ބޮލީވުޑްގެ މަޝްހޫރު އެކްޓަރު އާމިރު ޚާން އާއި ގޯރީ ސްޕްރެޓް ކައިވެނި ކުރަނީ

ބޮލީވުޑްގެ މަޝްހޫރު އެކްޓަރު އާމިރު ޚާން، އޭނާގެ ބައިވެރިޔާ ގޯރީ ސްޕްރެޓްއާ އަންނަ އާދީއްތަ ދުވަހު ކައިވެނި ކުރާނެކަން ކަށަވަރުކޮށްދީފި އެވެ. މި ކައިވެނީގެ ރަސްމިއްޔާތު ބޭއްވުމަށް ހަމަޖެހިފައިވަނީ މުމްބާއީގައި ހުންނަ އާމިރު ޚާންގެ ގޭގައި، އާއިލާގެ ގާތް މީހުންގެ ބައިވެރިވުމާއެކުގަ އެވެ.

އޭއެންއައި އިން ރިޕޯޓްކޮށްފައިވާ ގޮތުގައި، މިދިޔަ ބުރާސްފަތި ދުވަހު ނޫސްވެރިންނާ ވާހަކަދައްކަމުން އާމިރު ޚާން ބުނީ، އަންނަ ޖުލައި މަހުގެ 5 ވަނަ ދުވަހު އޭނާ ކައިވެނިކުރަން ނިންމާފައިވާ ކަމަށެވެ. އަދި އެ ދުވަހަކީ އެ ދެމީހުންނަށް ވަރަށް ހާއްސަ ދުވަހެއް ކަމަށާއި، ކައިވެނީގެ ރަސްމިއްޔާތު ވަރަށް އާދައިގެ ގޮތަކަށް ގޭގައި ބޭއްވުމަށް ނިންމާފައިވާ ކަމަށް ހިންދީ ބަހުން އޭނާ ބުންޏެވެ.

ހިންދީ ސިނަމާގެ އެންމެ ނުފޫޒުގަދަ އެއް ތަރި ކަމަށްވާ އާމިރު ޚާން އަކީ "ލަގާން"، "ލާލް ސިންގް ޗައްޑާ" އަދި "ދަންގަލް" ފަދަ ފިލްމުތަކުން ބައިނަލްއަގުވާމީ މަގުބޫލުކަން ހޯދާފައިވާ ފަންނާނެކެވެ. އޭނާ މި ކައިވެނީގެ ޚަބަރު ހިއްސާކުރީ، މަޝްހޫރު ޑައިރެކްޓަރު ރާޖްކުމާރު ހިރާނީ އުފައްދާ އޭނާގެ ކުރިއަށް އޮތް ސީރީޒް "ޕްރީތަމް އެންޑް ޕެޑްރޯ" ގެ ސްކްރީނިންގ ގެ ތެރެއިންނެވެ.

އާމިރު ޚާން އިތުރަށް ބުނީ، އެ ދެމީހުންގެ އުފާވެރި ދިރިއުޅުމަށް އެދި ހެޔޮދުއާ ކޮށްދިނުމަށެވެ. އަދި މި ކައިވެނީގެ ހަފުލާއަކީ ހަމައެކަނި އާއިލާގެ މެންބަރުންނާއި ކުޑައިރުގެ މަދު ރަހުމަތްތެރިންގެ މެދުގައި ބާއްވާ ވަރަށް ކުޑަ އަދި ޕްރައިވެޓް ހަފުލާއެއް ކަމަށް އޭނާ ފާހަގަކުރި އެވެ.

ދަ އިންޑިއަން އެކްސްޕްރެސް އިން ރިޕޯޓްކޮށްފައިވާ ގޮތުގައި، ކައިވެނި ރަޖިސްޓްރީ ކުރުން އޮންނާނީ އާދީއްތަ ދުވަހުގެ ހެނދުނުގެ ވަގުތެއްގަ އެވެ. މި ރަސްމިއްޔާތު ބޭއްވުމަށް ހަމަޖެހިފައިވަނީ ގިނަ ފިލްމީ ތަރިންތަކެއް ދިރިއުޅޭ މުމްބާއީގެ މުއްސަނދި އަވަށެއް ކަމަށްވާ ބަންދްރާގައި ހުންނަ އާމިރު ޚާންގެ ގޭގަ އެވެ.

އެންޑީޓީވީން ރިޕޯޓްކޮށްފައިވާ ގޮތުގައި، ގައުމުން ބޭރުން އަންނަ އާއިލީ މެންބަރުން ހިމެނޭހެން ގާތްގަނޑަކަށް 150 މެހެމާނުން މި ހަފުލާގައި ބައިވެރިވާނެ އެވެ. އަދި މި ދެމީހުންގެ ކުރީގެ ކައިވެނިތަކަށް ލިބިފައިވާ ދަރިން މި ރަސްމިއްޔާތުގައި މުހިންމު ދައުރެއް އަދާކުރާނެ ކަމަށް ބެލެވެ އެވެ.

