފައިވާ ބަދަލެއް ކަމަށް ސިފަކުރައްވާފަ އެވެ.

ނަމަވެސް، މި އާ އުސޫލުގެ ސަބަބުން ގައުމުގެ ސިއްހީ ނިޒާމަށް ބާރުބޮޑުވެ، ނިޒާމު ހުއްޓުމަކަށް އަތުވެދާނެ ކަމުގެ ބިރު އެބައޮތެވެ.

ޖަރުމަނުގެ އެސޯސިއޭޝަން އޮފް ޖެނެރަލް ޕްރެކްޓިޝަނާސްގެ ވެރިޔާ މާކަސް ބްލޫމެންތަލް-ބެޔާ، އާރު.އެން.ޑީ މީޑިއާ ގްރޫޕަށް ދެއްވި އިންޓަވިއުއެއްގައި ވިދާޅުވީ، މި ބަދަލުތަކަކީ "ވަރަށް ބޮޑު ކާރިސާއެއް" ކަމަށާއި، މީގެ ސަބަބުން ސިއްހީ ނިޒާމަށް ނުކަތާވަރަށް ބާރުބޮޑުވާނެ ކަމަށެވެ.

ޑޮއިޗޭ ބޭންކުގެ ސީނިއާ އިކޮނޮމިސްޓް މާރިއަން މުއެލްބާގާ ވިދާޅުވީ، މިއީ ފާއިތުވި ދިހަވަރަކަށް އަހަރު ތެރޭގައި ޖަރުމަނުން އިއުލާންކުރި އެންމެ ބޮޑު އެއް އިސްލާހީ މަޝްރޫއު ކަމަށެވެ.

އަދި މިއީ މުހިންމު އޮނިގަނޑުތަކަށް ބަދަލު ގެނައުމުގައި ސަރުކާރުގެ ގާބިލުކަން ހުރިކަން ހާމަކޮށްދޭ ކަމެއް ކަމަށްވެސް އޭނާ ވިދާޅުވި އެވެ.