އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން، މެދުއިރުމަތި "ނުރައްކާތެރި ފުން ވަޅުގަނޑަކަށް" ވައްޓާލަމުންދާ ކަމަށް ޗައިނާ އިން ބުނެފި

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން، މެދުއިރުމަތި "ނުރައްކާތެރި ފުން ވަޅުގަނޑަކަށް" ވައްޓާލަމުންދާ ކަމަށް ބުނެ، އަންގާރަ ދުވަހު އދ. ގައި ޗައިނާއިން އެމެރިކާއަށް ވަރަށް ބޮޑަށް ފާޑުކިޔައިފި އެވެ.

ޔަމަނުގެ ހޫޘީންނާ ގުޅޭގޮތުން ބޭއްވި ބަހުސެއްގައި، އދ. އަށް ކަނޑައަޅާފައި ހުންނަވާ ޗައިނާގެ މަންދޫބު ސުން ލެއި ވިދާޅުވީ، ޔަމަނާއި ރަތްކަނޑުގެ މިހާރުގެ ހާލަތުގެ ފުރިހަމަ ޒިންމާ އެމެރިކާއިން އުފުލަންޖެހޭނެ ކަމަށާއި އެކަމުގައި ދެބަސްވެވޭނެ ޖާގައެއް ނެތް ކަމަށެވެ.

ސުން ވިދާޅުވި ގޮތުގައި، ޣައްޒާގެ ހަނގުރާމަ ހުއްޓުވުމަށާއި އެ ސަރަހައްދުގައި އުފެދިފައިވާ ނުތަނަވަސްކަން ކުޑަކުރުމަށް އދ. ގެ ސަލާމަތީ މަޖިލީހުން ކުރަމުންދާ މަސައްކަތްތަކަށް ހުރަސްއަޅައި، އެ މައްސަލަ ދިގުދަންމަނީ ސީދާ އެމެރިކާއިންނެވެ.

"ސަލާމަތީ މަޖިލީހުގެ އެއްވެސް ހުއްދައެއް ނެތި، އަދި އެމެރިކާއާއި އީރާނާ ދެމެދު މަޝްވަރާތައް ކުރިއަށްދަނިކޮށް، އެމެރިކާއިން ވަނީ އީރާނަށް އަސްކަރީ ހަމަލާތަކެއް ދީފައެވެ. މީގެ ސަބަބުން އެ ސަރަހައްދުގެ މަސްލަހަތު އަނެއްކާވެސް މިވަނީ ނުރައްކާތެރި ފުން ވަޅުގަނޑަކަށް ވެއްޓިފައި،" ސުން ވިދާޅުވި އެވެ.

ސުން މިފަދައިން ވިދާޅުވީ، ޔަމަނުގެ ހޫޘީންނާ ދެކޮޅަށް އދ. އިން އަޅާފައިވާ ހަތިޔާރު އެތެރެކުރުން މަނާކުރުމުގެ ގަރާރާ ޗައިނާއިން ޚިލާފުވަމުންދާ ކަމަށް ބުނެ، އދ. އަށް ކަނޑައަޅާފައި ހުންނަވާ އެމެރިކާގެ ސަފީރު މައިކް ވޯލްޓްޒް ކުރެއްވި ތުހުމަތުތަކަށް ރައްދު ދެއްވަމުންނެވެ.

ވޯލްޓްޒް ވިދާޅުވީ، އީރާނު ފަދަ ގައުމުތަކާއި، ޗައިނާގެ ބައެއް ކުންފުނިތަކާއި އިދާރާތަކުން އދ. ގެ 2216 ވަނަ ގަރާރާ ޚިލާފުވަމުންދާ ކަމަށާއި، ނަމަވެސް އެ ފަރާތްތަކާ މެދު އެކަށީގެންވާ ފިޔަވަޅެއް އެޅިފައި ނުވާ ކަމަށެވެ.

2015 ވަނަ އަހަރު ފާސްކުރި އދ. ގެ ސަލާމަތީ މަޖިލީހުގެ 2216 ވަނަ ގަރާރުގައި ބުނެފައިވަނީ، ހޫޘީން ހަމަލާތައް ހުއްޓާލައި، ޔަމަނުގައި އެ ޖަމާއަތުން ހިފާފައިވާ ސަރަހައްދުތަކުން ފޭބުމަށެވެ.

މީގެ އިތުރުން، އީރާނުގެ އެހީތެރިކަން ލިބޭ ހޫޘީންނާއި އެ ޖަމާއަތާ ގުޅުންހުރި ފަރާތްތަކަށް ހަތިޔާރު ފޯރުކޮށްދިނުން މަނާކުރުމުގެ އިތުރުން، މުދާ ހިފެހެއްޓުމާއި ދަތުރުފަތުރު ކުރުން މަނާކުރުން ފަދަ ފިޔަވަޅުތައް އެޅުމަށްވެސް އެ ގަރާރުގައި ބަޔާންކޮށްފައިވެ އެވެ.

ދުނިޔޭގެ ބާރުގަދަ ދެ ގައުމުގެ މެދުގައި ބަދަލުކުރެވުނު މި ހޫނު ބަހުގެ ހަމަލާތަކުގައި، ޗައިނާގެ މަންދޫބު އިތުރަށް ވިދާޅުވީ، އެމެރިކާގެ އަމަލުތަކާއި ދައްކާ ވާހަކަތަކުގެ ސަބަބުން ކުރިމަތިވާ ނޭދެވޭ އަސަރުތައް ނައްތާލުމަށްޓަކައި، އެމެރިކާއިން އަމިއްލަ އަމަލުތަކާ މެދު ފުންކޮށް ވިސްނައި، އަމަލީ ގޮތުން ފިޔަވަޅުތައް އަޅަންޖެހޭ ކަމަށެވެ.