ޚާމަނާއީގެ ޖަނާޒާގައި ބައިވެރިނުވާކަމަށް ދިވެހި ސަރުކާރުން އެންމެ ފަހުން އިއުތިރާފު ވެއްޖެ

އަވަހާރަކޮށްލާފައިވާ އީރާނުގެ ކުރީގެ އެންމެ މަތީވެރިޔާ އާޔަތުﷲ އަލީ ޚާމަނާއީގެ ޖަނާޒާގައި ދިވެހި ސަރުކާރުގެ މަންދޫބަކު ބައިވެރިނުވާކަން ސަރުކާރުން އެންމެ ފަހުން ހާމަކޮށްފި އެވެ.

ފޮރިން މިނިސްޓްރީން ބުދަ ދުވަހުގެރޭ ނެރުނު ނޫސް ބަޔާނެއްގައި ބުނެފައިވަނީ، ޚާމަނާއީގެ ޖަނާޒާގައި ދިވެހި ސަރުކާރުގެ މަންދޫބަކަށް ބައިވެރިނުވެވުނީ ކުއްލި ގޮތަކަށް ޕްރޮޓޮކޯލަށް ގެނައި ބަދަލެއްގެ ސަބަބުން ކަމަށެވެ.

Raajje.mv

ޚާމަނާއީގެ ޖަނާޒާގައި ރާއްޖޭގެ ފަރާތުން ބައިވެރިވި އޮފިޝަލު ހޯދުމަށް އާރްޓީއައި ހުށަހަޅަން އަންގައިފި

ނަމަވެސް، ޚާމަނާއީގެ ޖަނާޒާގައި ރާއްޖެއިން ބައިވެރިނުވާކަމުގެ އަޑުތައް ފެތުރުމުން، މީގެ ކުރިން ސަރުކާރުން ވަނީ އެކަން ސިއްރުކުރަން މަސައްކަތް ކޮށްފަ އެވެ. އެގޮތުން ރާއްޖެ ޓީވީން ކުރި ސުވާލަކަށް ޖަވާބު ދެއްވަމުން ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފް (މުންދު) ވިދާޅުވީ، ޚާމަނާއީގެ ޖަނާޒާގައި ރާއްޖޭގެ ފަރާތުން ބައިވެރިވާނީ ގަލްފް ސަރަހައްދުގައި ހުންނަވާ ސަފީރެއް ކަމަށެވެ. އެހެންނަމަވެސް، އެ ސަފީރުގެ ނަން ހާމަކުރަން މުންދު އެ ފަހަރު ވަނީ ދެކޮޅު ހައްދަވާފަ އެވެ. އަދި މި މައުލޫމާތު ހޯދުމަށް ފޮރިން މިނިސްޓްރީއަށް ގުޅުމުން، އެ މިނިސްޓްރީގެ އިންފޮމޭޝަން އޮފިސަރު ވަނީ އެކަމަށް އާރްޓީ އައި ހުށަހެޅުމަށް ބުނެފަ އެވެ.

ފޮރިން މިނިސްޓްރީގެ ބަޔާނުގައި ވާގޮތުން، ޖުލައި 3 ވީ ހުކުރު ދުވަހު ބޭއްވި ޚާމަނާއީގެ ރަސްމީ ޖަނާޒާގައި ބައިވެރިވުމަށް ރާއްޖެއަށް ދައުވަތު ލިބުނެވެ. އެހެންކަމުން، ރާއްޖޭގެ ފަރާތުން ސައުދީ އަރަބިއްޔާއަށާއި އޯއައިސީއަށް ކަނޑައަޅާފައި ހުންނަވާ ސަފީރު އަޙްމަދު ސަރީރު ބައިވެރިވެވަޑައިގަންނަވާނެ ކަމަށް އީރާނު ސަރުކާރަށް ރަސްމީކޮށް އެންގި އެވެ.

ނަމަވެސް، ސަފީރު ފުރާވަޑައިގަންނަވަން ކައިރިވެފައި ވަނިކޮށް، އީރާން އެމްބަސީން އަންގާފައިވަނީ ޕްރޮޓޮކޯލް ހަމަޖެހިފައިވާ ގޮތުން ސަފީރުންގެ ލެވެލްގައި ބައިވެރިނުވެވޭނެ ކަމަށެވެ. އެއާއެކު، ސްޓޭޓް މިނިސްޓަރުގެ ފެންވަރުގެ ބޭފުޅަކު ފޮނުވަން މަސައްކަތް ކުރި ނަމަވެސް، ފްލައިޓްތަކުގެ ވަގުތުތައް ހުރި ގޮތުން ޖަނާޒާ ނިމުމުގެ ކުރިން އީރާނަށް ދެވޭގޮތް ނުވީ ކަމަށް މިނިސްޓްރީން ބުނެފައިވެ އެވެ.

އާޔަތުﷲ އަލީ ޚާމަނާއީ އަވަހާރަވީ މިދިޔަ ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން އެމަނިކުފާނުގެ ރަސްމީ ގެކޮޅަށް ދިން ހަމަލާއެއްގަ އެވެ. މި ޖަނާޒާގައި 100 އަށް ވުރެ ގިނަ ގައުމުގެ މަންދޫބުން ބައިވެރިވިއިރު، ރައީސް މުއިއްޒުގެ ސަރުކާރުން މިކަމުގައި ގެންގުޅުނު ސިޔާސަތަށް ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ. ޚާއްޞަކޮށް، އިސްލާމީ ގައުމެއްގެ ވެރިޔަކު އަވަހާރަވުމުން ރާއްޖޭގައި އަމަލުކުރާ އުސޫލުން ތައުޒިޔާ ކިޔާފައި ނުވާތީ ގިނަ ބަޔަކު ދަނީ ސަރުކާރަށް ފާޑު ކިޔަމުންނެވެ.