ޗައިނާގެ ހޫބޭއަށް ކުރިމަތިވި ނަގޫރޯޅިތަކާއެކު 11 މީހުން މަރުވެ، 300 އަށްވުރެ ގިނަ މީހުން ޒަޚަމް ވެއްޖެ
ޗައިނާގެ ހޫބޭ ޕްރޮވިންސްގެ އެޒޫ އަދި ހުއަންގްގަންގް ސިޓީއަށް ކުރިމަތިވި ނަގޫރޯޅިތަކާއެކު ގިނަ އަދަދެއްގެ ދަރިވަރުންނަށް އަނިޔާވެ، އެތައް ހާސް އިމާރާތަކަށް ބޮޑެތި ގެއްލުންތަކެއް ވަނީ ލިބިފަ. މި ހާދިސާގައި 300 އަށްވުރެ ގިނަ މީހުން ޒަޚަމްވެފައިވާއިރު، ކަމާބެހޭ އިދާރާތަކުން މިހާރު ދަނީ އެ ސަރަހައްދުގައި މީހުން ސަލާމަތްކުރުމުގެ މަސައްކަތް ހަލުވިކަމާއެކު ކުރަމުން. މިއީ 2021 ވަނަ އަހަރަށްފަހު އެ ސަރަހައްދަށް މިފަދަ ނުރައްކާތެރި ތޫފާނެއް ކުރިމަތިވި ފުރަތަމަ ފަހަރު.
މި ނަގޫރޯޅީގެ ސަބަބުން ޗައިނާގެ ބައެއް ސަރަހައްދުތަކުގެ މުވާސަލާތީ ޚިދުމަތްތަކަށާއި، ކަރަންޓުގެ ޚިދުމަތަށް ބުރޫ އަރާފައިވާއިރު، ގިނަ އަދަދެއްގެ އިމާރާތްތަކަށް ވަނީ އެކިވަރުގެ ގެއްލުންތައް ލިބިފަ | ރޮއިޓާސް
ޗައިނާގެ މެދުތެރޭގެ ހޫބޭ ޕްރޮވިންސްގެ ރަށްތަކަށް ކުރިމަތިވި ބާރުގަދަ ގުގުރުމާއެކީ އައި ތޫފާނެއްގައި، މަދުވެގެން 11 މީހުން މަރުވެފައިވާ ކަމަށް އެ ގައުމުގެ ދައުލަތުގެ މީޑިއާތަކުން ރިޕޯޓްކޮށްފި އެވެ.
މި ތޫފާނުގެ ތެރޭގައި އުފެދުނު ނަގޫރޯޅިތަކުގެ ވީޑިއޯތައް ސޯޝަލް މީޑިއާގައި ދައުރުވަމުންދާއިރު، މި ވީޑިއޯތައް ނަގާފައިވަނީ އަވަށްޓެރި ދެ ސިޓީ ކަމަށްވާ އެޒޫ އަދި ހުއަންގްގަންގް އިންނެވެ.
ހުއަންގްގަންގް ސިޓީގައި ކިޔަވާ ދަރިވަރަކު ބީބީސީއަށް މައުލޫމާތު ދެމުން ބުނީ، އެއީ އާދައިގެ ގުގުރުމާއެކީ އަންނަ ވާރޭކޮޅެއް ކަމަށް ފުރަތަމަ ހީވި ނަމަވެސް، ޑޯމިޓަރީގެ ކުޑަދޮރުން ބޭރު ބަލާލިއިރު އެކި ތަކެތި ވައިގެ ތެރޭގައި އުދުހެމުންދާ މަންޒަރު ފެނުނު ކަމަށެވެ.
އެ ދަރިވަރު އިތުރަށް ކިޔައިދިން ގޮތުގައި، ވައިގެ ތެރޭގައި އުދުހެމުންދިޔަ ބިއްލޫރިތައް ހެރުމުގެ ސަބަބުން ގިނަ އަދަދެއްގެ ދަރިވަރުން ޒަޚަމްވި އެވެ. އަދި އެ ހުރިހާ ކަމެއް ހުއްޓުމަކަށް އައުމުން ނޫނީ، އޭނާއަށް ކުރިމަތިވީ ބޮޑު ކާރިސާއަކާކަން އިހުސާސް ނުކުރެވޭ ކަމަށްވެސް އޭނާ ބުންޏެވެ.
ދައުލަތުގެ މީޑިއާތަކުން ބުނާ ގޮތުގައި މިއީ އެ ސަރަހައްދަށް ވަރަށް މަދުން ނޫނީ ދިމާނުވާ ކަމެކެވެ. އެ ސަރަހައްދުން އެންމެ ފަހުން ނަގޫރޯޅިއެއް ފެނިފައިވަނީ 2021 ވަނަ އަހަރުގަ އެވެ.
މި ތޫފާނުގެ ސަބަބުން އެތައް ހާސް އިމާރާތަކަށް ގެއްލުން ލިބި، 300 އަށްވުރެ ގިނަ މީހުން ޒަޚަމްވެފައިވާ ކަމަށް އެ ސަރަހައްދުގެ ކަމާބެހޭ އިދާރާތަކުން ބުނެ އެވެ. މިހާރު އެ ސަރަހައްދުގައި މީހުން ސަލާމަތްކުރުމާއި އެހީތެރިކަން ފޯރުކޮށްދިނުމުގެ މަސައްކަތްތައް ވަނީ ފަށާފަ އެވެ.
މަސްދަރު: ބީބީސީ