މީގެ ތެރޭގައި އާމިރު ޚާންގެ ފުރަތަމަ ކައިވެނި ރީނާ ދައްތާއަށް ލިބިފައިވާ ދެ ދަރިން ކަމަށްވާ ޖުނައިދު ޚާން އާއި އީރާ ޚާންގެ އިތުރުން، ދެވަނަ ކައިވެނި ކިރަން ރާއޯއަށް ލިބިފައިވާ ދަރިފުޅު އާޒާދު ރާއޯ ޚާން ހިމެނެ އެވެ. މީގެ އިތުރުން ގޯރީ ސްޕްރެޓްގެ ކުރީގެ ކައިވެންޏަށް ލިބިފައިވާ ފިރިހެން ދަރިފުޅުވެސް މި ރަސްމިއްޔާތުގައި ބައިވެރިވާނެ އެވެ.

ޝާހްރުކް ޚާން އާއި ސަލްމާން ޚާންއާއެކު ހިންދީ ސިނަމާގެ "ތިން ޚާނުން" ގެ ތެރޭގައި ހިމެނޭ އާމިރު ޚާން އަކީ، ފާއިތުވި 40 އަހަރެއްހާ ދުވަހުގެ ތެރޭގައި މަދު ނަމަވެސް ފެންވަރު ރަނގަޅު އަދި ވިޔަފާރީގެ ގޮތުން ކާމިޔާބު ފިލްމުތަކެއް ކުޅެފައިވާ ތަރިއެކެވެ.

އާމިރު ޚާން އެންމެ ފުރަތަމަ ކައިވެނިކުރީ 1986 ވަނަ އަހަރު ރީނާ އަށެވެ. އެ ކައިވެނި 2002 ވަނަ އަހަރު ރޫޅުނު ފަހުން، އޭނާ 2005 ވަނަ އަހަރު ކިރަން ރާއޯއާ ކައިވެނިކުރި އެވެ. ކިރަންއާ އޭނާ ދިމާވީ "ލަގާން" ފިލްމުގެ މަސައްކަތުގެ ތެރެއިންނެވެ. އެ ދެމީހުން 2021 ވަނަ އަހަރު ވަކިވި ނަމަވެސް، ދަރިފުޅު ބެލުމުގެ ކަންކަމުގައި ދެމީހުން ގުޅިގެން މަސައްކަތް ކުރެ އެވެ.

އާމިރު ޚާން، ގޯރީ ސްޕްރެޓްއާއެކު އޮތް ގުޅުން ރަސްމީކޮށް ހާމަކުރީ 2025 ވަނަ އަހަރުގެ މާޗް މަހު އޭނާގެ 60 ވަނަ އުފަންދުވަހުގެ ފާހަގަކުރުމުގެ ތެރެއިންނެވެ. އެ ދުވަހު މީޑިއާއަށް ގޯރީ ތައާރަފުކޮށްދެމުން އޭނާ ވަނީ "ބޫވަންއަށް އެންމެ ފަހުން އޭނާގެ ގޯރީ ފެނިއްޖެ" ކަމަށް ބުނެ ސަމާސާކޮށްފަ އެވެ. މިއީ "ލަގާން" ފިލްމުގައި އޭނާ ކުޅުނު ކެރެކްޓަރާއި އެ ފިލްމުގެ ބަތަލާއަށް ނިސްބަތްކޮށް ބުނި ވާހަކަ އެކެވެ.

އިންޑިއާގެ ދެކުނުގެ ސިޓީއެއް ކަމަށްވާ ބެންގަލޫރަށް އުފަން ގޯރީ ސްޕްރެޓް އަކީ އާންމުކޮށް މީޑިއާގެ ކުރިމައްޗަށް ނުކުމެ އުޅޭ މީހެއް ނޫނެވެ. ޔުނިވާސިޓީ އޮފް ދަ އާޓްސް ލަންޑަނުން ސްޓައިލިންގް އަދި ފޮޓޯގްރަފީ ކިޔަވާފައިވާ ގޯރީ މިހާރު ހިންގަނީ މުމްބާއީގައި ހުންނަ ސެލޫންއެކެވެ.

މިދިޔަ އޭޕްރީލް މަހު ނަވްބާރަތު ޓައިމްސްއަށް ދިން އިންޓަވިއުއެއްގައި އާމިރު ޚާން ބުނީ، ގޯރީއާ ބައްދަލުވުމަކީ އޭނާއަށް ލިބުނު ވަރަށް ބޮޑު ނަސީބެއް ކަމަށާއި، އޭނާގެ ސަބަބުން ހިތްހަމަޖެހުން ލިބޭ ކަމަށެވެ. އަދި އޭނާގެ ދިރިއުޅުން ފުރިހަމަވީ މިހާރު ކަމަށް އިހުސާސްކުރެވޭ ކަމަށްވެސް އާމިރު ޚާން ބުންޏެވެ.