ކުރީގެ ރައީސުން މުޒާހަރާތަކުގައި ބައިވެރިވާއިރު ސެކިއުރިޓީ ދޭން ނުޖެހޭ ގޮތަށް 241 ކޮމެޓީއަށް ނުނިންމޭނެ: އަލީ ހުސެއިން

ކުރީގެ ރައީސުން މުޒާހަރާތަކުގައި ބައިވެރިވާ ވަގުތުތަކުގައި އެމްއެންޑީއެފްގެ ސެކިއުރިޓީ ދޭން ނުޖެހޭ ގޮތަށް އުސޫލު އިސްލާހުކުރަން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީން) އަށް ނުނިންމޭނެ ކަމަށާއި، ރާއްޖޭގެ ގާނޫނު އަސާސީން އެގޮތަށް އެކަން ކުރުމުގެ ފުރުސަތު ނުދޭ ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން ވިދާޅުވެއްޖެ އެވެ.

ރާއްޖެޓީވީގައި ވާހަކަ ދައްކަވަމުން އަލީ ހުސެއިން ވިދާޅުވީ މުޒާހަރާ ކުރުމަކީ ކޮންމެ ދިވެއްސަކަށް ލިބޭ ހައްގެއް ކަމަށާއި، އެ ހައްގަށް ހުރަސް ނޭޅޭނެ ކަމަށެވެ. 

ކުރީގެ ރައީސުން މުޒާހަރާތަކުގައި ބައިވެރިވާ ވަގުތުތަކުގައި އެމްއެންޑީއެފްގެ ސެކިއުރިޓީ ދޭން ނުޖެހޭ ގޮތަށް އުސޫލު އިސްލާހުކުރަން 241 ކޮމެޓީން ނިންމާފައިވާތީ އެކަމަށް އިޝާރާތް ކުރައްވައި އަލީ ހުސެއިން ވިދާޅުވީ 241 ކޮމެޓީއަށް އެ ގޮތަށް ނުނިންމޭނެ ކަމަށާއި، ސެކިއުރިޓީ ދޭން ނުޖެހޭ ގޮތަށް ނިންމޭނީ ގާނޫނު އަސާސީ ބަދަލު ކޮށްގެން ކަމަށެވެ.

އަލީ ހުސެއިން ވިދާޅުވީ ވަކި ޚާއްސަ ބަޔަކަށް ޚާއްސަ ގާނޫނަކުން ސަލާމާއި ރައްކާތެރިކަން ފޯރުކޮށްދޭއިރު، 241 ކޮމެޓީއަށް ވެސް އެކަން ނިގުޅައި ނުގަނެވޭނެ ކަމަށެވެ. އަދި އެހެން ކޮމެޓީއަކަށް ވެސް އެމަސައްކަތް ނުކުރެވޭނެ ކަމަށް އޭނާ ވިދާޅުވި އެވެ.

މީގެ އިތުރުން އަލީ ހުސެއިން ވިދާޅުވީ ކޮމެޓީން މިފަދަ ނިންމުމެއް ނިންމަން މަސައްކަތް ކުރަނީ މާ ބޮޑަށް މިސަރުކާރު ބޭޒާރު ވެދާނެތީ ކަމަށާއި، އެ ވާހަކަތައް މާގިނައިން ރަށު ތެރޭގައި ދެކެވޭނެތީ ކަމަށެވެ. އަދި މިކަމުގެ ސަބަބުން ވެސް މިސަރުކާރުގެ އަގު ވެއްޓޭނެ ކަމަށް އޭނާ ވިދާޅުވި އެވެ. 

ގާނޫނަށް އެ ބަދަލު ނުގެނެސް ހަމަ 241 ކޮމެޓީ ގައި ނުނިންމޭނެ އިނގޭތޯ. 241 ކޮމެޓީން ނިންމާ ނިންމުންތަކަކީ އެގޮތަކަށް އެއީކީ ގާނޫނެއް ނޫންތޯ؟ ގާނޫނަކަށް ބަދަލެއް ނުގެނެވޭނެ 241 ކޮމެޓީއަކަށް އަމިއްލަ އަކަށް. މުޅި ރައްޔިތުންގެ މަޖިލީހުގައި ހަމަ ބިލެއް ހުށަހަޅައިގެން އެ ގާނޫނަށް ބަދަލު ގެނެސްގެން އެކަން ކުރަންޏާ ކުރެވޭނެ. ދެން އެގޮތަށް ކުރީމާ، ދެން އެ ދެން އަޅުގަނޑުމެން ސުވާލުކުރާނީ އެއީ، އެއީ އިންސާފުވެރި ގާނޫނެއްތޯ ނުވަތަ ނޫންތޯ ނުވަތަ ގާނޫނުއަސާސީ ތައާރުޒްވޭތޯ ނޫންތޯ ތެދެއްތޯ.

ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސައިން 

އަލީ ހުސެއިން ވިދާޅުވީ ކުރީގެ ރައީސުން މުޒާހަރާތަކުގައި ބައިވެރިވާ ވަގުތުތަކުގައި އެމްއެންޑީއެފްގެ ސެކިއުރިޓީ ދޭން ނުޖެހޭ ގޮތަށް ނިންމައިފިނަމަ މާދަމާ ރައީސް މުއިއްޒަށް ވެސް އެ ހިމާޔަތާއި ރައްކާތެރިކަން ނުލިބޭ ކަމަށެވެ.