މާލޭގެ ސްކޫލެއްގެ ދަރިވަރުންތަކަކަށް ހޭންޑް، ފުޓް އެންޑް މައުތު ޑިޒީޒް ޖެހުނުކަން އެނގިފައިވަކަން ސުކޫލުން ބެލެނިވެރިންނަށް އަންގައިފި

މާލޭގެ ސްކޫލެއްގެ ދަރިވަރުންތަކަކަށް އަތާއި ފައި އަދި އަނގަޔަށް ޖެހޭ ބަލި ނުވަތަ ހޭންޑް، ފުޓް އެންޑް މައުތު ޑިޒީޒް (އެޗްއެފްއެމްޑީ) ޖެހިފައިވާކަން އެނގިފައިވާތީ، އެކަމަށް ސަމާލުވުމަށް ބެލެނިވެރިންނަށް އަންގައިފި އެވެ. މި ބަލީގެ ކޭސްތަކެއް ފެނިފައިވާކަން އެ ސްކޫލުން ބެލެނިވެރިންނަށް ފޮނުވި މުހިންމު ސިއްހީ ނޯޓިހެއްގައި ވަނީ ކަށަވަރުކޮށްދީފަ އެވެ.

މިއީ ކުޑަކުދިންގެ މެދުގައި ވަރަށް ހަލުވިކަމާއެކު ފެތުރޭ ވައިރަލް ބައްޔަކަށް ވާތީ، ސްކޫލްގެ ތެރޭގައި ބަލި ފެތުރުން ހުއްޓުވުމަށްޓަކައި ބެލެނިވެރިންގެ އެއްބާރުލުމަށް ސްކޫލުން ވަނީ އެދިފަ އެވެ. މިގޮތުން ދަރިވަރުންގެ ހަށިގަނޑުން ބަލީގެ އެއްވެސް އަލާމާތެއް ފެނޭތޯ ވަރަށް ގާތުން ބެލުމަށް ވަނީ އިލްތިމާސްކޮށްފަ އެވެ.

އެ ނޯޓިހުގައި ބަޔާންކޮށްފައިވާ ގޮތުގައި ބަލީގެ އަލާމާތްތަކުގެ ތެރޭގައި ހުން އައުމާއި، އަތާއި ފައި އަދި އަނގަ ހިމެނޭހެން ހަށިގަނޑުގެ އެކި ބައިތަކުގައި ބިހި ނުވަތަ ފޮޅު ނެގުން ހިމެނެ އެވެ. މީގެ އިތުރުން ކާބޯތަކެތި ބޭނުންކުރުމަށް އުނދަގޫވާ ފަދަ ގޮތަކަށް އަނގަ ފާރުވުމާއި ކަރުގައި ރިއްސުމަކީ ވެސް މި ބަލީގެ އަލާމާތްތަކެއް ކަމަށް ފާހަގަކޮށްފައިވެ އެވެ.

ދަރިވަރުންގެ ކިބައިން މިފަދަ އެއްވެސް އަލާމާތެއް ފެނިއްޖެ ނަމަ، ބަލިން މުޅިން ފަސޭހަވެ، އެހެން ކުދިންނަށް ބަލި ފެތުރުމުގެ ފުރުސަތު ނެތްކަން ޔަގީންވަންދެން ސްކޫލަށް ނުފޮނުވައި ގޭގައި ބޭތިއްބުމަށް ސްކޫލުން ވަނީ އެދިފަ އެވެ. އަދި ކޮންމެ ދުވަހަކު ވެސް ސްކޫލަށް ކުދިން ފޮނުވުމުގެ ކުރިން، އެއްވެސް އާދަޔާ ހިލާފު އަލާމާތެއް ހުރިތޯ ބެލުމަށް ސިއްހީ ޗެކަޕެއް ހެދުމަށް ބެލެނިވެރިންނަށް ވަނީ ބާރުއަޅާފަ އެވެ.